MARKUS ben skrifi wan fu den fo Bijbel buku di e taki fu a libi fu Yesus. A de a moro syatu buku èn a moro makriki wan fu leisi fu ala den fo buku disi. Suma ben de Markus? Yu denki taki a ben sabi Yesus?— * Meki wi go luku sortu hebi tesi Markus ben kisi èn frustan fu san ede Markus noiti no tapu fu de wan Kresten.

A fosi leisi di wi e leisi fu Markus na ini Bijbel de baka di Kownu Herodes Agrepa poti na apostel Petrus na strafu-oso. Wan neti, wan engel fri Petrus, èn wantewante Petrus ben go na a oso fu a mama fu Markus. A mama fu Markus ben nen Maria èn a ben e libi na ini Yerusalem. Petrus ben lusu fu strafu-oso tin yari baka di den ben kiri Yesus na a Paskafesa fu 33 G.T.—Tori fu den Apostel 12:1-5, 11-17.

Yu sabi fu san ede Petrus ben go na a oso fu Maria?— Kande fu di a ben sabi wan tu memre fu na osofamiri fu Maria èn a ben sabi tu taki den disipel fu Yesus ben e hori konmakandra drape sosrefi. Barnabas, wan omu pikin fu Markus, ben de wan disipel kaba sensi a pisi ten fu a Pinksterfesa fu 33 G.T. Na ini Bijbel wi kan leisi fu a fasi fa a ben lobi fu yepi den nyun disipel na moni sei. Sobun, Yesus ben kan sabi Barnabas, èn Maria a tanta fu en, èn sosrefi Markus, a manpikin fu Maria.—Tori fu den Apostel 4:36, 37; Kolosesma 4:10.

Na ini na Evangelietori fu en, Markus ben skrifi dati na a neti di den srudati grabu Yesus, wan yonkuman ben de drape di ben weri soso wan fini linnen krosi „na tapu en sososkin”. Di den feanti ben grabu Yesus, dan a yonkuman disi ben lon gowe soleki fa Markus ben skrifi. Suma yu denki taki a yonkuman ben de?— Iya, a kan taki a ben de Markus! Sobun, di Yesus nanga den apostel fu en gowe latilati a neti dati, dan soleki fa a sori Markus ben weri wan krosi gawgaw, èn a ben go na den baka.—Markus 14:51, 52.

Markus ben de wan memre fu wan famiri di de anbegiman fu Yehovah. Kande a ben de drape di santa yeye kon na tapu den 120 disipel na a Pinksterfesa fu 33 G.T. A ben abi krosibei demakandra tu nanga getrow futuboi fu Gado, soleki Petrus. Ma a ben e go tu nanga Barnabas, a man di ben yepi Saulus fu miti nanga Petrus, sowan dri yari baka di Yesus ben kon na Saulus na ini wan fisyun. Wan tu yari baka dati, dan Barnabas ben go na Tarsus fu go suku Saulus drape.—Tori fu den Apostel 9:1-15, 27; 11:22-26; 12:25; Galasiasma 1:18, 19.

 Na ini 47 G.T., Barnabas nanga Saulus ben kisi a grani fu du zendelingwroko. Den ben tyari Markus go nanga den, ma baka wan pisi ten Markus ben gowe libi den èn a go baka na Yerusalem. Bijbel no e taki fu san ede a du dati. Saulus, di wi kon sabi bakaten leki Paulus, ben atibron srefisrefi. A no ben du leki a no si a sani di Markus ben du ma a ben si a sani dati leki wan seryusu fowtu.—Tori fu den Apostel 13:1-3, 9, 13.

Di den drai kon baka fu a preikiwaka fu den, dan Paulus nanga Barnabas ben taki fu den moi sani di den ben ondrofeni na ini a diniwroko (Tori fu den Apostel 14:24-28). Wan tu mun baka dati, den tu man disi bosroiti fu go baka fu gi den nyun disipel deki-ati. Barnabas ben wani tyari Markus go nanga en, ma yu sabi san Paulus ben taki fu a tori disi?— A ’no ben feni en bun’ bika Markus ben gowe libi den kaba wan leisi fu go na oso. San pasa baka dati ben meki Markus sari trutru!

Paulus nanga Barnabas ben atibron èn den ben „kisi bun bigi trobi”, èn dati meki taki ibriwan fu den go den eigi pasi. Barnabas ben tyari Markus go nanga en na Siprus fu go preiki, èn Paulus ben teki Silas fu go fisiti den nyun disipel soleki fa den ben wani du kaba. A ben musu hati Markus so te, fu si taki na en ben meki Paulus nanga Barnabas kisi trobi!—Tori fu den Apostel 15:36-41.

Wi no sabi fu san ede Markus ben go na oso a fosi leisi di a ben de nanga Paulus èn nanga Barnabas. Ma a kan taki a ben abi wan bun reide. Awinsi fa a no fa, Barnabas ben de seiker taki Markus no ben o gowe libi en moro. A ben abi leti, fu di  Markus no gowe moro! Bakaten a ben du zendelingwroko nanga Petrus tu te na Babilon. Fu drape, Petrus ben seni odi kon èn a ben taki tu: „Markus mi manpikin, e seni taki unu odi tu.”—1 Petrus 5:13.

Disi e sori taki Petrus nanga Markus ben de leki trutru brada di ben anbegi Gado makandra. Wi kan leisi fu disi tu na ini na Evangelietori fu Markus. Drape wi e leisi fu den sani di Petrus fruteri Markus fu a waka nanga libi fu Yesus. Meki wi teki fu eksempre den tori di e taki fu bigi winti di ben e wai na tapu a Se fu Galilea. Markus ben e taki fu den finifini tori soleki pe Yesus ben e sribi na ini a boto èn na tapu san a ben e sribi. Den sani dati na sani di wan fisiman leki Petrus ben o poti prakseri na tapu. Kon meki wi leisi den Bijbel tori disi gi wisrefi èn teki den gersi nanga makandra. Wi o leisi Mateyus 8:24; Markus 4:37, 38; nanga Lukas 8:23.

Bakaten, di Paulus ben de na strafu-oso na ini Rome, dan a ben prèise Markus fu di a ben horibaka gi en na wan getrow fasi (Kolosesma 4:10, 11). Di Paulus ben de na strafu-oso na ini Rome baka, dan a aksi Timoteyus fu tyari Markus kon na en, fu di a ben taki dati Markus man ’yepi en nanga a diniwroko’ (2 Timoteyus 4:11). Iya, Markus ben abi spesrutu grani na ini a diniwroko fu di a ben horidoro!