Ku beetaʼal najoʼob utiaʼal u adorartaʼal Jéeoba

PAX ICH

Ku beetaʼal najoʼob utiaʼal u adorartaʼal Jéeoba

«Maʼ tin creertik le baʼax kin wilkaʼ. Maʼ tin tuklaj wa yaan u yantaltoʼon upʼéel naj jach táaj jatsʼuts utiaʼal k-muchʼikba adorart Jéeobaeʼ. ¡Jach táaj kiʼimak in wóol!» —MARÍA (MÉXICO).

U J-JAAJKUNAJOʼOB JÉEOBAEʼ (testigos de Jehová) utstutʼaan u muchʼkubaʼob utiaʼal u kanikoʼob baʼax ku yaʼalik le Bibliaoʼ (Salmo 27:4; Hebreob 10:23-25). Yéetel utstutʼaan u beetkoʼob tiʼ najoʼob maʼalobtak utiaʼal u adorartaʼal Dios. Teʼ tsʼook jaʼaboʼobaʼ, tiʼ yaʼab luʼumiloʼobeʼ tsʼoʼok u beetaʼal u milesi najoʼob utiaʼal u adorartaʼal Dios; tiʼ le najoʼobaʼ ku yaʼalaʼaltiʼob u Najiloʼob Reino.

¿Baʼaxten tsʼoʼok u beetaʼal le najoʼobaʼ? ¿Máaxoʼob beetik? Yéetel ¿bix u yuʼubikuba le máaxoʼob ku meyajoʼoboʼ? Utiaʼal k-núukik le kʼáatchiʼobaʼ koʼox ilik baʼax táan u beetaʼal tu luʼumil México yéetel Belice.

Kʼaʼabéet uláakʼ u milesi u Najiloʼob Reino

Úuchileʼ u j-jaajkunajoʼob Jéeoba yanoʼob Méxicoeʼ ku muchʼkubaʼob utiaʼal u adorartoʼob Dios tiʼ solaroʼob, tu yotoch wa máax, tiʼ bodegaʼob wa tiʼ uláakʼ kúuchiloʼob ku alquilarkoʼob. Letiʼobeʼ yaʼab utéenel tu tukloʼob jach maʼalob wa ka páajchajak u beetkoʼob najoʼob utiaʼal u muchʼkubaʼob.

Tu jaʼabil 1994 yaan kaʼach 388,000 J-jaajkunajoʼob tu luʼumil México. Teʼ jaʼab jeʼeloʼ ilaʼabeʼ kʼaʼabéet u beetaʼal 3,300 u Najiloʼob Reino utiaʼal ka yanak tuʼux u muchʼkuba tuláakal. ¿Máasaʼ upʼéel jach nojoch meyaj?

Teʼ kʼiinoʼob jeʼeloʼ, yaan J-jaajkunajoʼob páajchaj u beetkoʼob upʼéel Najil Reino utiaʼal u muchʼkubaʼob. Baʼaleʼ ka máan cinco jaʼaboʼobeʼ, ilaʼabeʼ utiaʼal ka yanak tuʼux u muchʼkuba u maasil J-jaajkunajoʼobeʼ, kʼaʼabéet u beetaʼal u maasil najiloʼob, yéetel kʼaʼabéet u maas séebtal bix u beetaʼaloʼob. ¿Baʼax túun beetaʼabi?

U múuchʼ máakoʼob ku líiʼskoʼob u Najiloʼob Reino

Tu jaʼabil 1999, tu luʼumil Méxicoeʼ káaj u kaxtaʼal j-jaajkunajoʼob tiʼ Jéeoba utiaʼal ka u beetoʼob le u Najiloʼob Reinooʼ. Yaʼab tiʼ le kaxtaʼaboʼoboʼ u yojliliʼob u beetoʼob najoʼobeʼ, yéetel tu yaʼaloʼob jeʼel u táakpajloʼob utiaʼal u beetaʼal le meyajaʼ. Teʼ kʼiinoʼobaʼ, tu luʼumil Méxicoeʼ yaan 35 u múuchʼ u j-jaajkunajoʼob Jéeoba ku beetkoʼob le meyajaʼ, yéetel tu luʼumil Beliceiʼ yaan junmúuchʼiʼ.

Maases ocho utúulul máaxoʼob yaan ichil cada upʼéel tiʼ le u Múuchʼ Máakoʼob ku Líiʼskoʼob u Najiloʼob Reinooʼ. Ichiloʼobeʼ yaan xiiboʼob yéetel koʼoleloʼobiʼ, yéetel maʼatech u boʼotaʼaloʼob yoʼolal le meyaj ku beetkoʼoboʼ. Le J-jaajkunajoʼobaʼ ku binoʼob tiʼ jejeláas kaajoʼob utiaʼal ka u táanilkúuntoʼob u beetaʼal le meyajoʼ. Letiʼobeʼ desde lunes tak viernes ku meyajoʼob ocho oras sáamsamal, yéetel utiaʼal sabadoseʼ upʼéel ku meyajkoʼobiʼ yéetel uláakʼeʼ maʼatech. Las siete u sáastaleʼ letiʼobeʼ ku múul xokkoʼob upʼéel teksto tiʼ le Bibliaoʼ, ku tsʼoʼokoleʼ ku yukʼuloʼob. Tuláakloʼob ku beetkoʼob jeʼel baʼalak meyajil ka aʼalaʼaktiʼobeʼ. Le xiiboʼob yéetel le koʼoleloʼoboʼ ku revocaroʼob, ku takʼikoʼob ladrilloʼob, ku pintaroʼob yéetel ku beetkoʼob uláakʼ meyajoʼob.

Le J-jaajkunajoʼob yanoʼob teʼ kaajoʼ ku yáantkoʼob le máaxoʼob ku líiʼskoʼob u Najiloʼob Reino: ku tsʼáaik tuʼux u wenloʼob, ku pʼoʼikoʼob u nookʼob yéetel ku beetkoʼob u yoʼochoʼob. Tsʼoʼoleʼ le máaxoʼob ku líiʼskoʼob u Najiloʼob Reinooʼ, ku múul binoʼob teʼ muchʼtáambaloʼob yéetel le j-jaajkunajoʼob yanoʼob teʼ kaaj tuʼux ku meyajoʼoboʼ yéetel ku múul jóoʼloʼob xan joonaj joonai u tsikbaltoʼob baʼax ku yaʼalik le Bibliaoʼ.

Le utsiloʼob ku kʼamik le máaxoʼob beetik le meyajaʼ

Le máaxoʼob ku líiʼskoʼob u Najiloʼob Reinooʼ, ¿baʼax ku yaʼalikoʼob yoʼolal le meyaj ku beetkoʼoboʼ? Daniel, máax tsʼoʼok maas tiʼ óoxpʼéel jaʼaboʼob káajak u beetik le meyajaʼ, ku yaʼalik: «U jaajileʼ k-muʼyajtik ooxol bey xan keʼelil, k-jaantik jaanloʼob maʼ suuktoʼoniʼ, mantatsʼ táan k-viajar, tsʼoʼoleʼ náach yanoʼon tiʼ k-láakʼoʼob yéetel maʼ jach yaʼab baʼaloʼob yantoʼoniʼ. Baʼaleʼ maas jach yaʼab utsiloʼob k-kʼamik ke le talamiloʼob ku yantaltoʼonoʼ».

¿Bey baʼax utsiloʼob ku kʼamikoʼobeʼ? Yaʼab tiʼ letiʼobeʼ ku kanik u beetoʼob túumben meyajoʼob. Baʼaleʼ Carlos, utúul tiʼ le máax nuʼuktik junmúuchʼ tiʼ le máaxoʼob beetik le meyajaʼ, ku yaʼalik yaan uláakʼ nojoch utsil ku taasik, letiʼeʼ ku yaʼalik: «K-uʼuyikba beyoʼon upʼéel familia nojcheʼ. Tuláakloʼon k-múul janal, k-múul meyaj, k-múul xook yéetel k-múul orar. Tsʼoʼok jach k-kanik bisba maʼalob».

Le junmúuchʼ máaxoʼob beetik u Najiloʼob Reinooʼ ku kʼuchul u jach bisubaʼob yéetel le J-jaajkunajoʼob yanoʼob teʼ kaajoʼ. José, máax tsʼoʼok u meyaj tiʼ maas tiʼ cien upʼéelel Najiloʼob Reinoeʼ, ku yaʼalik: «Jach jatsʼuts u yilaʼal bix u jach kiʼimaktal u yóol le J-jaajkunajoʼob ken u yiloʼob tsʼoʼok u yantaltiʼob upʼéel Najil Reino». Ku yaʼalik xan: «Jach ku taasiktoʼon kiʼimak óolal k-ojéeltik ku muʼukʼaʼankúuntaʼal u fe le J-jaajkunajoʼob yanoʼob teʼ kaaj yoʼolal le meyaj k-beetkoʼ».

Jach yaʼab u Najiloʼob Reino tsʼoʼok u beetaʼal

Le u Najiloʼob Reinooʼ maʼ nukuch najoʼobiʼ, le oʼolal maʼ sen koʼoj u tojloʼobiʼ yéetel séeb u beetaʼaloʼob. Yaan kʼiineʼ ku beetaʼaloʼob jeʼel bix suuk u beetaʼal le najoʼob teʼ kaajoʼ. Beyoʼ ku páajtal túun u beetaʼal upʼéel Najil Reino chéen ichil seis semanaʼob.

Tak tu jaʼabil 2007, tu luʼumil Beliceiʼ tsʼoʼok u beetaʼal diecisiete u Najiloʼob Reino utiaʼal u muchʼkuba tuláakal le j-jaajkunajoʼob yanoʼob teʼeloʼ. Desde tu jaʼabil 1999, tu luʼumil Méxicoeʼ tsʼoʼok u beetaʼal maas tiʼ mil cuatrocientos Najiloʼob.

Kex tsʼoʼok u beetaʼal yaʼab u Najiloʼob Reinoeʼ, láayliʼ yaʼab kʼaʼabéet u beetaʼaloʼobeʼ (Mateo 9:37). Tuláakal le J-jaajkunajoʼob yanoʼob Méxicoeʼ maas tiʼ 600,000 utúulaloʼob, yéetel óoxtéen cada semana ku muchʼtaloʼob utiaʼal u kanikoʼob baʼax ku yaʼalik le Bibliaoʼ. Le oʼolaleʼ, kʼaʼabéet u beetaʼal óoliʼ dos mil uláakʼ Najiloʼob Reino. Wa chéen tu juunal u j-jaajkunajoʼob Jéeoba ka beetoʼob le meyajaʼ maʼ kun béeytal u tsʼoʼokbeskoʼob. Baʼaleʼ jeʼex tsʼoʼok k-ilkoʼ, táan u yáantaʼaloʼob tumen Jéeoba, le Dios «tuláakal baʼal ku páajtal u beetik[oʼ]» (Mateo 19:26).

[U tsolajil le oochel teʼ táan juʼun 30]

Najil Reino yaan Orange Walk (Belice)