Bo Tin ku Mira pa Bo Kere?

“Un agnóstiko ta un persona ku ta pensa ku ta imposibel pa hende haña sa e bèrdat tokante asuntunan manera e eksistensia di Dios i un bida den futuro ku pa religion kristian i otro religionnan ta importante. Òf, si e no ta totalmente imposibel, en todo kaso, aktualmente e ta imposibel.”​—FILÓSOFO BERTRAND RUSSELL, 1953.

E HÒMBER ku a inventá e palabra “agnóstiko” tabata un zoólogo ku yama Thomas Huxley. Huxley, kende a nase na 1825, a biba den e mesun tempu ku Charles Darwin i a apoyá e teoria di evolushon. Na 1863, Huxley a skirbi ku e no por a mira ningun evidensia ku ta eksistí un Dios ku “ta stima nos i ta interesá den nos manera kristianismo ta pretendé.”

Hopi hende ta pensa meskos ku e hòmbernan prominente ei, ya ku nan ta bisa ku nan ta kere solamente den loke nan por mira. Podisé nan ta bisa ku un hende ku ta kere den un persona òf algu sin ku e tin prueba ku e ta eksistí ta un hende ku ta kere siegamente den loke otronan ta bisa.

Beibel ta bisa ku nos mester kere siegamente den Dios? Al kontrario! Beibel ta mustra ku ta naïf—asta un bobedat—pa kere den deklarashonnan pa kual no tin prueba. Beibel ta bisa: “Hende sin eksperensia ta kere tur kos ku bis’é, hende sabí mes ta pensa.”​—Proverbionan 14:15, BPK.

Pero, kiko di kere den Dios? Realmente tin evidensia ku Dios ta eksistí, te p’e ta stimá nos i ta interesá den nos?

Dios Su Kualidatnan Ta Ser Revelá

Ora Pablo, e eskritor di Beibel, tabata papia ku un grupo di intelektual di Atenas, el a deklará ku Dios “a traha mundu i tur kos ku tin den dje.” Pablo a bisa su oyentenan sképtiko ku Dios ta interesá den humanidat i ku, de echo, “e no ta leu di kada un di nos.”​—Echonan 17:​24-27.

Dikon Pablo tabata konvensí ku Dios ta eksistí i ku e ta interesá den Su kreashon humano? Pablo a revelá un di e motibunan ora el a skirbi un karta na su kompañeronan kristian na Roma. Relashoná ku Dios, el a bisa: “Desde kreashon di mundu su atributonan invisibel . . . a wòrdu mirá klaramente, siendo komprendí dor di loke a wòrdu trahá.”​—Romanonan 1:20.

E siguiente páginanan ta presentá tres kualidat di Dios ku nos por mira bon kla den e kosnan ku el a krea. Segun ku bo ta analisá e ehèmpelnan aki, puntra bo mes: ‘Ki efekto loke mi ta siña tokante e kualidatnan di Dios tin riba mi?’

[Komentario na página 3]

Beibel no ta apoyá e idea ku nos mester kere siegamente den Dios