Iivangkiiliu Lukasip allagaanit pingaarnersat
Jehovap oqaasia uumavoq
Iivangkiiliu Lukasip allagaanit pingaarnersat
IIVANGKIILIU Matthæusip allagaa atuartartut juutiusut pingaarnerutillugit iivangkiiliulu Markusip allagaa juutiunngitsut pingaarnerutillugit allagaasorineqarput. Iivangkiiliuli Lukasip allagaa inunnut inuiannit tamaneersunut allagaavoq. Allanneqarpoq ukiup 56-ip ukiullu 58-ip akornanni, tassanilu Jiisusip inuunera kiffartorneralu sukumiisumik oqaluttuarineqarput.
Nakorsap isumassuilluni peqqissaarlunilu pisarneratut Lukasip „tamaasa aallaqqaataanniilli sukumiisumik“ misissorpai, ukiullu 35-t ingerlaneranni — ukioq 3-miit u.n.s. ukioq 33 u.n.k. tikillugu — pisimasut oqaluttuarai. (Lukasi 1:3) Iivangkiiliumi Lukasip allagaani sammineqartut 60 procentingajaat iivangkiiliuni allani oqaluttuarineqanngillat.
JIISUSIP KIFFARTORNERATA AALLAQQAATAATUNGAA
Johannesi Kuisisup inunngornera Jiisusillu inunngornera pillugit sukumiisumik oqaluttuareerluni Lukasip oqaluttuuppaatigut Johannesip kiffartornini aallartikkaa ukiut kaasarip Tiberiusip naalakkersuiffiisa 15-issaanni, tassa ukiumi 29-mi u.n.k. upernaakkut. (Lukasi 3:1, 2) Ukioq taanna ukiakkut Jiisusi Johannesimit kuisippoq. (Lukasi 3:21, 22) Ukiumi 30-mi ’Jiisusi Galilæamut uterpoq synagogiinilu ajoqersuisarluni’. — Lukasi 4:14, 15.
Jiisusip oqaluussiartorluni angalanini siulleq aallartippaa Galilæami. Inuit ima oqarfigai: „Guutip naalagaaffianik iivangkiiliu illoqarfinni allanissaaq tusarliussassaraara.“ (Lukasi 4:43) Siimuut ima oqarfigaa: „Maannamiit inunnik pisaqartalerumaarputit,“ taavalu taanna aalisartullu allat angalaqatigilerpai. (Lukasi 5:1-11; Matthæusi 4:18, 19) Galilæami oqaluussiartorluni angalanermi aappaanni Jiisusip apustilit aqqaneq-marluusut ilagai. (Lukasi 8:1, 2) Angalanermilu pingajuanni aqqaneq-marluk taakku „aallartippai Guutip naalagaaffia oqaluussissutigeqqullugu napparsimasullu ajorunnaarseqqullugit“. — Lukasi 9:1, 2.
Allassimaffiit pillugit apeqqutinut akissutit:
1:35 — Mariap mannissaa taassuma naartulernerani arlaatigut atorneqarpa? Meeraq Mariap erniaa Guutip neriorsuutigisaatut taassuma siuaasaanit Aaperaamit, Judamit Daavimillu ilumoortumik kinguaajussappat, Mariap mannissaa taassuma naartulernerani atorneqartariaqarpoq. (1 Mosesi 22:15, 18; 49:10; 2 Samueli 7:8, 16) Naartoqalernermulli pissutaasoq tassaavoq Jehovap anersaani illernartoq atorlugu ernermi naammalluinnartup inuuneranik Mariap illiaanut nuussinera. (Matthæusi 1:18) Taamaalilluni Jehovap Mariap mannissaa pineqartoq naammalluinnanngissuseerutitilluinnarsimagunarpaa naartullu ineriartornerani ajoqusiisinnaasunut tamanut illersorlugu.
1:62 — Zakaria oqajuitsunngorlunilu tusilartunngorpa? Naamik. Oqalussinnaanera kisimi allannguuteqarpoq. Allat Zakaria „ussersorfigalugu aperaat“ meeqqap qanoq ateqarnissaa kissaatigineraa, imaanngilarli tusilartuummat ussersortut. Tusaagunarpaa nuliani ernerminnik atsiinissaq pillugu qanoq oqarnersoq. Immaqa allat Zakaria nuliaminik isumaqataanersoq ussersorlutik aperaat. Zakaria oqalussinnaalerseqqinneqaannartariaqarmat paasinarpoq tusaasinnaanera allanngorsimanngitsoq. — Lukasi 1:13, 18-20, 60-64.
2:1, 2 — ’Inunnik kisitsinerit siullersaannut’ innersuussineq Jiisusip qanga inunngorsimaneranik paasinninnissamut qanoq iluaqutigaarput? Kaasari Augustusip nalaani marloriarluni inunnik kisitsisoqarpoq. Siulleq ukiumi 2-mi u.n.s. pivoq Danieli 11:20 eqquutitillugu. Aappaa ukiumi 6-imi 7-imiluunniit u.n.k. pivoq. (Apustilit Suliaat 5:37) Kisitsinerit marluusut tamakkua nalaanni Kviriniusi Syriami naalagaatitaavoq. Piffissani assigiinngitsuni marlunni atorfik taanna atorfigisimagunarpaa. Lukasip inunnik kisitsineq siulleq eqqartormagu paasinarpoq Jiisusi ukiumi 2-mi u.n.s inunngorsimasoq.
2:35 — Qanoq paasisariaqarpa „panap“ Mariap tarninga kapissagaa? Tamatumani pineqarpoq juutit amerlanersaasa Jiisusi Missiarsitut itigartitsinerat paasigamiuk Mariap aliasunnera Jiisusillu anniangaarluni toquneranik anniaatiginninnera. — Johannesi 19:25.
9:27, 28 — Jiisusip ajoqersukkani neriorsorpai nammineq naalagaaffimmini tikiunnissi takoreertinnagu taakkua ilaasa ’toqu misigissanngikkaat’. Sooq Lukasi oqarpa taamatut neriorsuinerup kingorna „ullut arfineq-pingasut“ qaangiuttut naalannarsisitaaneq pisoq, uffa Matthæusi Markusilu oqartut „ullut arfinillit“ qaangiuttut pisoq? (Matthæusi 17:1; Markusi 9:2) Lukasip ullut marluk ilami ilanngussimanngisaat ilanngussimagunarpai — tassa ulloq neriorsuiffiusoq ullorlu eqquutititsiffiusoq.
9:49, 50 — Sooq Jiisusip angut ilaginngisartik anersaapilunnik anisitsisinnaajunnaarsinngilaa? Ilagiit kristumiut suli pilersinneqarsimanngimmata. Tamanna pissutigalugu pisariaqanngilaq angutip taassuma Jiisusimik ingiaqatiginninnissaa. Jiisusip aqqanik upperinnittuuvoq, taamaattumillu anersaapilunnik anisitsisinnaavoq. — Markusi 9:38-40.
Ilinniarfigisinnaasavut:
1:32, 33; 2:19, 51. Jiisusi pillugu oqaatsit Mariap uummamminut toqqorpai pisullu siulittuutinik eqquutsitsisut maluginiaqqissaarlugit. Jiisusip ’silarsuup naggatissaa [pissutsit aaqqissuussaanerata naggatissaa, NV]’ pillugu oqaasiinik ullumikkut pisunut sanilliussinitsigut ersersittarparput oqaasii eqqaamallugillu pingaartikkivut? — Matthæusi 24:3.
2:37. Annap maligassiaa ilinniarfigaarput Jehova qasusuilluta pallorfigisariaqaripput, ’qinunitsinni qasusuissasugut’ kristumiullu ataatsimiinnerini ’ilagiittut katisimasarnivut peqataanngitsoorfigissanngikkivut’. — Romamiut 12:12; Hebræerit 10:24, 25.
2:41-50. Josefip inuunermini soqutigisat anersaakkut ittut pingaarnerpaatippai ilaquttamilu timikkut anersaakkullu pisariaqartitaat isumagisarlugit. Tamakkunatigut ilaqutariinni qullersaasunut maligassaalluarpoq.
4:4. Ullut tamaviisa anersaakkut ittunik eqqarsaatiginneqqissaartariaqarpugut.
6:40. Guutip oqaasianik ilinniartitsissutiginnittoq ilinniartitaminut maligassiuisuusariaqarpoq. Allanut ilinniartitsissutigisani nammineq maleruartariaqarpai.
8:15. ’Oqaaseq paarissagutsigu nikallujuillutalu inerititaqassagutta’ Guutip oqaasia paasisariaqarlugulu pingaartittariaqarlugulu pigiliuttariaqarparput. Biibili Biibililersaarutilluunniit atuaraanni pingaaruteqarluinnarpoq qinunikkut allassimasunik eqqarsaatiginneqqissaarnissaq.
JIISUSIP KIFFARTORNERATA NAGGATAATUNGAA
Jiisusip „72-it“ (’70-it’, 1936) allat toqqarpai illoqarfinnullu inoqarfinnullu Judæamiittunut siuartillugit. (Lukasi 10:1) „Illoqarfiit illoqarfeeqqallu aqqusaartorpai ajoqersuisarlunilu.“ — Lukasi 13:22.
Ukiumi 33-mi poorski ullunik tallimanik sioqqullugu Jiisusi siutituup piaraa qimusserfigalugu Jerusalemimut iserpoq. Piffissanngorpoq ajoqersukkaminut oqaasiisa ukua eqquunnissaannut: „Inuup Ernera anniangaassaaq, ajattorneqassalluni utoqqaanertanit palasiunernit allakkanillu ilisimasunit toqunneqassallunilu ullullu pingajuanni makikkumaarluni.“ — Lukasi 9:22, 44.
Allassimaffiit pillugit apeqqutinut akissutit:
10:18 — Jiisusip suna pivaa ajoqersukkanut ’72-inut’ (’70-inut’, 1936) ima oqarami: „Saatani innaallannertut qilammit nakkartoq takuara“? Jiisusip oqaatiginianngilaa Saatani qilammit igitaareersoq. Tamanna aatsaat Missiarsip 1914-imi qilammi kunngitut ivertinneqarnerata kinguninngua pivoq. (Saqqummersitat 12:1-10) Qulakkeerlugu oqaatigisinnaanngilarput, pisussalli pereersimasutut eqqartorneratigut Jiisusip erseqqissarniarunarpaa tamatuma piumaarnera qularnanngilluinnartoq.
14:26 — Kristusip ajoqersugai eqqarliminnik ’uumiginnissasut’ qanoq paasisariaqarpa? Biibilimi oqaaseq „uumiginninneq“, „uumissuineq“ imaluunniit „qinngarinninneq“ atorneqaraangat aamma isumaqarsinnaavoq inummik, inummut allamut asanninnermit, minnerusumik asanninneq. (1 Mosesi 29:30, 31, 1900) Kristumiut eqqarlitik ’uumigisussaavaat’ ima paasillugu taakku Jiisusimit asannginnerusussaagaat.— Matthæusi 10:37.
17:34-37 — „Nattoraliusat“ kikkuuppat, katersuuffigisaallu ’qilloq’ suua? ’Ilaliunneqartut’, imaluunniit aniguisitaasut, assersuunneqarput nattoraliusanut ungasissumut tappissunut. ’Qilloq’ imaluunniit ’timi toqungasoq’ (NV) katersuuffigisaat tassaavoq Missiarsi ilumoortoq takussaanani najuuttoq aamma anersaakkut inuussutissat Jehovap taakkununnga pilersitai. — Matthæusi 24:28.
22:44 — Sooq Jiisusi toqumut annilaangalerpa? Pissutaasut arlaliupput. Pinerluttutut nalinginnaasutut toqunissami Jehova Guutimut taassumalu aqqanut qanoq sunniuteqarnissaa ernumassutigaa. Nalunngilaattaaq aalajaattuarnissani naassaanngitsumik inuunissaminut inuiaallu siunissaannut aalajangiisuussasoq.
23:44, 45 — Nalunaaquttap-akunnerini pingasuni taarnera seqernup pulaneranik peqquteqarpa? Naagga. Qaammanniffimmiinnaq seqineq pulasarpoq, qaammat imissigaangat pinani, poorskimilu qaammat imissisarpoq. Ullormi Jiisusip toquffiani taarnera Guutip tupinnartuliorneranik peqquteqarpoq.
Ilinniarfigisinnaasavut:
11:1-4. Siunnersuummi tamatumani oqaatsit atorneqartut oqaatsinut Jiisusip qinnummi najoqqutassaasumi qaammatit 18-it tamatuma siorna qaqqami oqaluutsimini atugaanut sanilliukkaanni, erseqqippoq qinnutivut oqaatsinik aalajangersimasunik uteqattaarinerinnaasussaanngitsut. — Matthæusi 6:9-13.
11:5, 13. Naak Jehovap kajumilluni qinnutivut akisaraluarai, qasusuittariaqarpugut qinunermut tunngatillugu. — 1 Johannesi 5:14.
11:27, 28. Aalajaalluni Guutip piumasaatut iliornikkut ilumoortumik pillualertoqartarpoq. Ilaqutat imaluunniit pigisarilersimasat apeqqutaanngillat.
11:41. Piitsunut tunissuteqaraangatta, asanninneq uummallu kajumittoq tamatumunnga kajumississutigisariaqarparput.
12:47, 48. Pingaarutilimmik akisussaaffilerneqarsimasoq, tamatuminngali eqqortitsinngitsoq, pisussaaffimminik ilisimanninngitsumit paasinnilluarsimanngitsumilluunniit pisuussuteqarneruvoq.
14:28, 29. Silatusaassaagut akissaqarnerput sinnerlugu atuinngikkutta.
22:36-38. Jiisusip ajoqersukkani sakkulisaqqugamigit imminnut illersorsinnaanissaat eqqarsaatiginngilaa. Unnuami killuutigineqarnermini taakku panalisarmata periarfissaqalerpoq taakkua pingaaruteqangaartumik ilinniartinnissaannut, tassa ’panalersortut tamarmik pannamik toqunneqassasut’. — Matthæusi 26:52. (w08 03/15-E)
[Qupp. 31-mi assiliartaq]
Josefi ilaqutariinni qullersaasunut maligassaalluarpoq
[Qupp. 32-mi assiliartaq]
Jiisusip inuunera kiffartorneralu pillugit oqaluttuaq sukumiinerpaaq Lukasip allappaa