Ku Kholwa Hi Ku Vona

“Munhu loyi a nga pfumeriki leswaku Xikwembu xi kona, u ehleketa leswaku a swi koteki ku tiva ntiyiso malunghana na xona ni vutomi bya nkarhi lowu taka, ku nga timhaka leti vukhongeri bya Vukreste ni byin’wana byi ti karhatelaka ku ti tiva. Kumbe loko ku ri leswaku swa koteka hakunene ku ti tiva, a swi koteki ku tiva timhaka teto sweswi.”—MUTIVI WA FILOSOFI BERTRAND RUSSELL, 1953.

WANUNA loyi a sunguleke rito leri hlamuselaka vanhu lava nga pfumeliki leswaku Xikwembu xi kona, a ku ri mutivi wa swiharhi la vuriwaka Thomas Huxley. Huxley u velekiwe hi 1825, u hanye nkarhi wun’we na Charles Darwin naswona a a seketela dyondzo ya ku tiendlekela ka swilo. Hi 1863, Huxley u tsale leswaku a nga byi voni vumbhoni bya leswaku ku ni Xikwembu lexi “hi rhandzaka ni ku hi khathalela hilaha vukhongeri bya Vukreste byi vulaka hakona.”

Vanhu vo tala namuntlha va pfumelelana ni mavonelo ya vavanuna volavo lava a va ri ni nsusumeto lowukulu eka vanhu, va vula leswaku va ta kholwa ntsena eka swilo leswi va swi vonaka. Va nga ha vula leswaku i vuphukuphuku ku tshemba leswi munhu a swi vulaka kumbe nchumu wo karhi handle ko va ni vumbhoni bya swona.

Xana Bibele yi vula leswaku hi fanele hi pfumela eka Xikwembu handle ko va ni vumbhoni bya leswaku xi kona? Nikatsongo. Bibele yi vula leswaku i vuphukuphuku ku pfumela eka leswi vanhu va swi vulaka, leswi va nga riki na vumbhoni bya swona. Bibele yi ri: “Un’wana ni un’wana la nga riki na ntokoto u pfumela rito rin’wana ni rin’wana, kambe lowo tlhariha u xiyisisa magoza yakwe.”—Swivuriso 14:15.

Kutani ku vuriwa yini hi ku pfumela eka Xikwembu? Xana byi kona hakunene vumbhoni bya leswaku Xikwembu xi kona, hi nga ha vuli mhaka ya leswaku xa hi rhandza ni ku hi khathalela?

Timfanelo Ta Xikwembu Ti Paluxiwile

Loko Pawulo, mutsari wa tibuku tin’wana ta Bibele, a vulavula ni ntlawa wa swidyondzeki swa le Atena, u vule leswaku Xikwembu xi ‘endle misava ni swilo hinkwaswo leswi nga eka yona.’ Pawulo u byele vayingiseri vakwe lava nga pfumeriki eka Xikwembu, leswaku xi ni mhaka ni vanhu nileswaku entiyisweni a xi le “kule ngopfu ni un’wana ni un’wana wa hina.”—Mintirho 17:24-27.

Ha yini Pawulo a a khorwiseka leswaku Xikwembu xi kona ni leswaku xa khathala hi vanhu lava xi va vumbeke? Pawulo u boxe xivangelo xin’wana loko a tsalela Vakreste-kulobye va le mutini wa Rhoma. U vule leswi hi Xikwembu: “Timfanelo ta xona leti nga vonakiki ta voniwa ku sukela loko misava yi tumbuluxiwile ku ya emahlweni, hikuva ti xiyeka hi swilo leswi endliweke.”—Varhoma 1:20.

Matluka lama landzelaka ma ta vulavula hi timfanelo tinharhu ta Xikwembu leti nga voniwaka kahle eka swilo leswi xi swi tumbuluxeke. Loko u ri karhi u kambisisa swikombiso leswinharhu, tivutise, ‘Xana ku dyondza hi timfanelo leti ta Xikwembu swi ndzi khumba njhani?’

[Nkomiso eka tluka 3]

Bibele a yi yi seketeli mhaka ya leswaku hi fanele hi pfumela eka Xikwembu handle ko va ni vumbhoni bya leswaku xi kona