Batamela Kgaufsi le Modimo

Modimo yo a re Lebelelago re le ba Bohlokwa

Luka 12:6, 7

‘DIPELO tša rena di ka re ahlola.’ Ka mantšu ao, Beibele e dumela gore ka dinako tše dingwe dipelo tša rena di ka re dira gore re inyatše ka mo go feteletšego. Ka kgonthe, dipelo tša rena di ka dira gore re be le maikwelo a sa kgaotšego a go ikwa re sa swanelwe ke lerato la Modimo le tlhokomelo ya gagwe. Lega go le bjalo, Beibele e re kgonthišetša ka gore: “Modimo ke yo mogolo go feta dipelo tša rena gomme o tseba dilo tšohle.” (1 Johane 3:19, 20) Modimo o re tseba gakaone kudu go feta kamoo re itsebago ka gona. Tsela yeo a re lebelelago ka yona e ka ba e fapanego kudu le yeo rena re itebelelago ka yona. Ka gona, re ba bohlokwa gakaaka’ng mahlong a yoo re tlogago re e-na le taba le yena—e lego Jehofa Modimo? Karabo e ka hwetšwa papišong e kgomago maikwelo yeo Jesu a e dirišitšego mabakeng a mabedi a fapanego.

Lebakeng le lengwe, Jesu o itše ‘dithaga tše pedi di rekišwa ka tšhelete ya tšhipi ya theko e nyenyane.’ (Mateo 10:29, 31) Go ya ka Luka 12:6, 7, Jesu o ile a ba a re: “Dithaga tše hlano di rekišwa ka ditšhelete tša tšhipi tše pedi tša theko e nyenyane, na ga go bjalo? Lega go le bjalo, ga go le e tee ya tšona ye e lebalwago pele ga Modimo. . . . Le se ke la boifa; le ba bohlokwa go feta dithaga tše dintši.” Papišo ye e bonolo eupša e le e matla, e re ruta tsela yeo Jehofa a lebelelago yo mongwe le yo mongwe wa barapedi ba gagwe ka yona.

Dithaga e be e le tše dingwe tša dinonyana tšeo di bitšago tšhelete ya tlase kudu gare ga dinonyana ka moka tšeo di bego di dirišetšwa bakeng sa dijo. Jesu ka ntle le pelaelo o be a ile a šetša basadi ba badiidi—mohlomongwe gaešita le mmagwe—ge ba reka dinonyana tše tše dinyenyane mmarakeng bakeng sa go fepa malapa a bona. Ka tšhelete e tee ya tšhipi, yeo theko ya yona e lego ka tlase ga disente tše 35 go ya ka tšhelete ya sebjale-bjale, moreki o be a ka reka dithaga tše pedi. Dinonyana tše di be di tloga di bitša tšhelete ya tlase kudu moo e lego gore ka ditšhelete tše pedi tša tšhipi, moreki o be a hwetša dithaga tše hlano e sego tše nne gomme ya bohlano a e fiwa ntle le tefo.

Jesu o hlalositše gore ga go thaga le e tee “ye e lebalwago pele ga Modimo” goba “yeo e tlago go wela fase” Tatago lena a sa tsebe. (Mateo 10:29) Jehofa o ela hloko nako le nako ge thaga e wela fase, mohlomongwe ka gobane e gobetše goba e kotama bakeng sa go tsoma dijo. Dinonyana tše tše di bonagalago e le tše se nago mohola, e be e se tše dinyenyane kudu gore Jehofa a ka di bopa, e bile ga se tše dinyenyane kudu gore a ka di gopola. Ge e le gabotse, o di lebelela e le tše di nago le mohola ka gobane e le diphedi tše bohlokwa. Na o bona ntlha ya papišo ya Jesu?

Thutong ya gagwe, Jesu gantši o be a diriša dipapišo, a nea mabaka go tloga tabeng e nyenyane go ya tabeng e kgolo. Ka mohlala, Jesu gape o itše: “Magokobu ga a bjale peu goba go buna, e bile ga a na leobo goba ngwako wa polokelo, fela Modimo o a a fepa. Lena le ba bohlokwa kudu gakaaka’ng go feta dinonyana?” (Luka 12:24) Bjale, ntlha yeo Jesu a e boletšego ka dithaga e tloga e bonagala gabotse: Ge e ba Jehofa a hlokomela dinonyana tše tše nyenyane kudu, gona o tla hlokomela kudu gakaaka’ng batho bao ba mo ratago le go mo rapela!

Go ya ka mantšu a Jesu, ga se ra swanela go ikwa re tloga re sa swanelegele go ka šetšwa le go hlokomelwa ke Modimo yoo e lego “yo mogolo go feta dipelo tša rena.” Na ga se mo go homotšago go tseba gore Mmopi wa rena a ka kgona go bona ka go rena seo rena ka noši re ka se kgonego go se bona?

[Mothopo wa Seswantšho go letlakala 9]

Sparrows: © ARCO/D. Usher/age fotostock