Mbụme Oro Mme Andikot Ẹbụpde

Ntak Emi Abasi Ayakde Ndutụhọ Odu?

Idịghe Abasi anam ubonowo ẹbọ ndutụhọ. Bible ọdọhọ ete: “Nsa Abasi, enye idiọkke.” (Job 34:10) Anie ndien anam ubonowo ẹbọ ndutụhọ?

Jesus okokot Satan “andikara ererimbot emi.” (John 14:30) Edi akpanikọ nte ke Jehovah edi Akakan Andikara Ekondo. Enye edisụk edi Andikara Ekondo ke nsinsi. Edi Abasi amayak Satan akara n̄wakn̄kan ibat ubonowo ke esisịt ini.—1 John 5:19.

Nso utọ andikara ke Satan edi? Satan edi owotowo ye osu nsu toto ke akpa ini oro enye ekenyenede nneme ye owo. Satan emetịmede ubonowo ke akwa usụn̄. Jesus ọdọhọ ke Satan: “Ekedi owotowo ke ini ọkọtọn̄ọde, enye ikonyụn̄ isọn̄ọke ida ke akpanikọ, koro akpanikọ mîdụhe enye ke esịt. Ke ini enye osude nsu, enye etịn̄ etiene se isịnede enye ke esịt, koro enye edide osu nsu ye ete nsu.” (John 8:44) Jesus ama etịn̄ n̄ko ete ke mbon oro ẹkeyomde ndiwot imọ ekedi nditọ akpa owotowo oro, Satan. Mmọ ẹkedi nditọ esie koro mmọ ẹkenamde n̄kpọ nte enye. N̄ke kiet ọdọhọ ete, eyen mbiet ete.

Satan ke ananam ọdọn̄ mme owo ndiwot ekemmọ owo. Ke uwụtn̄kpọ, R. J. Rummel, akani prọfesọ ke Ufọkn̄wed Ntaifiọk Hawaii, U.S.A., ọdọhọ ke ọtọn̄ọde ke 1900 esịm 1987, ke nsio nsio ukara ẹwot owo 169,198,000 ke ini ẹyomde ndikpụhọ ukara, ke ini ẹsobode ofụri ekpụk, ye ke ini afai. Ibat emi isịneke ediwak miliọn owo oro ẹkewotde ke ekọn̄ ke ukem ini emi.

Edieke mîdịghe Abasi anam ubonowo ẹbọ ndutụhọ, ntak emi enye ayakde ndutụhọ odu? Ntak edi man ẹbiere eneni aban̄ade owo emi enyenede unen ndikara ye eneni oro aban̄ade se idide eti ye idiọk, emi ẹkedemerede ke ata ediwak isua emi ẹkebede. Ẹyak ineme kiet ke otu eneni emi.

Ke ntọn̄ọ ntọn̄ọ mbụk ubonowo, Adam ye Eve ẹkeda ye Satan. Mmọ ẹma ẹsịn ndisụk ibuot nnọ ukara Abasi ẹnyụn̄ ẹmek ndikara idemmọ, emi ke nditịm ntịn̄ ekedide ukara Devil.—Genesis 3:1-6; Ediyarade 12:9.

Jehovah ama ọfiọk ke inenke ndibiere eneni emi ye unana ediyak ekese ini ebe man ẹfiọk se idide akpanikọ. Nso idi utịp? Ukara owo emi Satan adade usụn̄ ada ndutụhọ edi. Ke akpanikọ, Abasi ndiyak ofụri anyan ini emi ebe edi ke ufọn ubonowo. Ntak idọhọde ntre? Mbon oro ẹkụtde uyarade ẹnyụn̄ ẹnịmde enye ke akpanikọ ẹnyene ifet ndiwụt ke mmimọ imoyom Abasi akara mmimọ. Mbon oro ẹkpepde se Abasi oyomde oto owo ẹnyụn̄ ẹdude uwem ẹkekem ye se mmọ ẹkpepde, ẹnyene idotenyịn edidu uwem ke nsinsi.—John 17:3; 1 John 2:17.

Ke akpanikọ, Satan akara ererimbot idahaemi. Edi emi idibịghike. Ibịghike, Jehovah ayada Eyen esie “abiat mme utom Devil.” (1 John 3:8) Abasi ọyọnọ Jesus ndausụn̄ ndinọ mbon oro esịt obụn̄ọde ndọn̄esịt ndinyụn̄ nsion̄o mme n̄kpọ oro ẹsinamde mme owo ẹtuan̄a mfep. Enye ayanam ediwak biliọn owo oro ẹkebọde ufen ẹnyụn̄ ẹkpan̄ade ke ediwak isua oro ẹkebede ẹset ẹfiak ẹdidu uwem ke isọn̄.—John 11:25.

Abasi ndikanam Jesus eset owụt ke Enye abiat mme utom Devil—ndien emi edi ata esisịt ke ẹmende ẹdomo ye se ẹdinamde ẹnọ mbon oro ẹmekde ndidu ke idak ukara Abasi. (Utom 17:31) Bible ada mme ikọ ndọn̄esịt emi owụt nte ini oro editiede, enye ọdọhọ ete: “Abasi ke idemesie oyonyụn̄ odu ye [ubonowo]. Ndien enye ọyọkwọhọde kpukpru mmọn̄eyet ke enyịn mmọ efep, n̄kpa idinyụn̄ idụhe aba, mfụhọ m̀mê ntuan̄a m̀mê ubiak idinyụn̄ idụhe aba. Mme akpa n̄kpọ ẹma ẹbe ẹfep.”—Ediyarade 21:3, 4.