O Lē e na te Faatāuaina i Tatou
Ia Mafuta Atu i le Atua
O Lē e na te Faatāuaina i Tatou
E ONO ‘faasala i tatou e o tatou loto.’ E tusa ai ma nei upu, o loo faailoa mai ai e le Tusi Paia e ono faapogaia e o tatou loto i tatou i nisi taimi, ina ia manatu faatauvaa iā i tatou lava. O le mea moni, atonu o le a tatou manatu ai e lē tāua i tatou i le alofa ma le tausiga a le Atua. Peitaʻi, o loo taʻua manino mai e le Tusi Paia iā i tatou: “E sili atu le Atua i o tatou loto, e na te silafia foʻi mea uma lava.” (1 Ioane 3:19, 20) E sili atu ona silafia e le Atua o tatou loto nai lo i tatou lava. Atonu e ese mai lona manatu iā i tatou, nai lo le auala tatou te manatu ai iā i tatou lava. O le ā la le silafaga a Ieova le Atua iā i tatou, auā e sili atu ona tāua ona manatu? E maua le tali i le talafaatusa lea na taʻua e Iesu i ni taimi eseese se lua.
I se tasi taimi, na taʻua ai e Iesu e ‘faatauina atu ni tamaʻi manulele se lua i se tupe itiiti.’ (Mataio 10:29, 31) E tusa ai ma le Luka 12:6, 7, na taʻua foʻi e Iesu: “Pe e lē faatauina atu ea ni tamaʻi manulele e lima i tupe iti e lua? Ae e lē galo i le Atua se tasi o na tamaʻi manulele. . . . Aua neʻi outou fefefe; e sili atu ona tāua outou nai lo tamaʻi manulele e tele.” O lenei talafaatusa faigofie ae tāua tele, ina ia tatou iloa ai le auala o loo silasila ai Ieova i ana auauna.
O tamaʻi manulele, o manu pito sili nei ona taugofie i manu uma sa faaaogā mo meaʻai. E mautinoa na silafia e Iesu fafine matitiva, atonu foʻi e aofia ai ma lona tinā, sa latou faatauina mai nei manu iti i le maketi ina ia fafaga ai o latou aiga. Pe a tasi le tupe siliva, lea e itiiti mai i le lima sene i aso nei, e faatau mai ai e le tagata tamaʻi manulele e lua. O nei manulele, e matuā taugofie lava, ona pe afai e lua tupe siliva, e maua e le tagata le lima tamaʻi manulele nai lo le fā, o lona uiga o le isi tasi ua ave fua e lē totogia.
Ae na fetalai Iesu e leai se tamaʻi manulele e tasi e “galo i le Atua” po o le paʻū “i le eleele,” e lē silafia lava e le Tamā. (Mataio 10:29) E silafia uma e Ieova le taimi e paʻū ai se tamaʻi manulele i le eleele, atonu ua lavea po o fealuaʻi foʻi e suʻe sana mea e ʻai. O nei manulele foliga faatauvaa, e leʻi manatu Ieova ua maʻimau lona taimi e faia ai po o le manatuaina foʻi. Ioe, na ia faapelepele iā i latou, talu ai o i latou o ni meaola e tāua tele. Po o e silafia le manatu tāua i le talafaatusa a Iesu?
E masani ona faaaogā e Iesu faatusatusaga i lana aʻoaʻo atu, e talanoa i se lesona e faatauvaa ona ia toe faatatauina lea i se mea e sili ona tāua. Mo se faaaʻoaʻoga, na taʻua foʻi e Iesu e faapea: “Ia vaavaai lelei i oreva, auā latou te lē lūlū ni fatu pe selesele, pe faaputu i se fale saito, ae e fafagaina i latou e le Atua. Pe e lē sili ea ona tāua outou i lo manufelelei?” (Luka 12:24) O lea la, ua manino mai le manatu tāua i fetalaiga a Iesu e uiga i tamaʻi manulele: Afai e faatāua e Ieova nei manu iti, pe e lē sili atu ea ona ia faatāuaina tagata o ē alolofa ma tapuaʻi iā te ia!
E tusa ai ma fetalaiga a Iesu, e lē manaʻomia ona tatou manatu e lē tāua i tatou i le silafaga a le Atua o lē e ‘sili atu i o tatou loto.’ Pe e lē o se faalaeiauga ea lo tatou iloa e mafai ona silafia mai e Lē na faia i tatou, mea e lē o mafai ona tatou iloa e faatatau iā i tatou lava?
[Ē Ana le Ata i le itulau 9]
Tamaʻi Manulele: © ARCO/D. Usher/age fotostock