Ababelenga Ino Magazini Balepusha Ukuti

Cinshi Lesa Asuminishisha Ukuti Tulecula?

Lesa te walenga abantu ukulacula. Baibolo itila: “Cibe ukutali kuli Lesa ukucito bubifi!” (Yobo 34:10) Ninshi ni nani walenga abantu ukulacula?

Yesu atile Satana ni “kateeka wa pano calo.” (Yohane 14:30) Ca cine, Yehova e kateeka wapulamo uwa fibumbwa fyonse. Bukateeka bwakwe tabwakapwe. Lelo nangu cibe fyo, Lesa alisuminisha Satana ukuteeka abantu abengi pano calo pa nshita inono.—1 Yohane 5:19.

Bushe Satana ateeka shani abantu? Ukutula fye pantu alandiile na Efa, Satana alipayaula no kubepaika abantu. Alaleta sana amacushi pa bantu. Yesu ukwabula no kupita mu mbali atile: “Ulya ali ni nkomi ya bantu ilyo atendeke, kabili taiminine ndi mu cine, pantu muli wene tamwaba cine. Ilyo alanda ubufi, alanda ifya mu mutima wakwe, pantu wa bufi kabili e wishi wa bufi.” (Yohane 8:44) Yesu alandile no kuti abalefwaya ukumwipaya bali bana ba kwa Satana, inkomi ya kubalilapo. Ifyo balecita e fyalelanga ukutila bana ba kwa Satana. E filya batila umwana apala abafyashi bakwe imisango.

Na nomba Satana acili alasonga abantu ukuba ne mitima yabipa iyilenga baleipaya abanabo. Umfweni ifyalandile R. J. Rummel, profesa uwali pe sukulu lya University of Hawaii, ku U.S.A., alandile ukuti ukutula mu 1900 ukufika mu 1987, ubuteeko mu fyalo ifingi bwaipeye abantu napamo 169,198,000 mu fimfulunganya fya kupoka ubuteko, na mu nkondo sha bana calo. E lyo kwali na bo baleipaya apabula no mulandu nangu umo. Iminshipendwa bambi na bo bafwile mu nkondo shimbi muli iyi yine myaka.

Nga ca kuti Lesa talenga abantu ukulacula, cinshi asuminishisha ukuti balecula? Ni co paliba imilandu iyo Satana aimishe iyakuma ifibumbwa fyonse iifwile ukupwa. Alitwishike nampo nga ukuteka kwa kwa Lesa kusuma nelyo kubi. Natulandeko pa mulandu umo.

Kale sana ilyo Lesa abumbile fye abantu, Adamu na Efa balisumiine ifyo Satana abebele. Balikeene ukulatekwa na Lesa kabili basalilepo ukulaiteka abene, tabaishibe fye ukuti ni Kaseebanya e walebateeka.—Ukutendeka 3:1-6; Ukusokolola 12:9.

Apo Yehova tafyenga muntu, asuminishe ukuti papite inshita pa kuti icishinka cikeshibikwe. Cishinka nshi icaishibikwa fye apabuuta tuutu? Ca kutila ifi abantu baiteka abene no kulatungululwa na Satana mufuma fye amacushi. Lelo kwena fwe bantunse twalimwenamo ifi Lesa asuminisha ukuti papite inshita. Twamwenamo shani? Abamona ifishinka no kwishiba ukuti Satana tateka bwino abantu balasalapo ukulanga ukuti bena bafwaya ukulatekwa na Lesa. Abasambilila amafunde ya kwa Lesa no kulayakonka balikwata isubilo lya kwikala umuyayaya.—Yohane 17:3; 1 Yohane 2:17.

Ca cine ukutila pali ino nshita, Satana e uteeka icalo. Lelo amaka akwata ya pa nshita fye iinono. Nomba line fye Yehova ali no kubomfya Umwana wakwe ku ‘kubongolola imilimo ya kwa Kaseebanya.’ (1 Yohane 3:8) Yesu akakonka ifyo Lesa akamweba, no kuposha abacula ku mitima kabili akapwisha amafya yonse ayo abantu bakwata. Yesu akabuusha abantu abengi nga nshi abalecula kabili abafwile akale sana.—Yohane 11:25.

Filya Lesa abuushishe Yesu aletulanga fye ukuti alikwata amaka pali Kaseebanya—icalelangilila ukuti abafwaya ukuteekwa na Lesa bakabuuka. (Imilimo 17:31) Baibolo ilatulangilila bwino ifyo cikaba ilyo iyo nshita isuma ikafika. Itila: “Lesa umwine akaba pamo na [bantu]. Kabili akafuuta ifilamba fyonse ku menso yabo, ne mfwa tayakabeko kabili iyo, nangu kuloosha nangu kukuuta nangu kukalipwa tafyakabeko kabili iyo. Ifya ntanshi nafiya.”—Ukusokolola 21:3, 4.