Gugma sa Diyos Nadayag Diha sa Gugma sa Inahan

“Malimot ba ang usa ka asawa sa iyang masuso nga sa ingon dili niya kaluy-an ang anak sa iyang tiyan? Bisan kining mga babayhana makalimot, apan ako mismo dili makalimot kanimo.”—ISAIAS 49:15.

ANG usa ka inahan nagkugos sa iyang bag-ong natawo nga bata ug nagpasuso niini. Dayag nga pinangga kaayo niya kini. “Sa dihang gikugos nako sa unang higayon ang akong anak nga bag-o pang natawo,” matod sa usa ka inahan nga ginganlag Pam, “mibati dayon kog dakong gugma kaniya ug akong gibati nga kinahanglan nako siyang atimanon.”

Dayag nga kinaiyanhon kini, apan gipamatud-an sa mga panukiduki nga ang gugma sa inahan dakog epekto sa pagtubo sa bata. Ang usa ka taho nga gipatik sa World Health Organization Programme on Mental Health nag-ingon: “Gipakita sa mga pagtuon nga ang mga masuso nga giabandonar ug nahimulag sa ilang mga inahan nahimong magul-anon, usahay sobra pa gani ka mabalak-on.” Kining mao gihapong taho naghisgot bahin sa usa ka pagtuon nga nagpakita nga ang mga bata nga gipakitaag gugma ug pagtagad sukad sa masuso pa sila lagmit nga mas utokan kay sa mga bata nga pinasagdan.

Maylabot sa kahinungdanon sa gugma sa inahan, si Alan Schore, nga usa ka propesor sa sikyatriya sa UCLA School of Medicine sa Amerika, nag-ingon nga ang katakos sa usa sa pagpakiglabot sa uban nagdepende sa iyang relasyon sa iyang inahan sa bata pa siya.

Ikasubo nga tungod sa depresyon, sakit, o ubang mga suliran, mapasagdan tingali  sa inahan ang iyang anak o ‘malimtan [pa gani] ang iyang masuso.’ (Isaias 49:15) Apan talagsa ra kanang mahitabo. Sa pagkatinuod, ang mga inahan kinaiyanhong mobatig gugma sa ilang mga anak. Nadiskobrehan sa mga tigdukiduki nga panahon sa pagpanganak, modaghan ang hormone nga gitawag ug oxytocin, nga maoy hinungdan nga ang inahan magbati ug kini motabang usab sa lawas sa pagpatunghag gatas alang sa bata. Kini nga hormone, nga parehong gipatungha sa mga lalaki ug babaye, gituohan usab nga maoy magpalihok sa inahan sa pagpakitag tiunay nga gugma sa iyang anak.

Unsay Tinubdan sa Gugma?

Kadtong nagpasiugda sa teoriya sa ebolusyon nagtudlo nga ang tiunay nga gugma, sama nianang gibati sa inahan ug anak, mitungha nga sulagma ug napatunhay pinaagi sa natural selection (teoriya nga ang nahibilin maoy makapasibo sa palibot) tungod kay kini nakahatag ug kaayohan niadtong mibati niana. Pananglitan, ang usa ka magasin bahin sa pagkainahan nangangkon nga ang atong utok naggikan sa mananap ug pinaagi sa proseso sa ebolusyon mitubo diha niana ang parte nga maoy tinubdan sa atong emosyon. Kini konong parteha sa utok maoy hinungdan nga masuod ang inahan sa iyang masuso. Bisan tinuod nga nakatampo kini sa atong katakos nga mobati, makataronganon bang tuohan ang pangangkon nga ang gugma sa inahan alang sa iyang anak sulagma lang nga mitungha?

Buweno, tagda kining laing pangatarongan. Ang Bibliya nag-ingon nga ang mga tawo gilalang sa dagway sa Diyos, sa ato pa, duna siyay katakos nga ibanaag ang mga hiyas sa Diyos. (Genesis 1:27) Ang pangunang hiyas sa Diyos mao ang gugma. “Siya nga wala mahigugma wala makaila sa Diyos,” misulat si apostol Juan. Ngano? “Tungod kay ang Diyos gugma.” (1 Juan 4:8) Palihog matikdi nga kining tekstoha wala mag-ingon nga ang Diyos adunay gugma. Hinunoa, kini nag-ingon nga ang Diyos gugma. Siya ang Tinubdan sa gugma.

Ang Bibliya naghubit sa gugma niining paagiha: “Ang gugma hataas-ug-pailob ug maluloton. Ang gugma dili abughoan, kini dili manghambog, dili magpaburot, dili bastos, dili mangita sa kaugalingong kaayohan niini, dili mapasuko. Kini dili maghupot ug talaan sa kadaot. Kini dili magmaya sa pagkadili-matarong, apan magmaya uban sa kamatuoran. Kini moantos sa tanang butang, motuo sa tanang butang, molaom sa tanang butang, molahutay sa tanang butang. Ang gugma dili gayod mapakyas.” (1 Corinto 13:4-8) Makataronganon ba ang pagtuo nga kining hamili kaayong hiyas sulagma lang nga mitungha?

Unsay Epekto Niini Kanimo?

Samtang nagbasa ka sa kahubitan sa gugma sa nag-unang parapo, wala ka ba mangandoy nga unta pakitaan ka usab nianang matanga sa gugma? Natural lamang nga mobati kag sama niana. Ngano? Tungod “kay kita mga kaliwat man sa Diyos.” (Buhat 17:29) Kita gilalang nga modawat ug mopakitag gugma. Ug makaseguro kita nga ang Diyos adunay dulot nga gugma kanato. (Juan 3:16; 1 Pedro 5:6, 7) Ang teksto nga gikutlo sa sinugdanan niining artikuloha nag-ingon nga ang gugma sa Diyos kanato mas kusganon ug mas malungtaron kay sa gugma sa inahan sa iyang anak!

Apan mangutana ka tingali: ‘Kon ang Diyos maalamon, gamhanan, ug mahigugmaon, nganong wala man niya taposa ang pag-antos? Nganong gitugotan man niya nga mangamatay ang mga bata, magpadayon ang pagdaogdaog, ug madaot ang yuta tungod sa sayop nga pagdumala ug kadalo?’ Kinahanglang matubag kining mga pangutanaha.

Bisan unsa pa tingali isulti sa mga agnostiko, posible gayod nga masayran ang makapatagbawng tubag nianang mga pangutanaha. Milyonmilyong tawo diha sa gatosan ka nasod ang nahibalo na niana pinaagi sa pagtuon sa Bibliya uban sa mga Saksi ni Jehova. Kami nagdasig kanimo sa pagbuhat usab niana. Samtang mouswag ang imong kahibalo bahin sa Diyos pinaagi sa pagtuon sa iyang Pulong ug sa iyang mga linalang, imong masayran nga siya dili halayo kanimo ug dili lisod mailhan. Hinunoa, hayan nga makombinsir ka nga ang Diyos “dili halayo gikan sa matag usa kanato.”—Buhat 17:27.

[Blurb sa panid 8]

Ang gugma sa Diyos mas malungtaron kay sa gugma sa inahan sa iyang anak