Bann pwen enteresan dan liv Lik
Parol Zeova i vivan
Bann pwen enteresan dan liv Lik
LEVANZIL Matye i ganny rekonnet konman en liv ki’n ganny ekrir prensipalman pour bann Zwif, e Levanzil Mark pour bann ki pa ti Zwif. Me Levanzil Lik in ganny ekrir pour dimoun sorti dan tou nasyon. Sa liv ki’n ganny ekrir apepre lannen 56-58 N.L., i donn tou detay lo lavi ek minister Zezi.
Lefet ki Lik ti en bon dokter ki ti enterese avek dimoun, i ti “egzamin byen tou sa ki’n arive depi okonmansman,” e son resi i kouver bann keksoz ki’n arive pandan 35 an. Depi lannen 3 A.N.L. ziska lannen 33 N.L. (Lik 1:3) Ou kapab trouv preski 60 poursan lenformasyon dan Levanzil Lik ki ou pa pou vwar dan lezot Levanzil.
O KONMANSMAN SON MINISTER
Apre ki i ti’n fini donn bann detay lo nesans Zan-Batis ek Zezi, Lik i dir nou ki Zan ti konmans son minister dan kenzyenm lannen ki Tiber Sezar ti pe gouvernen, savedir okonmansman lannen 29 N.L. (Lik 3:1, 2) Zan ti batiz Zezi ver lafen lannen 29 N.L. (Lik 3:21, 22) Apartir lannen 30 N.L., ‘Zezi ti retourn Galile e konmans ansennyen dan bann sinagog.’—Lik 4:14, 15.
Zezi ti konmans prese pour premye fwa an Galile. I ti dir lafoul: “Mon bezwen anons Bonn Nouvel konsernan Rwayonm Bondye dan bann lezot lavil osi.” (Lik 4:43) Lo sa vwayaz i ti anmenn Simon ki ti en peser ek lezot ansanm avek li. I ti dir: Apartir ozordi “ou pou lapes zonm!” (Lik 5:1-11; Mat. 4:18, 19) Lo son dezyenm vwayaz pour al prese an Galile sa douz zapot ti avek Zezi. (Lik 8:1) E lo son trwazyenm vwayaz, i ti anvoy sa 12 zapot pour “pres Rwayonm Bondye e geri bann malad.”—Lik 9:1, 2.
Larepons pour bann kestyon lo Labib:
1:35—Eski sa ovil dan zover Mari ti annan okenn rol pour zwe dan son lansentman? Pour ki zanfan Mari i vin en vre desandans Abraam, Zida ek David, parey Bondye ti’n promet, son ovil ti bezwen ganny servi pour li kapab tonm ansent. (Zen. 22:15, 18; 49:10; 2 Sam. 7:8, 16) Me Zeova ti osi servi son lespri sen pour kapab transmet sa lavi parfe son Garson e pour fer Mari kapab tonm ansent. (Mat. 1:18) Sirman sa ti retir tou lenperfeksyon ki Mari ti annan dan son ovil, e depi o konmansman sa ti anpes sa anbriyon ki ti pe devlope ganny ekspoze avek okenn danze.
1:62—Eski Zekarya ti vin koz pa e sourd? Non. I ti zis pa kapab koze. Serten ti “fer siny” pour demann li ki mannyer i ti a kontan son piti i apele, me sa pa vedir ki Zekarya ti sourd. I tre probab ki i ti tande ki mannyer son madanm ti anvi apel zot garson. Petet serten ti fer en siny oubyen zes pour konn son pwennvi konsernan sizesyon son madanm. Lefet ki i ti zis bezwen reganny son lavwa, sa i montre ki Zekarya pa ti sourd.—Lik 1:13, 18-20, 60-64.
2:1, 2—Ki mannyer sa “premye resansman” i ed nou konnen kan Zezi ti ne? Pandan letan ki Sezar Ogis ti pe dirize, plis ki en resansman ti ganny fer. Pour akonplir Danyel 11:20, premye resansman ti ganny fer lannen 2 A.N.L., e dezyenm lannen 6 oubyen 7 A.N.L. (Akt 5:37) Kiriniis ti gouverner Siri pandan ki tou le de sa resansman ti ganny fer. Alor i evidan ki pour de fwa i ti gouverner. Dapre sa premye resansman ki Lik ti mansyonnen, Zezi ti ne lannen 2 A.N.L.
2:35—Ki mannyer en ‘gran lepe’ ti pou pers Mari? Sa ti pe refer avek sa latristes ki Mari ti pou santi kan i ti pou vwar preski tou dimoun rezet Zezi konman Mesi ek sa profon sagrinasyon ki i ti pou santi apre ki son garson ti pou’n ganny met a mor dan en fason kriyel.—Zan 19:25.
9:27, 28—Lik i dir ki transfigirasyon ti arive ‘wit zour’ apre ki Zezi ti’n promet son bann disip ki serten parmi zot “pa pou mor” avan ki zot vwar li vini dan son Rwayonm. Kanta Levanzil Matye ek Mark, zot dir ki transfigirasyon ti arive “sis zour pli tar.” Akoz sa diferans? (Mat. 17:1; Mark 9:2) I paret ki Lik ti’n enkli de zour anplis, savedir sa zour ki Zezi ti fer sa promes ek sa zour ki sa promes ti vin vre.
9:49, 50—Akoz Zezi pa ti anpes en zonm sas demon, menm si i pa ti pe swiv li? Zezi pa ti anpes li fer sa akoz kongregasyon Kretyen pa ti ankor ganny formen. Alors, i pa ti neseser ki sa zonm ti al avek Zezi partou pour li kapab demontre lafwa dan Zezi e sas demon.—Mark 9:38-40.
Leson pour nou:
1:32, 33; 2:19, 51. Mari ti gard dan son leker bann levennman ek parol ki ti akonplir bann profesi. Eski nou apresye en kantite sa ki Zezi ti predir konsernan letan “lafen,” par konpar sa ki i ti dir avek sa ki nou vwar pe arive ozordi?—Mat. 24:3.
2:37. Legzanp Ann i montre nou ki nou pa devret aret servi Zeova, nou devret “priye tou letan” e pa ‘abandonn nou rasanbleman,’ parey bann renyon.—Rom. 12:12; Ebr. 10:24, 25.
2:41-50. Zozef ti met keksoz spirityel premye dan son lavi e i ti pran swen avek son fanmir fizikman e osi spirityelman. I’n donn en bon legzanp bann sef fanmir dan sa bann domenn.
4:4. Nou pa devret les en zour pase san ki nou egzamin bann keksoz spirityel.
6:40. En ansenyan Parol Bondye i bezwen donn en bon legzanp son etidyan. I devret met an pratik sa ki i ansennyen.
8:15. Pour “gard [laparol]” e ‘avek perseverans prodwi fri,’ nou bezwen konpran, apresye e lir Labib avek bokou latansyon. Lapriyer ansanm avek meditasyon i esansyel kan nou pe lir Parol Bondye ek bann piblikasyon baze lo Labib.
SON MINISTER I KONTINYEN
Zezi ti anvoy 70 disip dan bann lavil ek landrwa an Zide. Apre i ti swiv zot. (Lik 10:1) I “ti travers bann lavil ek vilaz, e i ti ansenny bann dimoun.”—Lik 13:22.
Senk zour avan Lapak lannen 33 N.L., Zezi ti antre Zerizalenm lo en bourik. Ler ti’n arive pour sa parol ki i ti dir avek son bann disip ganny akonplir: “Fodre ki Fis-de-Lonm i soufer bokou e ganny rezete par bann ansyen, bann Gran-Pret ek profeser lalwa, e ganny met anmor, e ki trwazyenm zour i resisite.”—Lik 9:22, 44.
Larepons pour bann kestyon lo Labib:
10:18—Ki Zezi ti oule dir letan i ti dir sa 70 disip: “Mon ti war Satan sap dan lesyel, tonbe parey zekler”? Zezi pa ti pe dir ki Satan ti’n fini ganny pouse dan lesyel. Sa ti arive deswit apre ki Kris ti ganny kouronnen Lerwa dan lesyel an 1914. (Rev. 12:1-10) Menm si nou pa san poursan sir, kan Zezi ti pe koz lo en keksoz ki ti pou arive a lavenir dan zar konmsi in fini arive, i paret ki i ti pe met lanfaz lo lefe ki i pou vreman arive san fot.
14:26—Dan ki sans bann disip Zezi i bezwen “pa kontan [oubyen ay]” zot fanmir? Dan Labib sa mo “ay” i kapab vedir pour kontan en dimoun oubyen en keksoz mwens ki en lot. (Zen. 29:30, 31) Bann Kretyen i bezwen “ay” zot fanmir dan le sans ki zot kontan zot fanmir mwens ki zot kontan Zezi.—Mat. 10:37.
17:34-37—Lekel sa bann “leg” e lekel sa “kadav” kot zot zwenn ansanm? Sa bann dimoun ki “ganny pran” oubyen delivre i ganny konpare avek bann leg ki vwar lwen. Sa “kadav” kot zot zwenn ansanm i reprezant vre Kris ki prezan dan en fason envizib ek sa manze spirityel ki Zeova i donn zot.—Mat. 24:28.
22:44—Akoz Zezi ti trouble en kantite? Sa ti arive pour plizyer rezon. Zezi ti pe mazinen ki mannyer son lanmor konman en kriminel ti pou afekte Zeova ek Son non. Deplis, Zezi ti konn tre byen ki son lavi ek lavenir limanite ti depan lo son fidelite anver Zeova.
23:44—Eski en leklips soler ki ti fer fernwanr partou pour trwa erdtan? Non. Leklips soler i ariv zis ler nouvellin, pa kan lalin i plen, parey ti leka zour lapak. Sa fernwanr ki ti arive lo later zour lanmor Zezi ti en mirak ki Bondye ti fer.
Leson pour nou:
11:1-4. I napa en tro gran diferans kan nou konpar sa bann lenstriksyon avek sa model lapriyer ki Zezi ti donnen dan son Sermon lo Montanny 18 mwan pli boner dan Levanzil Matye. Sa bann lenstriksyon i klerman montre nou ki nou lapriyer pa devret senpleman en repetisyon koumsan menm.—Mat. 6:9-13.
11:5, 13. Menm si Zeova i pare pour reponn nou lapriyer, nou devret kontinyen persiste dan nou lapriyer.—1 Zan 5:14.
11:27, 28. Nou ganny vre lazwa ler nou fidelman fer lavolonte Bondye, se pa relasyon familyal oubyen kantite keksoz materyel ki nou annan ki anmenn vre lazwa.
11:41. Kan nou fer en bon keksoz pour bann ki pov akoz nou annan pitye, nou devret fer li avek bonker e akoz nou anvi fer li.
12:47, 48. En dimoun ki annan plis responsabilite me ki pa desarz zot byen i pli koupab ki en dimoun ki pa konnen oubyen konpran byen son responsabilite.
14:28, 29. Nou montre ki nou saz kan nou viv dapre sa ki nou mwayen i permet nou.
22:36-38. Zezi pa ti demann son bann disip pour anmenn en lepe pour protez oubyen pour defann zot lekor. O kontrer lefet ki zot ti annan lepe avek zot sa zour swar ki Zezi ti ganny trai, sa ti fer li posib pour Zezi ansenny zot en leson tre enportan: “Tou sa ki servi lepe pou mor par lepe.”—Mat. 26:52.
[Portre lo paz 31]
Konman en sef fanmir, Zozef in kit en bon legzanp pour nou
[Portre lo paz 32]
Lik ti donn preski tou lenformasyon lo lavi ek minister Zezi