Emui Natudia Hadibaia

Mareko be Ena Hesiai Gaukara Ia Rakatania Lasi

MAREKO be Baibel bukana ta ia torea tauna, bona unai buka lalonai Iesu ena sivarai ia gwauraia. Unai buka ena karoa be momo lasi bona duahia totona be auka lasi. Mareko be daika? Ia be Iesu ia diba, eiava?⁠​—⁠​ * Mareko ese ia davaria hahetoho bona Keristani hesiai gaukara ia rakatania lasi ena badina ita itaia.

Inai ladana, Mareko, be Kara 12:12 ai ia hedinarai. Hegeregere, King Heroda Agripa ese aposetolo Petero be dibura ruma ai ia atoa, bona hanuaboi ta ai, aneru ta ese Petero be dibura ruma amo ia hakaua raka-lasi. Bona maoromaoro, Petero be Maria ena ruma, Ierusalema dekenai ia lao. Ia be Mareko ena sinana. Unai be Pasova 33 C.E. ai Iesu idia hamasea bena lagani ten murinai ia vara.​​—⁠Kara 12:​1-5, 11-​17.

Oi diba dahaka dainai Petero be Maria ena ruma dekenai ia lao, a?​​—⁠ Reana badina Petero be Maria ena bese ia diba, bona ia diba Iesu ena hahediba taudia be Maria ena ruma dekenai hebou idia karaia. Mareko ena kasin Banaba be lagani daudau lalonai, reana Pentekoste 33 C.E. amo hahediba gaukara ia karaia. Baibel ese ia hahedinaraia, unai negai Banaba be harihari gauna ta ia henia, hahediba taudia matamatadia durua totona. Unai dainai, reana Iesu be Banaba bona Banaba ena varavara​—⁠Maria bona Mareko​—⁠ia diba.​​—⁠Kara 4:​36, 37; Kolose 4:​10.

Evanelia bukana Mareko ia gwau, Iesu idia dogoatao hanuaboina ai, uhau tauna ta ia noho bona ia be “rami sibona mo ia kwatua.” Ma ia gwau, Iesu ena inai taudia be unai uhau tauna idia dogoatao gwauraia neganai “ia heau.” Unai uhau tauna be daika?​​—⁠ Oibe, reana ia be Mareko! Pasova aria ia ore hanuaboina ai, Iesu bona ena aposetolo taudia be ruma idia rakatania neganai, reana Mareko be rami o dabua ta sibona ia karaia bona idia ida ia lao.​​—⁠Mareko 14:​51, 52.

Momokani, Mareko be nega momo Dirava ena hesiai taudia ida ia hebou, bona Dirava ena ura idia harorolaia hebou. Dirava ese ena lauma helaga be Pentekoste 33 C.E. ai ia bubua neganai, reana Mareko danu be unai negai ia noho, bona ia be Dirava ena abidadama hesiai taudia, hegeregere Petero ia bamoa momo. To danu, Mareko be ena kasin Banaba ia bamoa. Saulo be matahanai lalonai Iesu ia itaia bena lagani toi mai kahana murinai, Banaba ena heduru dainai Saulo be Petero ia diba. Lagani haida murinai, Banaba be Taso hanua dekenai ia lao, Saulo ia itaia totona.​​—⁠Kara 9:​1-​15, 27; 11:​22-​26; 12:25; Galatia 1:​18, 19.

Lagani 47 C.E. ai, Banaba bona Saulo be misinari gaukara idia karaia neganai, Mareko  idia hakaua danu. To gabeai, Mareko be idia ruaosi ia rakatania bona Ierusalema dekenai ia giroa lou. Baibel ese Mareko ia giroa lou ena badina ia gwauraia lasi. Saulo (Roma dekenai ena ladana idia gwauraia Paulo) be Mareko ena kara ia moalelaia lasi. Saulo be Mareko ia karaia karana ia laloaboio lasi, badina ia laloa unai be gau maragina lasi.​​—⁠Kara 13:​1-3, 9, 13.

Paulo bona Banaba be edia misinari laolao amo idia giroa lou neganai, edia gaukara ai ia vara sivarai namona idia herevalaia. (Kara 14:​24-​28) Hua haida murinai, Paulo bona Banaba be palani idia karaia do idia giroa lou bona guna idia haroro gabudia ai, hahediba taudia matamatadia idia vadivadi henia totona. Banaba ia ura Mareko be idia danu do ia lao be namo, to Paulo ena lalohadai be edena bamona?​​—⁠ “Paulo ia laloa, [Mareko] idia abia lao be namo lasi,” badina Mareko be guna idia ia rakatania bona ena noho gabuna dekenai ia giroa lou. To, gabeai ia vara gauna ese reana Mareko ena lalona ia hahisia!

Paulo bona Banaba be “idia hepapahuahu bona idia parara.” Banaba be Mareko ia abia bona Kupro dekenai idia lao haroro totona, bona Paulo ese Sila ia abia hidi bona guna ia palani gabuna dekenai idia lao, hahediba taudia matamatadia idia vadivadi henia lou totona. Reana Mareko be ia lalohisihisi bada badina ia dainai Paulo bona Banaba huanai hepapahuahu ia vara!​​—⁠Kara 15:​36-​41.

Matamanai Mareko be ena noho gabuna dekenai ia giroa lou ena badina be ita diba lasi. Reana Mareko ia laloa badina namona ta dainai ia giroa lou be namo. Herevana unai ena badina be dahaka, to Banaba ia diba momokani Mareko be unai bamona do ia karaia lou lasi. Bona Banaba ena hereva be momokani. Mareko be ena hesiai gaukara ia rakatania  lasi! Gabeai, Mareko bona Petero be gabu daudau ta, Babulonia dekenai misinari gaukara idia karaia. Unuseniai, Petero be hanamoa herevadia ia siaia neganai, ia gwau: “Lauegu natuna Mareko danu ese umui ia hanamoa noho.”​​—⁠1 Petero 5:​13.

Petero bona Mareko be tura namodia! Evanelia Bukana Mareko ita duahia neganai, unai do ita hamomokania. Mareko be Petero ena amo ia kamonai gaudia momo ia torea. Hegeregere, Galilea Gohuna ai medu, lai bada, bona hurehure ia vara ena sivarai oi laloa. Bouti ai Iesu be edeseniai ia mahuta bona dahaka latanai ia hekure be Mareko bukana ese ia gwauraia hedinarai namo herea, reana unai be haoda tauna Petero ese ia itaia gaudia. Unai ita hamomokania totona, namona be Mataio 8:​24; Mareko 4:​37, 38; bona Luka 8:​23 ita duahia bona ita hahegeregeredia.

Gabeai, Paulo be Roma ena dibura ruma ai ia noho neganai, ia ese Mareko ena heduru dainai ia tanikiu henia. (Kolose 4:​10, 11) Bona Paulo be unai dibura ruma ai idia atoa lou neganai, ia ese Timoteo ia tore henia bona ia gwau: “Mareko do oi abia, bona umui ruaosi lau dekenai do umui mai, badina be ia ese egu gaukara do ia durua diba.” (2 Timoteo 4:​11) Momokani, Mareko be ena hesiai gaukara ia rakatania lasi to dala idauidau ai Dirava ena hesiai gaukara ia karaia dainai hahenamo momo ia abia!

Henanadai Haida:

○ Mareko be edeseniai ia noho, bona dahaka dainai oi gwau ia be Iesu ia diba?

○ Daika ese Mareko ia durua?

○ Dahaka dainai Mareko be ena hesiai gaukara ia rakatania?

○ Edena bamona ita diba Mareko be gabeai aposetolo Paulo ese ia lalonamo henia?

[Footnote]

[Picture on page 25]

Uhau tauna be daika? Dahaka ia vara ia dekenai, bona dahaka dainai?

[Picture on page 26]

Mareko be ena hesiai gaukara ia rakatania lasi dainai, dahaka hahenamo ia abia?