Kiteaia te Aroa o te Atua i Roto i te Aroa o te Metua Vaine

“E tika ainei i te vaine kia akangaropoina i tana tamaiti kai u, e kare atura e tangi ki te tamaiti a tona uaorai kopu? a, e tika ia ratou kia akangaropoina, kare ra au e akangaropoina ia koe.”​—ISAIA 49:15.

TEI roto i te nga rima o te metua vaine te pepe ou e te ikiiki ra aia i te pepe. E tutu maru e te aroa teia. “I toku mou mua anga i taku pepe ki roto i toku nga rima,” i karanga ai tetai metua vaine ko Pam te ingoa, “kua akakeu pakariia au no te aroa e te apainga no teia pepe ou.”

E akara anga tika tikai, kua akapapu mai te kimikimi anga e na te aroa maata o te metua vaine e akakeu ana i te tupu anga o tana pepe. Te akakite maira tetai pepa i neneiia e te Porokaramu no Runga i te Oraanga i te Pae Manako a te World Health Organization e: “Kua akaariia mai i roto i te au apiianga e ko te au pepe tei akarukenaia e tei akaateaia mai mei to ratou au metua vaine kare e mataora ana e te taitaia ra, i tetai au taime kua mataku tikai.” Te akakite maira rai teia pepa i tetai apiianga i te akakite anga mai e ko te au tamariki tei akaariia atu te aroa e te manako mei te pepe anga mai penei ka maata atu to ratou kite i to tetai au tamariki tei kopaeia.

No runga i te puapinga o te aroa o tetai metua vaine, te karanga ra a Alan Schore, e poropeta no te apiianga i te maki manako i ko i te Apii Rapakau Anga Vairakau o UCLA i Marike e: “Te riro ra te pirianga mua o te pepe, ma tona metua vaine ei aruanga, i te akakeu tinamou anga i te au tu o te tangata tataki tai kia tomo atu ki roto i te au pirianga vaitata pouroa i muri mai.”

 Ma te mii, penei na te manako taitaia, te maki, me kore tetai atu au taomi anga e akatupu ana kia akaruke tetai metua vaine i tana pepe me kore “kia akangaropoina i tana tamaiti kai u.” (Isaia 49:15) Kare i te mea matau kia akangaropoina tetai metua vaine i tana pepe. I te akaraanga kua porokaramuia te au metua vaine kia aroa i ta ratou tamariki. Kua kiteaia mai e te aronga kimikimi e i te tuatau anau anga te au mama, ka kake tetai kemikara oxytocin ki runga, tei akamaroiroi i te mamae o te uaua e i muri mai te akatae anga i te u. Kua irinaki katoaia e ko teia kemikara, tei akatupuia i roto i te au tane e te au vaine, e tuanga ta te reira i te maani anga i te au metua vaine kia akaari i te aroa e te karapii kore ki ta ratou pepe.

Eaa te Akamataanga o te Aroa?

“Te aronga te akamaroiroi ra i te irinaki anga i roto i te au mea tupu ua te apii maira ratou e, ko te aroa karapii kore mei te aroa rai i rotopu i tetai metua vaine e tana pepe, kua tupu ua mai te reira e kua ora mai no te mea kua puapingaia te aronga tei taangaanga i te reira. Te karanga ra tetai tianara no runga i te utuutu anga ei metua vaine e kua tupu ua mai to tatou roro no roto mai i te roro o te au manu torotoro mei te ovi rai, e ko te au mero o te manako ngakau te mea mua tei tupu mua mai i roto i te roro. Te karanga katoa ra rai teia tianara e na teia au mero nei i tauturu i te au metua vaine e ta ratou au pepe i te akatupu i teia au tu pirianga vaitata. E tika rai e, na teia au mero i tauturu mai i to tatou tu kite kia rauka te au manako ngakau, inara, e tau ainei tera kia koe e e mea tupu ua mai te aroa o te metua vaine no tana pepe?”

E akamanako ana i tetai atu akamaramaanga. Te karanga ra te Pipiria e kua angaia te tangata i roto i te tu o te Atua, koia oki, ma te tu kite i te akaata anga i te au tu o te Atua. (Genese 1:27) Te tu ngateitei rava atu o te Atua ko te aroa. “Ko tei kore e aroa ra, kare ïa i kite i te Atua,” i tata mai ei te apotetoro ko Ioane. No teaa ra? “Ko te Atua oki te aroa.” (1 Ioane 4:8) E akara ana e kare teia irava o te Pipiria e karanga ra e e aroa to te Atua. Mari ra, te karanga ra te reira e ko te Atua oki te aroa. Koia te Tumu o te aroa.

Te akataka maira te Pipiria i te aroa na roto i teia tu e: “E akakoromaki anga roa to te aroa, e te takinga-meitaki; kare te aroa e vareae, kare te aroa e akamaata, kare oki e akatietie, Kare e rave i te mea tau kore, kare e kimi i te meitaki nona uaorai, kare e riri vave, kare e manako kino ia etai ke; Kare e rekareka i te tuatua-tika kore, e rekareka ra i te tuatua-mou; E tapoki i te au mea katoa, e akarongo i te au mea katoa, e manakonako i te au mea katoa, e akakoromaki i te au mea katoa. Kare ua te aroa e kore.” (1 Korinetia 13:4-8) E mea tau ainei i te irinaki e e mea tupu ua mai teia au tu ngateitei rava?

Akapeea Koe i te Akakeuia Anga?

Ia koe e tatau ra i te akataka anga o te aroa i roto i te parakarapa i mua akenei, te inangaro tikai ra ainei koe kia akaari mai tetai tangata i taua tu aroa ra kia koe? E mea matauia e te anoano ra koe i taua inangaro ra. No teaa ra? No te mea “e tamariki tatou na te Atua.” (Angaanga 17:29) Kua angaia tatou kia rauka e kia akakite i taua aroa ra. E ka papu ia tatou e e oonu te aroa o te Atua no tatou. (Ioane 3:16; 1 Petero 5:6, 7) Te akakite maira te irava tei taikuia mai i te akamataanga o teia atikara e e pakari e e tinamou rava atu to te Atua aroa ia tatou, i to tetai metua vaine no tana pepe!

Penei ka manako paa koe e: ‘Me e pakari, e ririnui, e e aroa te Atua, eaa aia i kore ei e takore atu i te mamae? Eaa ra aia i akatika ua ai i te tamariki kia mate, kia tupu ua atu te kino, e te enua i te takinokinoia no te kore oki i akonoia e no te noinoi ra?’ E au uianga meitaki teia te anoanoia ra te au pauanga tau.

Noatu e eaa ta te aronga kare e irinaki ana e te vai ra te Atua ka karanga mai, ka kiteaia rai te au pauanga meitaki tikai ki taua au uianga. E mirioni ua atu te au tangata i roto i te au enua e anere ua atu tei kite mai i taua au pauanga na te apiianga i te Pipiria ma te Au Kite o Iehova. Te pati atu nei te aronga i nenei i teia tianara kia rave rai koe i te reira. Me maata mai toou kite i te Atua na te apiianga i tana Tuatua e i tana au mea i angaia, ka kite mai koe e kare aia i mamao ke atu e ka kiteaia. Kareka ra, penei ka papu tikai ia koe e “kare ra [te Atua] i atea ke atu ia tatou katoa nei.”​—Angaanga 17:27.

[Tataanga i te kapi 8]

E tinamou roa atu te aroa o te Atua no tatou i to te metua vaine no tana pepe