Lerato la Modimo le Bonagala Leratong la Mma

“A fa mosadi a ka lebala leseanyana l’axwe, a lesa xo šôkêlwa ngwana yo a mmelexexo?—Le xe yêna a ka lebala, Nna nka se Xo lebale.”—JESAYA 49:15.

LESEA leo le sa tšwago go belegwa le dula ka boiketlo ka matsogong a mmago lona ge a dutše a le amuša. Boemo bjo ke bja borutho le lerato. Mma yo a bitšwago Pam o re: “Ge ke be ke kuka lesea la-ka ka lekga la mathomo, ke ile ka aparelwa ke maikwelo a lerato le boikarabelo bakeng sa ngwana yo yo mofsa.”

Gaešita le ge go bonala e le taba e lego molaleng, eupša nyakišišo e kgonthišeditše gore lerato la mma le na le tutuetšo e kgolo kgolong ya ngwana. Kgatišo yeo e gatišitšwego ke Lenaneo la World Health Organization la Bophelo bjo Bobotse bja Monagano e re: “Dinyakišišo di bontšhitše gore masea ao a lahlilwego le ao a kgaogantšwego le bo-mmago ona ga a thabe e bile a ba le kgateletšego, ka dinako tše dingwe go fihla bokgoleng bja gore a dule a tšhogile.” Kgatišo yona yeo e bolela ka nyakišišo yeo e bontšhago gore bana bao ba bontšhwago lerato e bile ba šetšwa go tloga e sa le ba banyenyane ba ka hlalefa kudu go feta bana bao ba hlokomologwago.

Ge a bolela ka bohlokwa bja lerato la mma, Alan Schore e lego moprofesara wa thuto ya tša monagano kua UCLA School of Medicine kua United States o re: “Tswalano ya mathomo ya ngwana, yeo a bago le yona le mmagwe, e šoma bjalo ka mohlala ka ge e hlamela sa ruri bokgoni bja motho bja go thoma ditswalano ka moka tša nakong e tlago tšeo di akaretšago maikwelo.”

Ka manyami, kgateletšego, bolwetši goba  mathata a mangwe a ka dira gore mma a hlokomologe ngwana wa gagwe goba a ‘lebale leseanyana la gagwe.’ (Jesaya 49:15) Eupša ke ka sewelo mma a lebalago leseanyana la gagwe. Ge e le gabotse, go bonagala ka tlhago bo-mma ba hlametšwe go rata bana ba bona. Banyakišiši ba utollotše gore nakong ya pelego, bo-mma ba ba le tekanyo e phagamego ya homoune yeo e bitšwago oxytocin yeo e dirago gore lešoko le thome gomme ka morago ya dira gore mma a kgone go tšweletša matutu. Go dumelwa gape gore yona homoune ye, yeo e tšweletšwago ke banna le basadi, e kgatha tema go direng gore mma a sware lesea la gagwe ka tsela e lerato le e se nago boithati.

Mothopo wa Lerato ke Mang?

Bao ba rutago thuto ya tlhagelelo ba re lerato le se nago boithati, le bjalo ka la magareng ga mma le ngwana wa gagwe, le ile la fo itiragalela gomme tlhago ya dira gore le dule le le gona ka gobane le be le hola batho. Ka mohlala, makasine wa inthaneteng o bitšwago Mothering Magazine o re: “Karolo ya mathomo ya bjoko bja rena yeo e bilego gona ka tlhagelelo go tlaleletša karolong yeo re e abetšego go bagologolo ba rena bao e lego digagabi, ke tshepedišo ya bjoko yeo e tšweletšago maikwelo. Karolo ye ya bjoko ke yona e dirago gore bo-mma ba kgone go ba le tswalano ya kgaufsi le bana ba bona.”

Ke therešo gore nyakišišo e utollotše gore tshepedišo ya bjoko yeo e tšweletšago maikwelo e kgatha tema ya bohlokwa maikwelong a rena. Lega go le bjalo, na taba ya gore lerato leo mma a ratago ngwana wa gagwe ka lona le bile gona ka baka la go gola mo go diregilego ka kotsi ga bjoko bjo re bo abetšego digagabing e a kwagala go wena?

Ela hloko tlhaloso e nngwe. Beibele e re batho ba bopilwe ka seswantšho sa Modimo, ke gore, ba e-na le bokgoni bja go bonagatša dika tša Modimo. (Genesi 1:27) Seka se segolo sa Modimo ke lerato. Moapostola Johane o ngwadile gore: “Yo a se nago lerato ga a tsebe Modimo.” Ka baka la’ng? “Gobane Modimo ke lerato.” (1 Johane 4:8) Hle ela hloko gore temana ye ga e re Modimo o na le lerato. Go e na le moo, e re Modimo ke lerato. Ke yena Mothopo wa lerato.

Beibele e hlalosa lerato ka tsela ye: “Lerato le na le bopelotelele e bile le botho. Lerato ga le hufege, ga le ikgantšhe, ga le ikgogomoše, ga le dire tša go leša dihlong, ga le nyake tša go ikhola, ga le rumolege. Ga le boloke pego ya bobe. Ga le thabele go se loke eupša le thaba le therešo. Le tiišetša tšohle, le dumela tšohle, le holofela tšohle, le kgotlelela tšohle. Lerato le ka mohla ga le fele.” (1 Bakorinthe 13:4-8) Na go bonagala go kwagala go dumela gore seka se se sebotse se bile gona ka go fo itiragalela?

O Ikwa Bjang?

Na o ile wa hlologelwa gore motho yo mongwe a go bontšhe lerato la mohuta wo ge o be o bala tlhaloso ya lerato serapeng seo se lego ka mo godimo? Ke ga tlhago gore o ikwe bjalo. Ka baka la’ng? Ka gobane ‘re bana ba Modimo.’ (Ditiro 17:29) Re bopetšwe gore re amogele le go bontšha ba bangwe lerato le bjalo. Le gona re ka kgodišega gore Modimo o re rata kudu. (Johane 3:16; 1 Petro 5:6, 7) Lengwalo leo le tsopotšwego mathomong a sehlogo se le bontšha gore lerato leo Modimo a re ratago ka lona ke le matla le leo le swarelelago kudu go feta leo mma a ratago ngwana wa gagwe ka lona!

Lega go le bjalo, o ka ipotšiša gore: ‘Ge e ba Modimo a le bohlale, a le matla e bile a e-na le lerato, ke ka baka la’ng a sa fediše tlaišego? Ke ka baka la’ng a dumelela bana gore ba hwe, a dumelela gore kgatelelo e tšwele pele le gore lefase le senywe ka taolo e mpe le megabaru?’ Tše ke dipotšišo tše di nago le tlhaologanyo tšeo di swanelwago ke dikarabo tše di kwagalago.

Go sa šetšwe seo se bolelwago ke batho bao ba dumelago gore ga go kgonege go tseba therešo ka ditaba tše bjalo ka Modimo le bophelo bja nakong e tlago, go a kgonega go hwetša dikarabo tše di kgotsofatšago tša dipotšišo tše. Batho ba dimilione dinageng tše makgolo ba hweditše dikarabo tše bjalo ka go ithuta Beibele le Dihlatse tša Jehofa. Bagatiši ba makasine wo ba go laletša gore o dire se se swanago. Ge tsebo ya gago ka Modimo e gola ka go ithuta Lentšu la gagwe le go ithuta tlholong ya gagwe, o tla lemoga gore ga se Modimo yo a lego kgole le rena le yo re ka se kgonego go mo tseba. Go e na le moo, o tla kgodišega gore Modimo ‘ga a kgole le yo mongwe le yo mongwe wa rena.’—Ditiro 17:27.

[Mantšu a ipiletšago a tsopotšwego go letlakala 8]

Lerato leo Modimo a re ratago ka lona ke leo le swarelelago kudu go feta leo mma a ratago ngwana wa gagwe ka lona