Babadi ba Rena ba a Botšiša

Ke ka Baka La’ng Modimo a Dumelela Tlaišego?

Modimo ga a bakele batho tlaišego. Beibele e re: “Modimo ó kxolê le bokxôpô.” (Jobo 34:10) Ka gona, ke mang yo a bakago tlaišego?

Jesu o itše Sathane ke “mmuši wa lefase.” (Johane 14:30) Ke therešo gore Jehofa ke Mmuši wa Legohle. A ka se ke a nea yo mongwe boemo bjoo. Lega go le bjalo, Modimo o dumeletše Sathane go buša bontši bja batho ka nakwana.—1 Johane 5:19.

Sathane e bile mmuši wa mohuta mang? Ga e sa le go tloga ge a thoma go hlasela batho, Sathane e bile mmolai le moaketši. Sathane o baka tlhaka-tlhakano lekokong la batho ka ditsela tše di šiišago. Jesu o ile a mo latofatša ka matšu a: “Yena yoo e bile mmolai wa batho go tloga mathomong, gomme ga se a ka a ema a tiile therešong, gobane therešo ga e gona go yena. Ge a bolela maaka o bolela go ya ka tshekamelo ya gagwe, gobane ke moaketši le tatago maaka.” (Johane 8:44) Le gona, Jesu o itše banna bao ba bego ba nyaka go mmolaya e be e le bana ba mmolai wa mathomo. Ba itirile bana ba gagwe ka go itshwara bjalo ka yena. Se se dumelelana le seema se se rego: “Mmala wa kgomo o bonwa namaneng.”

Sathane o sa dutše a hlohleletša polao ka dipelong tša batho. Ka mohlala, R. J. Rummel, e lego moprofesara yo a rotšego modiro wa Yunibesithi ya Hawaii kua U.S.A., o akanyetša gore go tloga ka 1900 go fihla ka 1987, mebušo e fapa-fapanego e bolaile batho ba 169 198 000 nakong ya maiteko a go menola mebušo, dipolao tša molokwana-rite le go bolaya batho ka ntle le lebaka. Palo yeo ya batho ba bolailwego ga e akaretše batho ba dimilione tše dintši bao ba bolailwego dintweng ka yona nako yeo.

Ge e ba Modimo a sa bake tlaišego, ke ka baka la’ng a e dumelela? Ka gobane dipotšišo tšeo di kgomago dibopiwa ka moka tša legohle, tša mabapi le se se lokilego le se se fošagetšego, tšeo di ilego tša botšišwa kgale di swanetše go arabja. Anke re ahla-ahleng e tee feela ya tšona.

Mathomong a histori ya moloko wa batho, Adama le Efa ba ile ba ema le Sathane. Ba ile ba gana go bušwa ke Modimo gomme ba kgetha go ipuša, e lego seo ge e le gabotse e bego e le go bušwa ke Diabolo.—Genesi 3:1-6; Kutollo 12:9.

Tekanyetšo ya Jehofa ya toka e be e nyaka gore go dumelelwe gore go fete nako e ntši e le gore go be le bohlatse. Phetho e lego molaleng ke efe? Pušo ya batho ka tlase ga tutuetšo ya Sathane e tliša tlaišego feela. Ge e le gabotse, go dumelela ga Modimo nako gore e fete go hotše batho. Bjang? Bao ba ithutago bohlatse e bile ba bo dumela ba na le sebaka sa go bontšha go ikemišetša ga bona go bušwa ke Modimo. Bao ba ithutago ditekanyetšo tša Modimo gomme ba phela ka go dumelelana le tšona ba na le tebelelo ya bophelo bjo bo sa felego.—Johane 17:3; 1 Johane 2:17.

Ke therešo gore ga bjale lefase le sa dutše le le ka tlase ga taolo e kgopo ya Sathane. Eupša go ka se be bjalo ka nako e telele. Kgaufsinyane Jehofa o tla diriša Morwa wa gagwe go “fediša mediro ya Diabolo.” (1 Johane 3:8) Ka tlase ga tlhahlo ya Modimo, Jesu o tla fodiša dipelo tše di robegilego le go tsošološa maphelo a sentšwego. O tla tsoša batho ba dimilione tše dikete bao ba ilego ba tlaišega le bao ba hwilego go theoša le nywaga-kgolo gore ba tle ba phele mo lefaseng.—Johane 11:25.

Tsogo ya Jesu ke mohlala wa go fenya ga Modimo mediro ya Diabolo—pontšho ya seo se letetšego batho bao ba kgethago pušo ya Modimo. (Ditiro 17:31) Beibele e lebiša megopolo ya rena nakong yeo e tlago ka mantšu a a homotšago a rego: “Modimo ka noši o tla ba le bona. O tla phumola megokgo ka moka mahlong a bona, gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona. Dilo tša pele di fetile.”—Kutollo 21:3, 4.