¿Pitaq imaynachus kasqanchikta jatunpaq qhawan?
Diosman qayllaykuy
¿Pitaq imaynachus kasqanchikta jatunpaq qhawan?
BIBLIA nisqanmanjina wakin kuti “sonqonchej[qa] imallamantapis juchachawasunman”, may juchayuq kasqanchikta yuyachiwasunman. Arí, sunqunchikqa Dios mana munakunawanchikpaqjinachu kasqanchikta yuyachiwasunman. Chaywanpis Bibliaqa sutʼinchawanchik: “Diosqa sonqonchejmanta kurajmin” kasqanta, “tukuy imatataj yacha[sqanta]” (1 Juan 3:19, 20). Chantapis, Diosqa ñuqanchikmanta nisqaqa astawan riqsiwanchik. Chayrayku nisunman mana qhawakusqanchikmanjinachu Jehová qhawawasqanchikta. ¿Imaynatá Jehová Diosninchik qhawawanchik? Kay tapuyman kutichinapaq qhawarina Jesús imatachus iskay kutipi yachachisqanta.
Juk kutipi Jesús tapurirqa: “¿Manachu iscay phichitanca pʼisketosta miqhunancupaq vendencun juk phatallapi?”, nispa (Mateo 10:29, 31 DIOS PARLAPAWANCHEJ). Wak kutipitaq Lucas 12:6, 7 pʼitikuna nisqanmanjina, Jesús nillarqataq: “Manachu phishqa pʼisqetusta vendenku iskay phisurayku? Chaywampis, ni ujpis qonqasqachu Diospa ñawpaqempeqa [...]. Ama manchachikuychejchu, imaraykuchus qankunaqa aswan valorniyoj kankichej ashkha pʼisqosmanta nisqaqa”, nispa. Kay kikinchayqa rikuchiwanchik imaynatachus, Jehová kamachisninta qhawasqanta.
Tukuy pʼisqitusmanta nisqaqa, phichitanka pʼisqitu aswan barato karqa. Ichapis, Jesusqa rikurqa wakcha warmista —ichá mamantapis— mercadopi kayjina pʼisqitusta rantikusqankuta, familiasninkuman mikhuchinankupaq. Jaqay tiempopiqa 30 centavosllawan iskay phichitanka pʼisqitusta rantiq kanku. Kay pʼisqitus may pisi valorniyuq kasqankuraykutaq, juk runaqa iskay phisuswan mana tawallatachu rantiq, manaqa phichqa pʼisqitusta rantiq... jukta yapatajina.
Chaywanpis, Jesús nirqa: “Ni ujpis qonqasqachu Diospa ñawpaqempeqa”, nispa (Lucas 12:6). Jehová rikun maykʼaqllapis juk pʼisqitu pampaman wichʼuykakamusqanta, chayri mikhunitata maskʼakunanpaq pampaman tiyaykamusqanta. Arí, runas kay pʼisqitusta mana valorniyuqtajina qhawaptinkupis, Jehovapaqqa may valorniyuq, chayrayku mana paykunamantaqa qunqapunchu. Chantapis kawsayniyuq kasqankurayku may valorniyuqpaq qhawan. ¿Reparankichu imatachus Jesús kay rikchʼanachinawan niyta munachkasqanta?
Jesusqa achkha kutipi kikinchaykunaswan yachachiq, pisipaq qhawasqastapis sumaqpaq qhawachiq. Juk kuti, Jesús jinata nirqa: “Pʼisqosqa mana tarpunkuchu nitaj ruthunkuchu, nillataj jallchʼananku kanchu, nitaj pirwankupis. Chaywampis Diosqa paykunata mikhuchin. Manachu qankunaqa aswan munasqa kankichej chay pʼisqosmanta nisqaqa?”, nispa (Lucas 12:24). Arí, kaykama sutʼita rikunchik imatachus Jesús yachachiyta munasqanta: Jehová pʼisqitusmantapis llakikun chayqa, ¿manachu payta munakuspa yupaychaqkunamanta astawan llakikunman?
Jesús nisqanmanjina mana yuyananchikchu tiyan, Diosninchikpaq mana imapis kasqanchikta, imaptinchus payqa “sonqonchejmanta kurajmin” ñuqanchikmantataq llakikun. Chantapis Jehová Diosninchikqa, ñuqanchikmanta astawan, ima kʼacha kaykunachus sunqunchikpi kapuwasqanchikta qhawan, chayta yachasqanchikta mayta sunquchawanchik.
[10 paginapi maymantachus foto urqhukusqan]
Phichitanka: © ARCO/D. Usher/age fotostock