Longa Wan’aku

Maku Kayoya ko

UNA nkanda nyá miyikanga oma ma zingu kia Yesu, Maku umosi kasoneka. Nkand’andi wankufi yo leboka muna tanga. Maku nani kakala? Nga obanzanga vo Maku wazaya Yesu?​—⁠ *Tala ntota zabwila Maku y’ekuma kayoyela ko muna salu kia Kikristu.

E nkumbu antete keyikwanga e Maku muna Nkand’a Nzambi i ntangwa ina Ntinu Erodi Angeripa kasia Petelo wa ntumwa mu pelezo. Vava mbasi kavaikisa Petelo muna pelezo muna fuku, vana vau wayenda kuna nzo a Maria, wa ngw’andi a Maku muna Yerusaleme. Tuka Yesu kavondelwa muna Nduta ya mvu wa 33 wa Tandu Kieto, mvu kumi miavioka i bosi Petelo kasiwa yo vaikiswa mu Pelezo.​—⁠Mavangu 12:​1-5, 11-17.

Nga zeye ekuma Petelo kayendela kuna nzo a Maria?​—⁠Nanga wazaya esi nzo andi yo sungamena vo alongoki a Yesu kwakuna bakutakaninanga. Banaba wa ngudi ankazi a Maku wakituka se nlongoki muna Nkinzi a Pentekosti ya mvu wa 33 wa Tandu Kieto. Lukau lwa mvevo kavana muna kolo kiakina mu sadisa alongoki ampa lwasonama muna Nkand’a Nzambi. Yesu nanga wazaya Banaba yo Maria wa ngudi a Maku.​—⁠Mavangu 4:​36, 37; Kolosai 4:10.

Muna Nsangu Zambote kasoneka, Maku wayika vo muna fuku una wakangama Yesu, toko dimosi ‘diayizinga nlele a lino’ wakala vo. Vava atantu bakanga Yesu, Maku wasoneka vo toko diadi watina. Nani obenze i toko diadi?​—⁠Elo, nanga i Maku! Muna fuku wauna vava Yesu y’alongoki andi bayenda, Maku wayizinga nlele yo kubalanda.​—⁠Maku 14:​51, 52.

Dialudi, Maku mambu mayingi kamona makumika kimwanda kiandi. Vava mwand’avelela wabungulwa kina kia Pentekosti ya mvu a 33 wa Tandu Kieto, wakala vana. Wakala mpe kumosi ye selo ya kwikizi ya Nzambi nze Petelo. Wakangala mpe kumosi yo Banaba wa ngw’andi ankazi ona wasadisa Saulu muna kunsunzula kwa Petelo vioka mvu ntatu vava Yesu kamoneka kwa Saulu muna mona-meso. I bosi, Banaba wafilwa kuna Taso mu kwenda wanana yo Saulu.​—⁠Mavangu 9:​1-15, 27; 11:​22-26; 12:25; Ngalatia 1:​18, 19.

 Muna mvu a 47 wa Tandu Kieto, Banaba yo Saulu basolwa se missionário. Muna nkangalu au antete banata Maku, kansi Maku wabasisa yo vutuka kuna Yerusaleme mu kuma kilembi zayakana. O Saulu ona wayikilwanga kwa esi Roma vo Paulu, wafunga makasi. Kaveza ko dina kavanga Maku, kadi wabadikila dio nze sumu diampwena.​—⁠Mavangu 13:​1-3, 9, 13.

Vava bavutuka muna nkangalu au wa salu kia missionário, Paulu ye Banaba basamuna nluta babaka muna salu kiau. (Mavangu 14:​24-​28) Vioka ngonde, yau awole bakubama mu kwenda kingula diaka alongoki ampa ana batambulwila e nsangu zambote. Banaba wazola vo banata Maku, kansi ozeye dina kayindula Paulu?​—⁠“Kabanzìdi wo wansongi ko” kadi Maku wateka kubasisa yo vutuka kuna nzo andi. Dina diabwa diakendeleka kikilu Maku!

Muna kuma kia makasi, ‘vabwa ntatani,’ i bosi Paulu yo Banaba bavambana. Banaba onete Maku, bayenda samuna nsangu zambote kuna Kupero, o Paulu osolele Sila, nze una kateka kubika bayenda kingula alongoki ampa. Kieleka, Maku nkenda kamona wau katwasa e ntatani kwa Paulu ye Banaba!​—⁠Mavangu 15:​36-41.

Ka tuzeye ko ekuma Maku kavutukila kuna nzo andi muna nkangalu au antete. Nanga kuma kiasikila kakala kiau mu kubasisa. Banaba wakala y’eziku vo ediadi ke disinga vangama diaka ko. Walunga kwandi. Maku kayoya ko, muna mvu mialanda wasala se missionário kumosi ye Petelo kuna Babele.  Vava Petelo katuma mavimpi kw’ampangi, wakudikila vo: ‘Yo Maku mpe, wa mwan’ame.’​—⁠1 Petelo 5:13.

Ekwe ngwizani ambote bakala yau Petelo yo Maku ekolo basadilanga Nzambi kumosi! E ziku kia diambu diadi kitoma monekanga vava tutanganga nsangu zambote kasoneka Maku. Maku wasoneka mana kanzayisa Petelo mu kuma kia Yesu. Kasikil’owu, tezanesa nsangu za tembwa muna Mbu a Ngalili. Maku mambu mayingi kasoneka, mena vo Petelo wa mbaki a mbizi za maza kaka wadi mo mona, nze ekuma ye fulu kalekela Yesu muna nzanza. Nga ke diambote ko twazaya e ziku kia diambu diadi muna tanga yo tezanesa nsangu zazi muna Matai 8:24; Maku 4:​37, 38 ye Luka 8:23?

Kuna kwalanda, vava Paulu kasiwa mu pelezo kuna Roma, wasanisina Maku mu kuma kia lusadisu lwandi. (Kolosai 4:​10, 11) Vava Paulu kasiwa diaka mu pelezo, wasonekena Timoteo yo kunlomba kanata Maku, wavova vo: “Mfunu imvwidi muna kunsadila.” (2 Timoteo 4:​11) Kieleka, wau vo kayoya ko, Maku elau diampwena dia salu kakala diau!

Yuvu:

O Maku akweyi kazingilanga?Ekuma tulenda vovela vo nanga wazaya Yesu?

Nani wasadisa Maku?

Adieyi diadi fila Maku mu yoya muna sadila Nzambi?

Aweyi tuzayidi wo vo Maku kuna kwalanda watondwa diaka kwa Paulu?

[Mvovo Vana Yand’a lukaya]

[Foto ina muna lukaya lwa 31]

Etoko diadi nani? Nkia diambu dimbwididi? Ekuma?

[Foto ina muna lukaya lwa 32]

O Maku nkia nsambu katambula wau kalembi yoya?