Faatoʻā Talitonu Lava Ina ua Vaai

“O se tagata e masalosalo i le iai o le Atua, e manatu e lē mafai ona iloa i le taimi nei le mea moni e faatatau i mataupu e faatatau i le Atua ma se olaga i le lumanaʻi, lea e manatu mamafa i ai le lotu Kerisiano ma isi lotu. Ia, ae a faapea foʻi o le a mafai i le lumanaʻi pe leai foʻi, ae i le taimi nei lava ia e lē o mafai.”—LE FAI FILOSOFIA O BERTRAND RUSSELL, I LE 1953.

O LE tagata na amata mai ai le faaupuga “masalosalo i le iai o se Atua,” o se saienitisi e suʻesuʻeina olaga o manu vaefā, o lona igoa o Thomas Huxley. Na fanau Huxley i le 1825, o le vaitaimi foʻi lea na ola ai Charles Darwin, o sē na lagolagoina le aʻoaʻoga o le evolusione. I le 1863, na tusia ai e Huxley e leai se faamaoniga na te iloa ai e iai se Atua o loo “alofa ma naunau mai iā i tatou, e pei ona fai mai ai le Faa-Kerisiano.”

O le toʻatele o tagata i aso nei e ioe i manatu o na tagata lauiloa, i le faapea mai e faatoʻā latou talitonu lava i se mea pe a latou vāai i ai. E latou te ono faapea mai, o se mea valea le talitonu i se tasi po o se mea e lē mafai ona faamaonia le iai.

Po o faapea mai le Tusi Paia e ao ona tatou talitonu i le Atua, e aunoa ma ni faamaoniga e iloa ai o loo soifua o ia? E matuā tuufaafeagai lava ma le mea o loo aʻoaʻo mai e le Tusi Paia. Ua faaalia i le Tusi Paia e lē o se faiga atamai lenā faiga—ma o se mea valea foʻi—le talitonu i faamatalaga e leai ni faamaoniga e iloa ai le moni. Ua taʻua i le Tusi Paia: “O lē ua faigofie [leai se poto masani], e talia e ia upu uma; a o lē ua mafaufau, ua faautauta o ia i lona ala.”—Faataoto 14:15.

Ae faapefea le talitonu i le Atua? Pe e iai se faamaoniga e iloa ai o loo soifua le Atua, ma o loo alofa mai ma naunau mai iā i tatou?

Faamaonia i Uiga o le Atua

A o lauga atu le tusitala o le Tusi Paia o Paulo i se vaega o tagata atamamai o Atenai, sa ia faapea atu, o le Atua na “faia le lalolagi ma mea uma ua iai.” Sa taʻu atu e Paulo i lana ʻaufaalogologo faatalitonugatā e faapea, e naunau mai le Atua i tagata, ma o le mea moni, “e lē mamao o ia mai iā i tatou taʻitoʻatasi.”—Galuega 17:24-27.

Aiseā na talitonu ai Paulo o loo soifua le Atua, ma o loo naunau mai o ia i tagata na Ia foafoaina? Na faailoa mai e Paulo se tasi o māfuaaga ina ua ia tusi i uso Kerisiano i le aai o Roma. Na ia faapea atu e uiga i le Atua: “O ona uiga lē vaaia, ua vaaia lava ia talu ona faia le lalolagi, ona ua mafai ona vaaia i mea na faia.”—Roma 1:20.

Ua taʻu mai i itulau o loo mulimuli mai uiga e tolu o le Atua, lea e mafai ona iloa manino mai i mea na ia foafoaina. A o e iloiloina nei faaaʻoaʻoga, ia fesili ifo iā te oe lava, ‘O le ā se aafiaga iā te aʻu o le aʻoaʻoina o nei uiga o le Atua?’

[Faamatalaga faaopoopo i le itulau 3]

E lē o faapea mai le Tusi Paia e ao ona tatou talitonu i le Atua, e aunoa ma ni faamaoniga o loo soifua o ia