Uñjä ukhaw chiqaw säxa

“Diosata ukat jutïr urunakat yatiñaxa, cristianonakatakisa ukat yaqha yupaychäwinakatakisa wakiskiriwa, ukampis Diosar iyawskasina, Diosar uñtʼañataki jan chʼamachasiri jaqitakixa (agnóstico) janiw yatiñjamäkiti. ‘Janipuniw uka tuqit yatksnati inas jutïrin yatchiñäni’ siw uka jaqixa.” (BERTRAND RUSSELL, FILÓSOFO [1953])

AGNÓSTICO aruxa animalanakat yatxatiri (zoólogo) Thomas Huxley sat jaqin uñstayatawa. 1825 maran yuritayna, Huxley sat chachaxa Charles Darwinan mitapawa ukat monot juttan siski uka yatichäwirux wal arxatirïna. Diosan utjatapatxa janiw kuna uñachtʼäwis utjkiti janirakiw “kunjamtï cristianonakax Diosax munasistuwa, jiwasat llakisirakiwa sapki ukatakisa”, sasaw 1863 maran qillqatayna.

Jichhürunakanxa, waljanirakiw uka jaqinakjamax amuyapxi ukat kuntï uñjktxa ukarukiw iyawsäxa sasaw sapxi. Inas akham sapxchispa, Diosax utjiw sañatakix janiw kuna uñachtʼäwis utjkiti jan amuytʼasir jaqikiw ukar iyawsixa sasa.

¿Jan sum yatxatasa Diosax utjiw sañassti Bibliax munpacha? Janiw ukhamäkiti, Bibliax akham siwa: jan kuna uñachtʼäwimpi kunarus ratuki iyawsir jaqixa jan amuytʼasir jaqiwa sasa. Amuytʼañataki, Bibliax akham yatichi “jan amuytʼasiri jaqix taqi kuntix sapki ukaruxa iyawsakiwa, ukampis chʼikhi jaqixa amuytʼasiwa kawkinjamas saraski uka” sasa (Proverbios 14:15).

Ukhamasti, Diosax utjaskapuniw sañatakixa, ¿kamsnasa? Janiw Diosan utjatapatak yatktanti jan ukasti munasistuwa ukat jiwasat llakisirakiwa ukham sañatakixa, ¿kuna uñachtʼäwinakas utjistu?

Kunjam Diosasa ukaw qhansti

Atenas markankir wali yatiñan jaqinakaru parlkasaxa Pablox akham Diosat säna: “Juparakiw akapachsa ukhamarak taqi ukan utjirinaksa lurixa” sasa. Diosax jaqinakat llakisiwa, chiqpachansa “janiw jayankkiti sapaqat jiwasanakatxa” sasaw jupar istʼapkäna uka jan yäqasir jaqinakarux säna (Hechos 17:24-27).

¿Kunatsa Pablox Diosax utjiwa ukat jupan lurat jaqinakatsa llakisiwa sasax taqi chuyma sispachäna? Pablo pachpaw Romankir cristianonakarux uka tuqit akham sas qillqäna: “Diosan jan uñjkay yänakapax [kunjam Diosasa ukax] jupan luratanakap tuqiw  uñachtʼayasi. Qhanpachwa uñachtʼayasi kunapachatix aka Uraqix luratäkäns ukürutpacha jupax Diosätapa, chʼamapax jan tukuskirirakïtapa. Ukatpï jaqinakax jan kunjämats jupat jaltapkaspatixa” sasa (Romanos 1:20).

Kunjam Diosasa ukax luratanakapan qhan uñjasi ukanakatwa jutïr jananakan pä tuqit qhanañchasiskani. Uka uñachtʼäwinak sum uñakipasax jisktʼasiñamawa: “¿Kunjam Diosasa uk yatiñax kunjamsa yanaptʼitu?” sasa.

[3 janan qhanañchäwipa]

Bibliaxa janiw jan amuytʼasisa ‘Diosax utjiw’ sañasxa munkiti