Kpep Nditọ Fo

Mark Ikakpaha Mba

MARK ekewet kiet ke otu mbụk gospel inan̄ oro ẹban̄ade uwem Jesus. Mbụk esie ekpri onyụn̄ emem akan ndikot. Mark ekedi anie? Ndi emekere ke enye ama ọdiọn̄ọ Jesus?— * Ẹyak ise ikpọ n̄kpọ-ata oro Mark okosobode man ifiọk ntak emi enye mîkakpaha mba ndidi Christian.

Akpa ini emi ẹsiakde Mark ke Bible edi ini emi Edidem Herod Agrippa ekesịnde apostle Peter ke ufọk-n̄kpọkọbi. Okoneyo usen kiet, angel ama okosio Peter ke ufọk-n̄kpọkọbi, ndien Peter ama ọsọsọp aka ufọk Mary, eka Mark, emi okodude ke Jerusalem. Ẹkesio Peter ke ufọk-n̄kpọkọbi n̄kpọ nte isua duop ke ẹma ẹkewot Jesus ke Passover 33 E.N.—Utom 12:1-5, 11-17.

Ndi ọmọfiọk ntak emi Peter akakade ufọk Mary?— Ekeme ndidi enye ama emehe ye mme owo ke ufọk oro onyụn̄ ọfiọk ke mbet Jesus ẹma ẹsisop idem do. Barnabas eyen eyeneka ete Mark ama ededi mbet ke anyan ini, anaedi ọtọn̄ọde ke Usọrọ Pentecost 33 E.N. Ẹtịn̄ ke Bible ẹte ke enye ama esifọn ido ye mbufa mbet. Ntem anaedi Jesus ama ọfiọk Barnabas, ye Mary eyeneka ete Barnabas, ye Mark eyen Mary.—Utom 4:36, 37; Colossae 4:10.

Mark ama ewet ke Gospel esie ete ke okoneyo oro ẹkemụmde Jesus, akparawa kiet emi ekesịnede ọfọn̄ linen “ofụk iferi” ama odu do. Ke ini mme asua ẹkemụmde Jesus, Mark ama ewet ete ke akparawa oro ama efehe. Afo ekere ke anie ekedi akparawa oro?— Ke akpanikọ ekeme ndidi Mark! Ntem, ke ini Jesus ye mme apostle esie ẹkedahade okoneyo oro, Mark ama esịne ọfọn̄idem itọk itọk etiene mmọ.—Mark 14:51, 52.

Mark ama enyene ifet ndisan̄a ye ikọt Abasi onyụn̄ okụt mme akpan uduak Abasi ẹsude. Etie nte enye ama odu ke ini ẹken̄wan̄ade edisana spirit ẹduọk mme mbet ke Pentecost 33 E.N., ndien enye ama ekpere mme anam-akpanikọ asan̄autom Abasi idem, utọ nte Peter. Edi enye ama asan̄a n̄ko ye Barnabas eyen eyeneka ete esie emi akan̄wamde Saul ke ndimen enye n̄wụt Peter ke n̄kpọ nte isua ita ẹma ẹkebe tọn̄ọ nte Jesus okowụt Saul idem ke n̄kukụt. Ediwak isua ke ukperedem, Barnabas ama aka Tarsus okoyom Saul.—Utom 9:1-15, 27; 11:22-26; 12:25; Galatia 1:18, 19.

 Ke isua 47 E.N., ẹma ẹmek Barnabas ye Saul ndinam utom isụn̄utom. Mmọ ẹma ẹmen Mark ẹdian idem, edi Mark ama ọkpọn̄ mmọ afiak ọnyọn̄ Jerusalem, ndien Bible itịn̄ke ntak emi enye ọkọnyọn̄de. Saul emi enyịn̄ Rome esie edide Paul, ama ayat esịt. Ndien Paul ikefreke akwa ndudue oro Mark akanamde.—Utom 13:1-3, 9, 13.

Ke ini mmọ ẹkenyọn̄de isan̄ isụn̄utom mmọ ẹdi, Paul ye Barnabas ẹma ẹbụk mme utịbe utịbe n̄kpọ oro mmọ ẹkenamde. (Utom 14:24-28) Ọfiọn̄ ifan̄ ke ukperedem, mmọ mbiba ẹma ẹdiomi ndifiak n̄ka n̄kese mbufa mbet oro mmọ ẹkekwọrọde ikọ ẹnọ. Barnabas ama oyom ndida Mark ndian idem, edi ndi ọmọfiọk se Paul ekekerede?— Enye “ikekereke ite ọfọn” mmimọ ida Mark sia enye ama ọkọkpọn̄ mmimọ afiak ọnyọn̄ ufọk. Se iketịbede ke oro ebede ama anam Mark ofụhọ!

“Ọkpọsọn̄ ibụmede iyatesịt” ama etịbe, anamde Paul adian̄ade nsan̄a ye Barnabas. Barnabas ama emen Mark osio aka ukwọrọikọ ke Cyprus, ndien Paul ama emen Silas aka ndise mbufa mbet nte mmọ ẹkediomide. Anaedi ama abiak Mark ndikanam Paul ayat esịt ye Barnabas!—Utom 15:36-41.

Nnyịn ifiọkke se ikanamde Mark afiak ọnyọn̄ ufọk. Etie nte enye ama enyene eti ntak emi akanamde enye ọnyọn̄. Ke idaha ekededi, Barnabas ama enen̄ede enịm ke utọ n̄kpọ emi iditịbeke aba. Ikonyụn̄ itịbeke aba. Mark ikafiakke inyọn̄ aba! Ke ukperedem, enye ye Peter ẹma ẹnam utom isụn̄utom ke Babylon emi  okoyomde usụn̄ ọkpọn̄ Jerusalem. Peter ama etie do ọnọ ekọm onyụn̄ adian ke ekọm oro ete: “Mark, eyen mi, ete n̄kọm mbufo.”—1 Peter 5:13.

Nso n̄kpet-n̄kpet itie ebuana ke Peter ye Mark ẹkenyene ntem ke ntak mmọ ẹkekponode Abasi! Imekeme ndikụt emi n̄ko ke ini ikotde Gospel Mark. Do Mark ewet mme n̄kpọ oro Peter okokụtde ke enyịn. Ke uwụtn̄kpọ, se se Mark ekewetde aban̄a oyobio oro eketịbede ke Inyan̄ Galilee. Mark ama ewet aban̄a ebiet emi Jesus akanade ke ubom oro ye se enye akadade odori ibuot, kpa mme n̄kpọ oro Peter emi edide ọkọiyak ọkọfiọkde. Men Bible di yak ikot Matthew 8:24; Mark 4:37, 38; ye Luke 8:23.

Ke ukperedem, ke ini Paul okodude ke ufọk-n̄kpọkọbi ke Rome, enye ama otoro Mark ke un̄wam oro enye ọkọnọde imọ. (Colossae 4:10, 11) Ndien ke ini ẹkefiakde ẹsịn Paul ke ufọk-n̄kpọkọbi, enye ama ewet leta ọnọ ẹsọk Timothy onyụn̄ ọdọhọ enye asan̄a ye Mark edi. Paul ama anam an̄wan̄a ete: “Koro enye ọfọn ye ami ke ndisan̄a utom.” (2 Timothy 4:11) Ke akpanikọ, Mark ama enyene ikpọ ifetutom sia enye mîkakpaha mba!

[Ikọ Idakisọn̄]

Mme mbụme:

○ Mark okodụn̄ ke m̀mọ̀n̄, ndien ntak emi afo ọkpọdọhọde ke enye ama ọfiọk Jesus?

○ Anie ekenen̄ede an̄wam Mark?

○ Nso ikpakanam Mark akpa mba?

○ Nnyịn isan̄a didie ifiọk nte ke apostle Paul ama edima Mark ke akpatre?

[Ndise ke page 25]

Anie ke akparawa emi ekpedi? Nso inam enye, ndien ntak-a?

[Ndise ke page 26]

Nso mme edidiọn̄ ke Mark ekenyene ke ntak emi enye mîkakpaha mba?