Guutip pissaanera ullorissani takuneqarsinnaavoq

“Qilaap tungaanut qiviaritsi, takussagissilu! Kia pinngortippaa? Amerlaqisunik sakkutooqartillugu sorsukkiartortitsisartup tamaasa immikkut atiisigut taasarpai. Nakuussutsi pissaassutsilu angeqimmata ataasiinnarmilluunniit minitaqarsimanngilaq.” — ESAJA 40:26.

SEQINERPUT ulloriaavoq nalinginnaasoq. Taamaakkaluartorli tiggussimanera nunarsuup tiggussimaneranit 330.000-ileriaataanit anginerungaarpoq. Ullorissat eqqaaniittut seqinermit mikinerupput. Ullorissalli allat, assersuutigalugu V382 Cygni-mik atilik, seqinitsinnit 27-riaammik angineruvoq.

Seqinerput nukimmik qanoq annertutigisumik tunisisarpa? Takorlooriaruk kilometerinit 15-init ungasitsigisumiillutit ikuallannerup kissassusaa malugigit. Seqineq agguaqatigiissillugu nunarsuarmiit 150 millionit kilometerinit ungasitsigaaq. Taamaakkaluartoq seqinnarissumi kissaata ameq pullartanitsissinnaavaa! Tupinnaannartumik seqernup nukinga taamaallaat 1 milliardileriaataata missaa nunarsuarmut annguttarpoq, taamaakkaluartorli nukimininnguaq taanna nunarsuarmi uummassuseqartitsisinnaavoq.

Misissueqqissaartartut naatsorsorsimavaat seqinitsinninngaanniiginnaq nukiup nunarsuartut ittut 31 trillionit piujuartissinnaagaluarai. Nukiup tunniussaa allatut oqaatigissagutsigu: Seqernup nukinga tamakkerlugu sekundiinnarmik atorneqarsinnaagaluarpat, Amerikap nukimmik ullumikkut atuinerata assinganik “ukiunik 9.000.000-inik naammattumik pilersorsinnaagaluarpaa”, Space Weather Prediction Center-ip (SWPC) nittartagaani allassimavoq.

Nukik seqernup iluaninngaanneerpoq — atomreaktorip atomit aserorlugit nukik supillugulusooq aallartittarpaa. Seqineq angingaarmat ilualu ussingaarmat ukiut millionillit qaangiukkaangata nukik pilersinneqartoq aatsaat anillattarpoq. “Seqineq nukimmik pilersitsiunnaaraluarpat aatsaat ukiut 50.000.000-illit qaangiuppata nunarsuarmi malugineqassagaluarpoq!”, SWPC-p nittartagaani allassimavoq.

Una eqqarsaatigeriaruk: Unnukkut allaaqqissoq qilaap tungaanut qiviaruit ullorissat tusindillit immikkut tamarmik seqinitsitulli nukimmik annertuumik pilersitsisartut takussavatit. Misissueqqissaartartut ilimagaat milliardilippassuarnik avataarsuarmi ulloriaqartoq!

Ullorissat taakku tamarmik suminngaanneerpat? Misissueqqissaartartut amerlanerit tunngaviatigut paasinngikkaluarlugu isumaqarput ukiut 14 milliardit qaangiuttut missaanni nunarsuaq tassanngaannaq qaarnersuakkut pinngorsimasoq. Biibilimili allassimavoq: “Pileqqaarneranni Guutip qilak nunalu pinngortippai.” (1 Mosesi 1:1) Qularutissaanngilaq, Pinngortitsisoq nukissiuuterujussuarnik ullorissanik taasakkatsinnik pinngortitsisinnaammat ‘pissaangaartutut’ oqaatigineqarsinnaavoq. — Esaja 40:26.

Guutip pissaanini qanoq atortaraa

Jehovap Guutip piumasaminik iliortut tapersersorlugit pissaanini atortarpaa. Assersuutigalugu Guuti pillugu allanik ilinniartitsinermini apustili Paulusip nukini tamaasa atortarpai. Paulusi pissaanilissuunngilaq ajunngitsorpassuarnilli iliuuseqartarpoq naak assortorneqaraluaqaluni.  Qanoq? Miserratiginngilaa “pissaaneq asseqanngitsoq” Guutimit pisimallugu. — 2 Korinthimiut 4:7-9.

Aamma Jehovap Guutip najoqqutassiaanik piaaralutik maleruaajumanngitsunut pissaanini atortarsimavaa. Guutip pissaanini atorlugu Sodomamik Gomorramillu suujunnaarsitsisimanera aamma Noap nalaani ulersuaqartitsisimanera Jiisusip Kristusip assersuutitut taavai. Jehovap pissaanini atorlugu najoqqutassiaminik maleruaajumanngitsunik aserueqqingajalernera Jiisusip siulittuutigaa. — Matthæusi 24:3, 37-39; Lukasi 17:26-30.

Ilinnut qanoq sunniuteqarpa?

Guutip pissaanera ullorissani ersarilluinnartoq eqqarsaatigeqqissaareerlugu immaqa Daavitut oqarumassaatit: “Takugaangakkit qilak pigisat, assappit pinngortitaat, qaammat ullorissallu tassani ivertitatit, taava inuk suummat eqqaasarpiuk, inuup qitornaa suummat isumagisarpiuk?” — Tussiaat 8:4, 5.

Aap, avataarsuanut naleqqiulluta qanoq mikitigaluta paasillugu maniguussimanarpoq. Guutilli pissaaneqarnera pissutigalugu nikallussanngilagut. Jehovap pruffiiti Esaja oqaatsinik tuppallernartunik ukuninnga allatsippaa: “Qasusoq nakussatsittarpaa, nukillaangasoq pissatsittarpaa. Nukappiaqqat qasulersaraluarput nukillaalersarlutillu, angutit inuusuttut naakkiuttarput orlusarlutillu. Kisianni [Jehovamik] neriuffiginnittut nutaanik nukinissapput, sulunissapput nattoralittut. Arpassapput qasunatik, ingerlassapput nukillaarnatik.” — Esaja 40:29-31.

Guutip peqqussutaanik iliuuseqarusukkuit anersaani illernartoq atorlugu tapersersorumaaraatit qularutigissanngilat. Tamannali qinnutigisariaqarpat. (Lukasi 11:13) Guutip ikiuineratigut misiliutaasut suulluunniit anigorniarsinnaavatit ajunngitsumillu iliorniarninnut nukissaqalersinnaallutit. — Filippimiut 4:13.

[Qupp. 7-mi issuagaq]

Guutip ikiuineratigut ajunngitsumik iliorniarninnik nukissaqalersinnaavutit

[Qupp. 7-mi assiliartat]

Saamerlermiit: Malstrømsgalakse, ulloriaqatigiit Tartutuuttut, Siattut iluanni pujoralassuaq, Andromedagalakse

[Qupp. 7-mi assiliartat]

Seqernup tiggussimanera nunarsuup tiggussimaneranit 330.000-ileriaataanit anginerungaarpoq

[Qupp. 7-mi suminngaanneernera]

Tartutuuttut: NASA, ESA aamma AURA/​Caltech; qulaaniittut allat tamarmik: National Optical Astronomy Observatories