Enye Ada Nnyịn ke Ọsọn̄urua
San̄a Kpere Abasi
Enye Ada Nnyịn ke Ọsọn̄urua
‘ESỊT nnyịn ekeme ndibiom nnyịn ikpe.’ Ikọ Bible emi owụt ke esịt nnyịn ekeme ndinam ikụt ndudue ikaha inọ idem nnyịn ndusụk ini. Ke akpanikọ, enye ekeme ndinam nnyịn ikere kpukpru ini nte ke nnyịn idotke se Abasi amade onyụn̄ ekerede aban̄a. Edi, Bible ọdọn̄ nnyịn esịt ete: “Abasi omokpon akan esịt nnyịn onyụn̄ ọfiọk kpukpru n̄kpọ.” (1 John 3:19, 20) Abasi enen̄ede ọfiọk nnyịn akan nte ifiọkde idem nnyịn. Usụn̄ oro enye esede nnyịn ekeme ndinen̄ede n̄kpụhọde ye usụn̄ oro nnyịn isede idem nnyịn. Didie ndien ke Jehovah Abasi, kpa enye emi ekikere esie edide akpan n̄kpọ akan, ese nnyịn? Jesus ama ọnọ uwụtn̄kpọ iba oro ẹkemede ndibọrọ mbụme emi.
Akpa, Jesus ọkọdọhọ ke ‘ẹnyam akadan̄abasi iba ke ekpri okudọk.’ (Matthew 10:29, 31) Jesus ọkọdọhọ n̄ko ke Luke 12:6, 7 ete: “Nte owo inyamke akadan̄abasi ition ke n̄kpri okudọk iba? Kpa ye oro Abasi ifreke ndomo mmọ kiet. . . . Ẹkûfehe ndịk; mbufo ẹmesọn̄ urua ẹkan ediwak akadan̄abasi.” Mmemmem uwụtn̄kpọ oro okopde odudu mi ekpep nnyịn nte Jehovah esede owo kiet kiet emi atuakde ibuot ọnọ enye.
Akadan̄abasi ekedi kiet ke otu mme inuen oro ẹkememde urua ẹkan, oro ẹkesitade. Nte eyịghe mîdụhe, Jesus ama okụt iban emi ẹdide ubuene—idem eka esie—ẹdepde ata n̄kpri inuen emi ke urua man ẹda ẹnam udia ẹnọ ubon mmọ. Owo ama ekeme ndida assarion kiet emi ekpride akan naira itiokiet mfịn ndep akadan̄abasi iba. Akadan̄abasi ama enen̄ede emem urua tutu owo ekeme ndida okudọk iba ndep ition utu ke inan̄, ndien ọyọhọ ition ekesidi udori.
Jesus ama anam an̄wan̄a nte ke “Abasi ifreke ndomo mmọ kiet,” mmọ inyụn̄ “iduọhọ ke isọn̄” ke Abasi mîfiọkke. (Matthew 10:29) Jehovah esikụt akadan̄abasi ini kiet ekededi oro enye ọduọde ke isọn̄, edide ke ini adade unan m̀mê ke ini oyomde udia. Sia edide Jehovah okobot n̄kpri inuen oro ẹtiede nte ke iwọrọke n̄kpọ mi, enye ifreke mmọ. Ke nditịm ntịn̄, enye ada mmọ ke ọsọn̄urua sia mmọ ẹdide odu uwem n̄kpọ. Nte afo omokụt se Jesus ekekpepde ke uwụtn̄kpọ emi?
Jesus ama esiwak ndida n̄kpọ kiet ndomo ye en̄wen ke ini enye ekesikpepde n̄kpọ, emende ekpri n̄kpọ odomo ye akamba. Ke uwụtn̄kpọ, Jesus ọkọdọhọ n̄ko ete: ‘Mme raven isuanke n̄kpasịp inyụn̄ idọkke-dọk, mmọ inyụn̄ inyeneke ebiet ubon mbun̄wụm in̄wan̄ ye ufọk ubonn̄kpọ, ndien Abasi ọbọk mmọ. Nte mbufo isọn̄ke urua ikan mme inuen?’ (Luke 12:24) Mi ke ikọ Jesus aban̄ade akadan̄abasi enen̄ede an̄wan̄a: Edieke Jehovah ekerede aban̄a ata n̄kpri inuen emi, n̄wan̄wadise mbon emi ẹmade ẹnyụn̄ ẹtuakde ibuot ẹnọ enye!
Ke ikerede iban̄a ikọ Jesus emi, inaha nnyịn ikere ke nnyịn idotke ndidi se Abasi emi ‘okponde akan esịt nnyịn’ okụtde onyụn̄ ekerede aban̄a. Nte idịghe n̄kpọ ndọn̄esịt ndifiọk ke Andibot ada nnyịn ke ọsọn̄urua akan nte nnyịn idade idem nnyịn?
[Ebiet Ẹdade Ndise Ẹto ke page 9]
Sparrows: © ARCO/D. Usher/age fotostock