Marko Tafuupwike
Fundeni Abana Benu
Marko Tafuupwike
MARKO alilembeleko ibuuku lya mu Baibolo limo pali yalya yane ayalanda pa bumi bwa kwa Yesu. Ibuuku lyakwe e lyacepesha pa mabuuku yane aya Mbila Nsuma, kabili e lyayanguka sana ukubelenga. Bushe uyu wine Marko ali muntu wa musango nshi? Bushe kuti watila Marko alishibene na Yesu?— * Natulande pa mafya ayo Marko apitilemo, kabili tulande na pa calengele ukuti atwalilile ukuba Umwina Kristu.
Umuku wa kubalilapo Baibolo yalanda pali Marko, ni lintu Imfumu Herode Agripa yapoosele umutumwa Petro mu cifungo. Inshita imo ubushiku malaika akakwile Petro, kabili ilyo line fye aile ku ng’anda ya banyina kwa Marko ba Maria, abaleikala mu Yerusalemu. Iyi nshita malaika afumishe Petro mu cifungo, ninshi palipita ne myaka nalimo 10 ukutula apo Yesu afwilile pa bushiku bwa mutebeto wa ca Kucilila uwaliko mu 33 C.E.—Imilimo 12:1-5, 11-17.
Bushe walishiba icalengele ukuti Petro aye ku ng’anda ya kwa Maria?— Napamo alishibene na baleikala pa ng’anda ya kwa Maria kabili alishibe no kuti abasambi ba kwa Yesu balelonganina muli ilya ng’anda. Nangu fye ni Barnaba uwali umufyala wa kwa Marko, na o ali musambi wa kwa Yesu, nakalimo aishileba umusambi lilya kwali Umutebeto wa Pentekoste mu 33 C.E. Baibolo yalilandapo no kuti ali ni kapekape kabili alipeeleko ubupe bumo ku basambi abapya. Kanshi limbi na Yesu wine alimwishibe uyu Barnaba, pamo fye na Maria nyina Marko, na o wine uwali ni lupwa lwa kwa Barnaba.—Imilimo 4:36, 37; Abena Kolose 4:10.
Mwi buuku alembele, Marko atile ilyo baikete Yesu ubushiku, kwali no mulumendo umo “uwafwele fye insalu.” Marko alembele no kuti ilyo abalwani baikete Yesu, ulya mulumendo alifulumwike. Bushe kuti watila ulya mulumendo ali ni nani?— Afwile aali ni Marko wine! Kanshi lintu Yesu na batumwa bakwe bafumine mu ng’anda ubushiku sana, Marko napamo afwele fye insalu lubilo lubilo no kubakonka.—Marko 14:51, 52.
Kanshi te kuti tutwishike ukuti Marko alesangwa sana na babomfi ba kwa Lesa. Afwile e ko ali na lintu abasambi bapokelele umupashi wa mushilo pa Pentekoste mu 33 C.E., kabili Marko alesangwa sana na babomfi ba cishinka aba kwa Lesa, pamo nga Petro. Lelo na kabili alibombeleko no mufyala wakwe Barnaba, uwayafwile na Sauli ilyo amulondolwele kuli Petro ninshi palipita ne myaka itatu ukutula apo Yesu amonekele kuli Sauli mu cimonwa. Ilyo papitile imyaka imo ifi, Barnaba aile ku Tarsi pa kuti bakamonane na Sauli.—Imilimo 9:1-15, 27; 11:22-26; 12:25; Abena Galatia 1:18, 19.
Mu 47 C.E., abatumwa baebele Barnaba na Sauli ukuya baleshimikila abantu imbila nsuma mu fifulo fimbi. Basendeleko na Marko, lelo katwishi ne calengele, Marko alibashiile no kubwelelamo ku ng’anda ku Yerusalemu. Sauli, uo batendeke ukwita ati Paulo nge fyo balemwita ku bena Roma, alifulilwe. Kabili tasuulileko fye kuli filya Marko abashiile pantu ena amwene ukuti tacaweme nangu panono.—Imilimo 13:1-3, 9, 13.
Ilyo Paulo na Barnaba babwelele ukufuma uko baile mu kushimikila, bashimike ifisuma ifyacitike ilyo baleshimikila. (Imilimo 14:24-28) Ilyo papitile imyeshi inono, aba babili bapangile ukubwelela kuli balya Abena Kristu bapya. Barnaba alefwaya ukusenda Marko na kabili, nomba bushe nawishiba ifyo Paulo acitile?— Paulo atile “tacalingile ukumusenda” pantu Marko alibashiile no kubwelela ku ng’anda. Ifyakonkelepo fifwile fyalilengele Marko ukumfwa ububi sana!
Palya pene Paulo and Barnaba balikalipe icine cine, kabili “kwaimine icipyu cikalamba,” ica kutila balipaatukene no kupaatukana. Barnaba asendele Marko no kuya nankwe mu kushimikila ku Kupro, kabili Paulo ena asendele Sila no kuyapempula abasambi bapya nge fyo balefwaya ukucita. Marko afwile alyumfwile sana ububi ilyo amwene ukuti ifyo acitile fyalilengele Paulo na Barnaba ukupusana!—Imilimo 15:36-41.
Tatwaishiba icalengele ukuti Marko abwelele ku ng’anda. Napamo kwali umulandu wacindama uwalengele ukuti abwelele. Te mulandu ne fyacitike, Barnaba ena alicetekele ukuti Marko takabwekeshepo. Na ka cine tabwekeshepo. Marko tafuupwike! Ilyo papitile inshita, aile pamo na Petro ku Babiloni ukutali sana mu kushimikila. Ilyo baali kulya, Petro atumine imitende, kabili alandile no kuti, “na Marko umwana wandi” amuposha.—1 Petro 5:13.
E ico Petro alitemwanene sana na Marko pantu balebombela Lesa pamo! Nangu fye libuuku ilyo Marko umwine alembele lilatulanga ukuti balitemwanene sana na Petro. Kanshi e calenga no kuti Marko alondolole bwino imilimo Yesu abombele, pantu uwamushimikiile ni Petro uwaleba sana na Yesu. Kuti twasumina ifi, nga twamona ifyo alandile pa cikuuku ca mwela icali pali bemba wa Galili, ilyo twalinganya ne fyo abatumwa bambi balandapo. Marko ena alilumbula no lubali lwa bwato uko Yesu asendeme na cintu asendemepo, ifintu ifyo umulondo we sabi nga Petro engatemwa ukulandapo. Leka nomba tubelenge aya malembo pa kuti tulinganye bwino ifyo bonse balandile pali ici cacitike. Twalabelenga Mateo 8:24; Marko 4:37, 38; na Luka 8:23.
Mu kuya kwa nshita lintu Paulo aali mu cifungo ku Roma, alitashishe sana Marko pa mulandu wa kuti alemukoselesha. (Abena Kolose 4:10, 11) Na lintu Paulo bamukakile na kabili ku Roma kwine, alembeele Timote no kumulomba ukuti akese na Marko, kabili atile: “Pantu wa mulimo ku kumpyungila.” (2 Timote 4:11) Cine cine, Marko aliipakishe ukubomba imilimo iikalamba iya kwa Lesa pa mulandu wa kuti tafuupwike!
[Futunoti]
^ para. 3 Nga ca kuti mulebelengela capamo na bana, apo mulesanga bashilile fye ninshi mufwile mwalolelako pa kuti abana balandepo.
Amepusho:
○ Ni kwi Marko aleikala, kabili cinshi wingasosela ukuti napamo alishibene na Yesu?
○ Bushe ni nani maka maka, ayafwilishe sana Marko?
○ Cinshi cali no kulenga Marko ukufuupulwa?
○ Twaishiba shani ukuti umutumwa Paulo alishiletemwa Marko na kabili?
[Icikope pe bula 25]
Kuti watila uyu mulumendo nani? Cinshi camucitikila, kabili cinshi calenga?
[Icikope pe bula 26]
Busuma nshi bwafuminemo pa mulandu wa kuti Marko tafuupwike?