Unọmọ Esịm Solomon Islands

Ke Monday, April 2, 2007, ata akamba unyekisọn̄ ama etịbe ke ndusụk isuo ke Solomon Islands emi odude ke edere edem usiahautịn Australia. Akwa mbufịt mmọn̄ ama ọtọ ke ediyịp enyịn emen isuo emi odude ke Edem Usoputịn, owot owo 52, onyụn̄ emen ufọk emi owo 6,000 ẹkedụn̄ọde.

Kiet ke otu ebiet oro unyekisọn̄ emi ekenen̄erede ọsọn̄ ubọk ekedi Gizo, kpa esụk emi n̄kpọ nte owo 7,000 ẹdụn̄ọde ke Isuo Ghizo, emi edide kilomita 45 tọn̄ọ ke ebiet emi unyekisọn̄ oro ọkọtọn̄ọde. Ekpri esop Mme Ntiense Jehovah ke Gizo ke ẹketịm idem ndinịm Editi n̄kpa Jesus mbubịteyo oro. (1 Corinth 11:23–26) Ke eyo ama ekesiere, utịn ama asiaha ediye ediye, inyan̄ onyụn̄ ana sụn̄-n̄ nte esidide. Edi ke ayakde minit 21 ndimia itiaba usenubọk, unyekisọn̄ ama etịbe.

Unyekisọn̄!

Ron Parkinson, ebiowo esop ye Dorothy n̄wan esie ẹkesụk ẹnam udia ke ini unyekisọn̄ oro eketịbede. Ron ọdọhọ ete: “Ufọk nnyịn ekenyen̄e nte isịp mbakara, edi ikọduọhọ. Uyom akpakasiak owo utọn̄. Mme kọbọd, n̄kpọ mbanaufọk, mme usan, eso, ikpan̄, ndido mbakara, ye mme n̄kpoduoho eken ẹma ẹsuana ẹyọhọ isọn̄. Ikememke utom ndifehe n̄wọrọ, edi ima isịn ukeme ifehe iwọn̄ọ. Ekpeme ama asiak Dorothy ukot.”

Tony ye Christine Shaw, kpa mme isụn̄utom oro ẹdụn̄de ẹkpere ẹma ẹfen̄e n̄ko ẹwọrọ ke ufọk. Christine ọdọhọ ete: “Isọn̄ ama enen̄ede enyek tutu nduọ nnyụn̄ n̄kemeke aba ndidaha nda. Akwa mbufịt mmọn̄ ama ọtọ emen mme ufọk tutu mmọ ẹdifọfiọrọ nte ubom ke enyọn̄ mmọn̄. Mme awat ubom ẹma ẹwat ke mbrenyịn ẹyom m̀mê iyokụt owo inyan̄a. Akwa unyekisọn̄ efen ama etịbe—ekem en̄wen afiak etịbe, ye ntre ntre ke ofụri usen ition. Ke akpanikọ, ama enyene ndịk etieti!”

Ata Akwa Mbufịt Inyan̄ibom

Ke ini unyekisọn̄ oro eketịbede, Patson Baea okodu ke isuo obio mmọ ke Sepo Hite, ndien tọn̄ọ do sịm Gizo edi n̄kpọ nte kilomita 6. N̄kpọ eketie didie ye Patson ye ubon esie ke ini unọmọ emi?

Patson ọdọhọ ete: “Mma mfehe ke mbenesụk oro mbịne Naomi n̄wan mi, ye nditọ nnyịn inan̄. Unyekisọn̄ oro ama osio mmọ ọduọk ke isọn̄, edi n̄kpọ ikanamke mmọ. Idem ama enyek nditọ nnyịn, ndusụk mmọ ẹma ẹtuan̄a. Ami ye eka mmọ ima idọn̄ mmọ esịt.

“Inyan̄ibom ama ọtọn̄ọ nditịmede. Ata akwa mbufịt okoyom ndidaha. Mma n̄kere ke mmọn̄ ekeme ndifụk ekpri isuo nnyịn, onyụn̄ ekeme n̄ko ndimen eka mi, Evalyn, oro okodụn̄de ke ekpri isuo ke mbọhọ oro. Mma nsọsọp ndọhọ ubon mi ẹdụk ubom engine nnyụn̄ n̄wat n̄ka ndinyan̄a enye.

 “Ke ima ikawat ito mi isịm ko, akwa mbufịt mmọn̄ ama ebe ke idak ubom nnyịn. Inyan̄ ama ọtọn̄ọ ndidaha. Ke ima ikesịm ebiet emi eka mi okodude, ibuot ama oyon̄ enye, idem onyụn̄ enyek enye tutu enye ikemeke ndidụk mmọn̄. Naomi n̄wan mi ye Jeremy eyen nnyịn emi edide isua 15, ẹma ẹmụm eka mi ẹwọk ke idiọk mmọn̄ oro ẹkesịm ubom. Ekem, ima iwat enen̄ede ọsọp idaha.

“Inyan̄ ama enen̄ede osụhọde ana ndien, osion̄o mme n̄kpọ obon ke ofụri isuo oro. Ikebịghike, mmọn̄ ama ọtọ emen isuo mbiba, onyụn̄ emen ufọkisen nnyịn. Mmọn̄ ama emen ufọkidụn̄ nnyịn onyụn̄ abiat ediwak inyene nnyịn. Ke inyan̄ ama okosụhọde ana, nnyịn ima ision̄o Bible ye mme n̄wedikwọ ke n̄wụre ufọk nnyịn ika Gizo.”

Mme owo ẹma ẹkpan̄a, ediwak n̄kpọ ẹnyụn̄ ẹtak. Edem usoputịn Isuo Ghizo ọkọdiọk akan. Akwa mbufịt ama osobo obio 13 ke nsụhọde n̄kaha!

Kpa ke okoneyo usen oro, owo 22 ẹma ẹsop idem ke Ufọkmbono Obio Ubọn̄ Mme Ntiense Jehovah ke Gizo ndinịm Editi n̄kpa Jesus. Esịt ama enem nnyịn ndifiọk ke owo ndomokiet ke otu emi ikenen̄ekede ida unan. Ron oro ikebemde iso itịn̄ iban̄a ọdọhọ ete: “Ikan̄ ilektrik ikodụhe, utuenikan̄ nnyịn ama onyụn̄ obomo. Ntre, Brọda Shaw akada torch ọnọ utịn̄ikọ. Nnyịn ima isịne ke ekịm oro inen̄ede ikwọ ikwọ ke ndinem uyo ikọm Jehovah.”

Mme N̄kpọ Un̄wam

Ke ini mbụk unọmọ emi ekesịmde Honiara, ibuot obio idụt oro, n̄kọk itieutom Mme Ntiense Jehovah do ẹma ẹsọsọp ẹnọ un̄wam. N̄kọk itieutom Mme Ntiense Jehovah emi ẹma ẹsọsọp ẹkot ke urụk ukopikọ ẹkop ke n̄kpọ ikanamke ediwak Mme Ntiense do. Ẹma ẹsio mbon oro ẹkemede ndiberi edem ẹdọn̄ ẹte ẹkeyom Ntiense oro okodụn̄de ke Isuo Choiseul. Ẹma ẹkekụt enye, n̄kpọ ikonyụn̄ inamke enye. Ẹma ẹnyụn̄ ẹnọ mbon Gizo okụk ẹda ẹn̄wam idem.

Mbon n̄kọk itieutom ẹma ẹdụk akpa ubomofụm ke Thursday ẹdisịm Gizo. Craig Tucker, owo Kọmiti N̄kọk Itieutom ọdọhọ ete: “Nnyịn ima itan̄ ediwak ekebe oro ẹkedọn̄de n̄kpọ un̄wam. Owo ikemenke kpukpru mbiomo mme akaisan̄ eken, koro ufan̄ mîkodụhe, edi esịt ama enem nnyịn nte ke ẹma ẹmen kpukpru mbiomo nnyịn. Nnyịn ikesịne ke otu mbon oro ẹkebemde iso ẹnọ n̄kpọ un̄wam ẹsọk mbon unọmọ oro. Ẹma ẹda mme n̄kpọ un̄wam eken ke ubom ẹdisịm ke usen iba ẹma ẹkebe.”

Ofụri emi, Tony Shaw ye Patson Baea, ọkọrọ ye Mme Ntiense eken ke Gizo ẹma ẹwat hour iba ke ubom ẹken̄wam Mme Ntiense oro ẹkedude nsannsan ke Isuo Ranongga. Isuo emi edi kilomita 32 ke uniọn̄, onyụn̄ edi kilomita 8 ke ubom. Unyekisọn̄ oro ama osobo isuo emi anam enye akabade ebiet ekpri obot! Etie nte mmọn̄ oro ọkọtọde ke mme isuo oro akanam ata akwa mbufịt inyan̄ibom adaha ofụk ofụri isuo mbọhọ oro.

Tony ọdọhọ ete: “Mme Ntiense do ẹma ẹnen̄ede ẹkop inemesịt ndikụt nnyịn. N̄kpọ ikanamke mmọ, edi ndịk unyekisọn̄ oro ikayakke mmọ ẹna aba ke ufọk. Ubom nnyịn ekedi akpa ubom oro akadade n̄kpọ un̄wam edi. Nnyịn ima idiana ye mmọ ibọn̄ akam ke ofụri esịt ikọm Jehovah mbemiso inyọn̄de.”

Patson ọdọhọ ete: “Nnyịn ima ifiak ida n̄kpọ un̄wam isọk Mme Ntiense Jehovah ke Ranongga inyụn̄ ikoyom ubon Mme Ntiense oro ẹkedụn̄de ke nsannsan ikpehe isuo oro. Ima idikụt Matthew Itu ye ubon esie ẹdịbede ke esịtikọt. Mmọn̄eyet idatesịt ama asiaha mmọ ndifiọk ke nnyịn ikefreke mmọ! Unyekisọn̄ oro ama osobo ufọk mmọ ọkọrọ ye ekese ufọk ke obio oro. Nte ededi, se ikenen̄ede ibehe mmọ ekedi kpukpru owo ke ubon oro ndifiak nnyene Bible.”

Mbon Oro Mîdịghe Mme Ntiense Ẹtoro

Mbon oro mîdịghe Mme Ntiense ẹma ẹkụt utọ ima Christian oro. Craig Tucker ọdọhọ ke  “ọkọmbụk n̄kpọntịbe oro mîkamaha usụn̄ oro ukara ẹkenọde mme owo un̄wam ama okop n̄kpaidem onyụn̄ enem esịt ndifiọk ke Mme Ntiense Jehovah ẹma ẹnọ nditọete mmọ udia, ọfọn̄itai, ye mme akpan n̄kpọ eken ke ndondo oro unyekisọn̄ oro eketịbede.” Patson onyụn̄ ọdọhọ ete: “Mbon obio Ranongga ẹma ẹtoro nte nnyịn ikanamde n̄kpọ usọp usọp, ẹnyụn̄ ẹseme ke ufọkabasi mmimọ ikekemeke ndin̄wam mmimọ.” Mma kiet ọkọdọhọ ete, “Ufọkabasi mbufo ẹma ẹnen̄ede ẹsọp ẹnọ un̄wam.”

Mme Ntiense ẹma ẹn̄wam mbon en̄wen n̄ko. Christine Shaw ọdọhọ ete: “Ke ini ikakade ekpri ufọkibọk oro ẹkebọpde ke Gizo man ẹda ẹnọ mbon unọmọ oro usọbọ, nnyịn ima ikụt ebe ye n̄wan oro ikosobode ke ndondo oro. Mmọ mbiba ẹma ẹda unan, esịt onyụn̄ enen̄ede ọduọ mmọ. Mbufịt oro ama owot eyeyen mmọ. Nnyịn ima isọsọp ika ufọk ikada udia ye ọfọn̄ isọk mmọ. Esịt ama enen̄ede enem mmọ.”

Ke akpanikọ, mbon oro ẹsobode utọ unọmọ emi ẹsiyom un̄wam efen efen ke adianade ye n̄kpọ obụkidem. Mmọ ẹsinen̄ede ẹyom ndọn̄esịt oro Ikọ Abasi kpọt, kpa Bible, ọnọde. Ron ọdọhọ ete: “Ndusụk mme ọkwọrọ ederi ẹkedọhọ ke Abasi akamia mme owo ufen idiọkn̄kpọ mmọ. Edi nnyịn ima ida Bible iwụt mmọ ke Abasi isibakke ibak. Ediwak owo ẹma ẹkọm nnyịn ke ndibuana ndọn̄esịt eke spirit emi ye mmọ.”—2 Corinth 1:3, 4; James 1:13. *

[Ikọ Idakisọn̄]

[Ndise/Ndise obio ke page 13]

(Ama oyom ndikụt nte enye enen̄erede etie, se n̄wed)

Choiseul

Ghizo

Gizo

Ranongga

HONIARA

AUSTRALIA

[Ndise ke page 15]

Ubon Baea ke ubom engine mmọ

[Ndise ke page 15]

Ufọkmbono Obio Ubọn̄ emi edi n̄kukụre ufọk oro okosụhọde ke Lale ke Isuo Ranongga

[Ndise ke page 15]

Ata akwa mbufịt inyan̄ibom ama osobo Gizo