Importante Itayo ed Sakey a Mangoobserba
Onapit ed Dios
Importante Itayo ed Sakey a Mangoobserba
“SAY kapusoan tayo et puoten to itayo.” Diad saratan a salita et bibidbiren na Biblia a no maminsan et ompan masyado itayon balawen na puso tayo. Kanian, nayarin naynay tayon nalikna ya agtayo kanepegan so panangaro tan panangasikaso na Dios. Balet, oniay ipapaseguro na Biblia: “Babaleg so Dios nen say puso tayo, tan kaba’to so amin a bengatla.” (1 Juan 3:19, 20) Mas kabat itayo na Dios nen say pakapikabat tayo ed inkasikatayo. Nayarin say panmoria to ed sikatayo et nidumaduma ed pangipapasen tayo ed dili tayo. Anto sirin so pangipapasen ed sikatayo na samay walaan na im-importantin opinyon, si Jehova a Dios? Naamtaan so ebat diad makapatenyeg-puson ilustrasyon ya amiduan inusar nen Jesus.
Aminsan et inkuan nen Jesus a “nalako so duaran anuyaw ed sakey a kuarta.” (Mateo 10:29, 31) Diad Lucas 12:6, 7 et inkuan to met: “Agta nalako so limaran anuyaw ed duara a kuarta? Et anggan sakey ed sikara agnalingwanan dia ed arap na Dios. . . . Agkayo antakot; mamabli kayo nen saray dakel ya anuyaw.” Ibabangat na sayan simpli ingen ta mapuersan ilustrasyon no panoy pangipapasen nen Jehova ed balang sakey a mandadayew ed sikato.
Saray anuyaw et sakey ed saray sankamuraan a manok ya iluluton naakan. Seguradon naobserbaan nen Jesus iray mairap-bilay a bibii—anganko et pati say ina to—a mititindaan na angkekelag ya anuyaw pian ipangan na pamilya ra. Diad sakey ya assarion, sinsilyo a say balor to natan et kulang a duay pisos, makasaliw la na duaran anuyaw. Mamurmura irayan manok ta diad duaran sinsilyo et aliwa labat lan apatiran anuyaw so nasaliw noagta limara, samay sakey et buntok la.
Impaliwawa nen Jesus ya anggapoy anggan sakey ya anuyaw a ‘nalingwanan na Dios’ odino napelag “ed dalin no agyabuloy” na Ama. (Mateo 10:29) Naiimano nen Jehova kapagno walay anuyaw a napelag, ompan lapud asakitan odino ondapo pian mananap na kanen. Saratan a singa anggapoy kuentan manok et aliwan melmelag pian palsaen nen Jehova tan aliwa met a melmelag pian nonoten to. Diad tua et papablien to ra lapud makana iran pinalsa. Kasin nalam so punto na ilustrasyon nen Jesus?
Sano manbabangat si Jesus, sikatoy mabetbet a manguusar na panangikompara. Ipapaimano to so melag a bengatla insan to ipanengneng no panon ya onaplika itan ed bengatlan mas importante. Singa bilang, inkuan met nen Jesus: “Morekdek yo’ray wawak, ya ag-ira mantanem, tan ag-ira manani, ya andian ira na pantiponan ono kamalir; et tataganoen ira na Dios. Agkayo kasi mamabli nen saray manok!” (Lucas 12:24) Natan et linminew so punto nen Jesus nipaakar ed saray anuyaw: No sarayan angkekelag a manok et aasikasoen nen Jehova, mas lalo la ed saray totoon mangaaro tan mandadayew ed sikato!
Base ed saray imbaga nen Jesus, komon ta agtayo ipasen ya anggapoy kanepegan tayo ed panangimano tan aro na Dios, a ‘babaleg nen say puso tayo.’ Agta makapaliket a naamtaan a say Manamalsa tayo et walay nanenengneng ton agtayo naiimano ed inkasikatayo?
[Picture Credit Line ed pahina 9]
Saray anuyaw: © ARCO/D. Usher/age fotostock