Diosax wali sum uñjistu
Diosar jakʼachasipxam
Diosax wali sum uñjistu
KUNATSA chuymasax ‘juchañchakistaspawa’ sasaw Bibliax qhanañchi, mä arunxa janis kunsa sum lurksna ukham amuyassna. Janis Diosan munañjam sarnaqsna ukhamwa amuyassna. Ukampis “Diosax jukʼamp jachʼawa chuymasat sipansa, jupasti taqi kunwa yatiraki” sasaw Bibliax sarakistu (1 Juan 3:19, 20). Chiqpachansa, Diosax jiwasat sipansa jukʼamp sumwa uñtʼistu. Ukhamasti Jupax janiw kunjamtï jiwaspach uñjasktan ukham uñjkistuti. Ukhamax ¿kunjamsa alaxpachankir Jehová Diosax uñjistu? Uk amuytʼañatakix Jesusan mä uñachatʼäwipat parltʼañäni, pä kutiw uka uñachtʼäwimpix yatichatayna.
Mä kutixa akham sasaw Jesusax jisktʼäna: “¿Janit pä jamachʼis jukʼa qullqir aljaskixa?” sasa (Mateo 10:29, 31). Ukat kunjamtï Lucas 12:6, 7 qillqatax siskixa: “¿Janit phisqa jamachʼinakax pä moneda qullqir aljaskixa? Diosasti ukanakatxa janiw maynits armtʼaskiti. [...] Janiy axsarapxamtixa; jumanakax walja jiskʼa jamachʼinakat sipansa jukʼampi alanïpxtawa” sasaw sarakïna. Ukhamasti kunjamsa Jehová Diosax luqtirinakapar uñjpacha, ukwa aka wali musparkañ uñachtʼäwix amuytʼayistu.
Taqi jamachʼinakat sipansa wali jukʼa alani jiskʼa jamachʼinakatwa Jesusax parlaskäna. Kunjamsa pisin jakasir warminakax plazanakansa jan ukax qhatunakansa uka jiskʼa jamachʼinak familian manqʼasiñataki alasipxäna ukxa sum uñjpachäna, inas mamapas uka jiskʼa jamachʼinak alarakirïchïna. Asarion sat mä jiskʼa qullqimpixa pä jiskʼa jamachʼinakwa alapxirïna, uka qullqisti, jichhürunakanxa dólar qullqinxa janiw 5 centavükaspasa. Sinti iraqatapunïnwa, ukham pä jiskʼa qullqimpix janiw pusiki alapxirïkänti, jan ukasti phisqa alapxirïna, mayax yapänwa.
Ukampis Diosax “janiw maynits armtʼaskiti”, “janiw maynisa [Dios Awkin jan uñjkatax aka uraqir purkiti, NM]” sasaw Jesusax säna (Mateo 10:29). Kunapachatï uka mä jiskʼa jamachʼix jaquqti jan ukax manqʼa thaqir uraqir puri ukhaxa, Jehová Diosax uñjaskiwa. Uka jiskʼa jamachʼinakax janiw Jehová Diosatakix inamayäkiti, jakir animalanakjamwa luratayna, ukatwa wali sum ukanakarus uñjaraki. Ukampis ¿Jesusax kamsañs uka uñachtʼäwimpix sañ munpachäna uk amuytati?
Chiqpachansa, Jesusax uñachtʼäwinakampipuniw yatichirïna, kunatix jan yäqañjamäki ukanakampiw wali wakiskir tuqinakat amuytʼayirïna. Ukat mä kutix akham sarakïnwa: “Uñtapxam jamachʼinakaru, ukanakax janiw phawapkisa, ni apthapipkisa, ni juyra imasiñanakapas utjkiti, ukampis Diosaw ukanakarux manqʼayi. ¡Jumanakax uka jamachʼinakat sipans jukʼampi munatäpxtawa!” sasa (Lucas 12:24). Ukhamasti, niyakixay Jehová Diosax uka jiskʼa jamachʼinakarus sum uñjchixa, jupar munasiri ukat yupaychir jaqinakarux jukʼamp sumwa uñji, ukwa Jesusax amuytʼayañ munaskäna.
Ukhamasti Jesusax kunjamtï siskänxa, janiw khitis “janiw Diosax mayar munaskitaspati” sañasäkiti, “Diosax jukʼamp jachʼawa chuymasat sipansa”, jupaw sum uñjaskistu. Chiqpachansa, Luririsaw kuna askinakas chuymasan utji ukanakxa sum yati, janiw jiwaspachas uk sum yatktanti, ukax wali kusiskañawa.
[10 janan fotopax khitin apsutasa]
Jiskʼa jamachʼinaka: © ARCO/D. Usher/age fotostock