Hmuh Hi Rinna A Ni
Hmuh Hi Rinna A Ni
“Agnostic mi chu Kristian sakhuate leh sakhaw dangte buaipui ṭhin Pathian leh nakin nun chungchâng ang chi-ah thu dik hriat theih a ni lo tih ngaih dân neitu a ni. Hriat theih a ni ngai dâwn lo a nih loh pawhin, tûna hriat theih a ni awzâwng lo.”—PHILOSOPHER BERTRAND RUSSELL-A, 1953.
“AGNOSTIC” tih thu mal phuah chhuaktu chu ramsa chanchin zir mi Thomas Huxley-a a ni. Kum 1825-a piang Huxley-a chu Charles Darwin-a hun laia mi a ni a, chanchhâwnna zirtîrna thlâwp tlattu a ni. Ani chuan kum 1863 khân “Kristiante sawi anga min hmangaihtu leh min ngaihsaktu” Pathian a awm tih finfiahna a hmuh loh thu a ziak a ni.
Tûn laiah mi tam tak chuan chûng mi ropui takte ngaih dân chu ṭâwmpuiin, an thil hmuh theihte chauh an rin tûr thu an sawi a. Anni chuan finfiahna awm lo mi tuemaw, a nih loh leh thil engemaw rin chu bum awlsam tak nihna niin an sawi mai thei bawk.
Pathian chu pâwngpaw rin mai tûrin Bible chuan min beisei em? Beisei lo. Bible chuan finfiahna awm lo mite thusawi rin chu mâwlna—âtna hial—niin a sawi a ni. “Mi mâwl chuan thu tin a ring a, mi remhria erawh chuan a kalna a en ṭha ṭhîn,” tiin.—Thufingte 14:15.
Chuti a nih chuan Pathiana rinna neih chu eng nge ni ang? Pathianin min hmangaihin min ngaihsak a ni tih finfiahna chu sawi loh, amah a awm a ni tih finfiahna engemaw tal a awm em?
Pathian Miziate Târ Lan A Ni
Bible ziaktu Paula chuan Atheni khuaa mi fingte hnêna thu a sawi khân Pathian chu “khawvêl leh a chhûnga thil zawng zawng siamtu” a nih thu a sawi a. Ani chuan thil rinhlelh hmang tak a thusawi ngaithlatute hnênah chuan Pathianin mihringte a ngaihsakzia leh ani chuan ‘min hlat loh ṭheuhzia’ a hrilh a ni.—Tirhkohte 17:24-27.
Engvângin nge Paula chuan Pathian a awm tih leh Ani chuan a mihring siamte a ngaihsak tih a rin tlat? A chhan pakhat chu Rom khawpuia a Kristianpuite hnêna a lehkha thawnah a târ lang a ni: “Thil hmuh theih loh [a miziate chu] khawvêl siam tirh ata fiah taka hmuhin a awm a, thil siamah chuan a lang a ni,” tia Pathian chungchâng a sawi khân.—Rom 1:20.
A dawta thuziakahte chuan Pathian thil siama chiang taka lang a mize pathum chu târ lan a ni ang. Chûng entîrnate chu i bih chian pahin, ‘Engtin nge hêng Pathian miziate zirna hian min nghawng?’ tiin inzâwt ang che. (w08 5/1)
[Phêk 3-naa thu lâk chhuah]
Bible chuan Pathian chu pâwngpaw rin mai tûrin min beisei lo