MAREKA o ngwadile e nngwe ya dipuku tše nne tša Beibele tša mabapi le bophelo bja Jesu. Ke e kopana e bile e balega gabonolo kudu. Mareka e be e le mang? Na o nagana gore o be a tseba Jesu?— * Anke re bone gore ke diteko dife tše thata tšeo Mareka a ilego a lebeletšana le tšona gomme re bone lebaka leo ka lona Mareka a sa kago a langwa go ba Mokriste.

Lekga la pele leo ka lona Mareka a bolelwago ka leina ka Beibeleng ke ka morago ga ge Kgoši Heroda Agaripa a lahletše moapostola Petro kgolegong. Bošegong bjo bjongwe morongwa o ile a lokolla Petro gomme kapejana o ile a ya legaeng la mmago Mareka e lego Maria, yo a bego a dula kua Jerusalema. Petro o lokollotšwe kgolegong mo e ka bago nywaga e lesome ka morago ga ge Jesu a bolailwe ka Paseka ya 33 C.E.—Ditiro 12:1-5, 11-17.

Na o a tseba gore ke ka baka la’ng Petro a ile a ya legaeng la Maria?— Mohlomongwe ka gobane o be a tseba ditho tša lapa la Maria le gore barutiwa ba Jesu ba be ba swarela diboka lagaeng la gagwe. Baranaba, e lego motswala wa Mareka, o be a šetše a e-na le nako e telele e le morutiwa, bonyenyane ga e sa le go tloga ka monyanya wa Pentekoste ya 33 C.E. Beibele e bolela ka go nea ga gagwe barutiwa ba bafsa dimpho ka nako yeo. Ka gona Jesu a ka ba a be a tseba Baranaba le motswala’gwe e lego Mareka gotee le mmago Mareka e lego Maria.—Ditiro 4:36, 37; Bakolose 4:10.

Ka Ebangeding ya gagwe, Mareka o ngwadile gore bošegong bjoo Jesu a swerwego ka bjona, go be go e-na le lesogana leo le bego le apere kobo ya ka godimo feela “mmeleng o hlobotšego.” Mareka o ngwadile gore ge manaba a be a swara Jesu, lesogana leo le ile la tšhaba. O nagana gore lesogana leo e ka ba e be e le mang?— Ee, mohlomongwe e be e le Mareka! Ka gona ge Jesu le baapostola ba gagwe ba be ba tloga bošegong bjoo, Mareka mo gongwe o ile a apara kobo ya gagwe ka go akgofa gomme a ba latela.—Mareka 14:51, 52.

Ka kgonthe Mareka o bile le dibaka tše dintši tša go tlwaelana le bahlanka ba Modimo le go bona ditiragalo tša bohlokwa tše di tswalanago le morero wa Modimo. Mohlomongwe o be a le gona ge moya o mokgethwa o be o tšhollwa ka Pentekoste ya 33 C.E., gomme a tlwaelane kudu le bahlanka ba Modimo ba botegago ba bjalo ka Petro. Le gona o ile a sepela le motswala’gwe e lego Baranaba, yo a ilego a thuša Saulo ka go mo tsebiša go Petro mo e ka bago nywaga e meraro ka morago ga ge Jesu a iponagaditše go Saulo ponong. Nywaga e mentši ka morago, Baranaba o ile a ya Tareso e le gore a yo hwetša Saulo moo.—Ditiro 9:1-15, 27; 11:22-26; 12:25; Bagalatia 1:18, 19.

 Ka 47 C.E. Baranaba le Saulo ba ile ba kgethelwa modiro wa boromiwa. Ba ile ba sepela gotee le Mareka eupša ka mabaka a itšego a sa tsebjego, Mareka ka morago o ile a ba tlogela gomme a boela gae Jerusalema. Saulo, yo a ilego a tsebja ka leina la gagwe la Seroma la Paulo, o be a befetšwe. Le gona ga se a ka a hlokomologa seo a bego a nagana gore ke go palelwa o šoro ga Mareka.—Ditiro 13:1-3, 9, 13.

Ge Paulo le Baranaba ba be ba boa leetong la bona la boromiwa ba ile ba bega go atlega mo gobotse. (Ditiro 14:24-28) Dikgwedi ka morago, bobedi bjo bo ile bja rulaganya go boela le go etela barutiwa ba bafsa dinageng tšeo ba ilego ba bolela le batho ka Beibele go tšona. Baranaba o be a nyaka go sepela le Mareka, eupša na o a tseba gore Paulo o be a nagana’ng?— “O be a sa nagane gore ke mo go swanetšego” ka gobane pejana Mareka o be a ile a ba tlogela a ya gae. Se se ilego sa direga ka morago se ile sa nyamiša Mareka!

Ba ile ba galefelana kudu gomme ka morago ga “ngangišano e bogale,” Paulo le Baranaba ba ile ba arogana. Baranaba o ile a sepela le Mareka go ya go bolela le batho ka Beibele kua Tsipero gomme Paulo a kgetha go sepela le Silase go ya go etela barutiwa ba bafsa gape go etša ge ba be ba rulagantše bjalo. Ruri Mareka o swanetše go ba a ile a kwa bohloko ka baka la go baka phapano magareng ga Paulo le Baranaba!—Ditiro 15:36-41.

Ga re tsebe lebaka leo ka lona pejana Mareka a ilego a tloga a ya gae. Mohlomongwe a ka ba a be a nagana gore lebaka la gagwe le a kwagala. Go sa šetšwe gore lebaka e be e le lefe, Baranaba o be a kgodišegile gore seo se ka se sa direga gape. O be a nepile. Mareka ga se a ka a langwa! Ka morago o  ile a ba moromiwa gotee le Petro nageng ya kgole ya Babilona. Ge ba le moo, Petro o ile a romela ditumedišo gomme a oketša ka gore: “Gomme le Mareka morwa wa-ka o a le dumediša.”—1 Petro 5:13.

Ruri Petro le Mareka ba swanetše go ba ba ile ba ba le tswalano e tiilego ge ba be ba hlankela Modimo! Seo se bonagala gape ge re bala Ebangedi ya Mareka. Ka Ebangeding yeo, Mareka o hlalosa dilo ka go lebanya kamoo Petro a di bonego ka gona. Ka mohlala, bapiša dipego tša ledimo leo le ilego la tsoga Lewatleng la Galilea. Mareka o tlaleletša ka go bolela gore Jesu o be a robetše kae ka sekepeng le gore o be a robetše godimo ga eng, e lego dilo tšeo morei wa dihlapi yo a swanago le Petro a bego a ka di lemoga. Ke ka baka la’ng re sa itlhatselele se ka go bala gotee dipego tše tša Beibele tše di lego go Mateo 8:24; Mareka 4:37, 38; le Luka 8:23 le go di bapiša?

Ka morago ge Paulo a be a golegilwe kua Roma, o ile a reta Mareka ka baka la go mo thekga ga gagwe ka potego. (Bakolose 4:10, 11) Le gona ge Paulo a be a golegilwe moo gape, o ile a ngwalela Timotheo gomme a mo kgopela gore a tle le Mareka, a hlalosa gore: “O nkhola bodireding.” (2 Timotheo 4:11) Ruri Mareka o thabetše ditokelo tše dikgolo tša tirelo ka gobane ga se a ka a langwa!