A bow fu konmakandra presi e gi Yehovah glori

„Mi no man bribi san mi e si. Noiti mi ben denki taki wi ben sa abi so wan moi Kownukondre zaal leki a wan disi pe wi kan kon makandra fu prèise Yehovah. Mi no man taigi yu fa mi e prisiri!” —MARIA, NA MEKSIKOW.

YEHOVAH KOTOIGI lobi fu kon makandra fu teki leri fu Gado Wortu, Bijbel (Psalm 27:4; Hebrewsma 10:23-25). Èn den e prisiri spesrutu fu du disi te den kan kon makandra na presi di warti fu anbegi Gado. Na ini den yari di pasa, den bow dusundusun nyun konmakandra presi, namku Kownukondre zaal na ini furu kondre na heri grontapu.

Fu san ede a ben de fanowdu fu bow so furu nyun konmakandra presi? Suma e du a wroko disi? Èn sortu krakti a bow-wroko disi abi tapu den wan di e du en? Fu man kisi piki tapu den aksi disi, dan meki wi luku san e pasa na ini Meksikow nanga Belise.

Moro leki 3000 nyun Kownukondre zaal de fanowdu!

Na ini den yari di pasa, Yehovah Kotoigi na ini Meksikow ben e kon makandra fu anbegi Gado na iniwan presi di den ben man feni. Fu eksempre, den ben e hori konmakandra na bakadyari fu oso, na oso fu Kotoigi, na ini maksin fu bigi wenkri, na presi pe sma e poti wagi, noso na presi di den ben yuru. Na ini a ten dati, den getrow Kotoigi disi ben e tan prakseri o bun a ben o de efu den ben kan bow den eigi Kownukondre zaal.

Na a ten fu 1994, yu ben abi 388.000 Kotoigi na ini Meksikow. Den brada di e luku fa a wroko e go na ini a kondre dati, kon si taki ete 3.300 nyun Kownukondre zaal ben o de fanowdu, so taki ala den Kotoigi disi ben kan abi den eigi presi fu anbegi. Disi na trutru wan bigi wroko di den ben o abi fu du!

Na a ten dati, son gemeente di ben man bow den eigi Kownukondre zaal, ben e du dati kaba. Ma na ini den feifi yari baka dati, a ben kon de krin fu si taki wi ben musu bow moro Kownukondre zaal, èn wi ben o musu bow den moro esi srefi, fu di moro nanga moro sma e kon na ini a tru anbegi. Fa den brada e klari a wroko disi?

Wrokoman di sabi a wroko de klariklari fu go na difrenti presi

Na ini 1999, den Kotoigi seti wan nyun programa fu bow Kownukondre zaal. Na ini heri Meksikow, bow-grupu ben e seti fu bow Kownukondre zaal. Yehovah Kotoigi fu difrenti presi na ini a kondre ben de klariklari fu horibaka gi a moi seti disi. Furu fu den wan disi ben sabi du bow-wroko kaba. Nownowde, Meksikow abi 35 fu den bow-grupu disi, èn wán grupu seti na ini Belise.

Nofo tron den Kownukondre zaal bow-grupu disi abi sowan aiti man nanga uma di de klariklari fu du a wroko disi. Den wrokoman disi di e  prisiri fu du a bow-wroko, e komoto fu a wan presi fu a kondre go na a trawan fu teki fesi na ini a wroko fu bow Kownukondre zaal. Ibriwan fu den wrokoman disi e wroko aiti yuru wan dei, fu munde te go miti freida èn den e wroko sosrefi ibri tra satra. Den e bigin seibi yuru mamanten nanga wan takimakandra fu wan bijbeltekst, èn baka dati den e nyan. Ibriwan fu den de klariklari fu du iniwan wroko di den musu du. Den umasma fu eksempre, e du den srefi wroko di den mansma e du, namku den e plèister, den e poti tegel èn den e ferfi.

A gemeente di abi a zaal di e bow, e sorgu taki den wrokoman disi di e go na difrenti presi, abi wan presi fu tan, den e wasi den krosi fu den, èn den e bori nyanyan gi den. Boiti taki den brada disi e wroko makandra fu bow a zaal, den abi na okasi tu fu kon leri sabi ala den brada nanga sisa fu a gemeente te den de na den Kresten konmakandra, èn te den e preiki oso fu oso.

Den wan di de klariklari fu du a wroko e kisi blesi

Fa den wrokoman disi e denki fu a wroko di den e du? Daniel di du a wroko disi moro leki dri yari, e taki: „A tru taki wi e wroko na ini faya son èn na ini a kowru, wi e nyan sani di wi no gwenti, wi e froisi furu leisi, wi e tan fara fu famiri, èn nofo tron wi no abi den nyun sani di furu sma abi.” A e taki moro fara: „Ma te wi e luku den blesi di wi e kisi, dan den problema dati na noti.”

San na wan tu fu den blesi disi? Furu fu den wrokoman disi e leri nyun sani fu tra wrokoman. Carlos, wan wrokoman di e teki fesi na ini wan fu den moro bigi bow-grupu, e taki san na a moro prenspari blesi gi en. A e taki: „Wi kon tron leki wan osofamiri fu 20 sma. Wi e nyan nanga makandra, wi e wroko makandra, wi e studeri makandra èn wi e begi Gado makandra. Wi kon tron trutru mati fu makandra.”

A bow-grupu e kon tron bun mati sosrefi fu den brada nanga sisa fu a gemeente di den e yepi. José, di yepi fu bow moro leki 100 Kownukondre zaal e taki: „Te wi e si fa den brada nanga sisa e krei èn e lafu fu prisiri fu di den kon abi wan Kownukondre zaal di den ben wani so langa kaba, dan a sani dati e naki wi ati trutru.” A e taki moro fara: „Wi e prisiri fu sabi taki srefi a pikin prati di wi abi na a wroko di e du fu bow nyun konmakadra presi gi a tru anbegi, e yepi trawan fu kon abi wan moro tranga bribi.”

Den du tumusi bun wroko!

Den presi disi fu anbegi no abi furu pranpran. Na presi fu dati, den Kownukondre zaal makriki fu bow, èn fu dati ede den wrokoman man bow den esi-esi èn den no e kostu furu moni. Nofo tron den e bow nanga wrokosani di de fu feni na ini a kondre, èn den e bow na a fasi fa den sma fu a kondre gwenti bow. Na so fasi den kan bow wan nyun zaal na ini sowan siksi wiki!

Na ini 2007, ala den gemeente na ini Belise ben abi den eigi nyun Kownukondre zaal, èn dati na sowan 17 Kownukondre zaal. Sensi 1999, moro leki 1400 Kownukondre zaal bow na ini Meksikow!

 Aladi den brada klari furu wroko kaba, toku moro wroko de fu du ete (Mateyus 9:37). Now moro leki 600.000 Kotoigi de na ini Meksikow, èn den alamala e kon makandra dri tron na ini wan wiki fu kisi leri fu Gado Wortu. Fu dati ede, pikinmoro 2000 nyun Kownukondre zaal de fanowdu ete. Efu na libisma wawan ben musu du a bow-wroko disi, dan den no ben o man doro a marki disi. Ma te wi e luku den someni Kownukondre zaal di bow, dan wi e si taki Yehovah, a Sma di „man du ala sani” e horibaka gi a wroko.—Mateyus 19:26.

[Faki/​Prenki na tapu bladzijde 22]

„Den e du san den e taki”

A bow fu Kownukondre zaal no abi krakti soso tapu Yehovah Kotoigi fu a gemeente dati, ma a kan abi krakti tu tapu tra sma. Fu eksempre, di wan Kownukondre zaal ben e bow na ini Belise, dan wan man taigi en wefi di e go na a Pinkster gemeente, taki te Yehovah Kotoigi kaba bow a „kerki” fu den, dan a wani go na den konmakandra fu den. Fu san ede a man disi ben wani du dati? A taki: „Mi kan si taki Gado de nanga den sma disi. Den no e meki trobi te den e wroko makandra. Èn den e du san den e taki.”

[Prenki]

Kownukondre zaal na ini Orange Walk, Belise

[Faki/​Prenki na tapu bladzijde 23]

Den e wroko na heri grontapu

Kownukondre zaal bow-grupu seti na ini 120 kondre. Wan tu fu den kondre dati pe den wrokoman disi e wroko nanga ala prisiri, kari dyaso na ondrosei:

Angola, Bolifia, Dominikan Republiek, Etiopia, Fidyi, Gana, Hong Kong, India, Kasakstan, Liberia, Moldafia, Nigeria, Papuwa Nyun Ginea, Rwanda, Sambia, Tufalu, Ukraini, Venezuela, Yamaika.

[Prenki]

Zaal na ini Acapulco, Meksikow

Wan Kownukondre zaal bow-grupu na ini Meksikow

[Prenki na tapu bladzijde 23]

Kownukondre zaal na ini Tlaxcala, Meksikow