Kotsi e Hlasela Dihlakahlaka tša Solomon

Ka Mošupologo, April 2, 2007, tšhišinyego ya lefase ya bogolo bja 8,1 e ile ya hlasela karolo ya dihlakahlaka tša Solomon, e lego dihlakahlaka tša molatšatšing tšeo di lego ka leboa-bohlabela la Australia. Ka metsotswana e sego kae, maphoto a magolo a meetse, ao go bolelwago gore e be e le a bophagamo bja dimithara tše 10, a ile a gogola dihlakahlaka tše di lego Naga-seleteng ya ka Bodikela gomme a bolaya batho ba 52 le go tlogela ba 6 000 ba se na magae.

Le lengwe la mafelo ao a ilego a senywa kudu e be e le Gizo, motse woo o lego lebopong o nago le baagi ba ka bago 7 000 sehlakahlakeng sa Ghizo, e lego bokgole bja dikhilomithara tše 45 go tloga moo tšhišinyego ya lefase e thomilego gona. Phuthego e nyenyane ya Dihlatse tša Jehofa ya Gizo e be e fagahletše go gopola Segopotšo sa lehu la Jesu sa ngwaga le ngwaga mantšiboeng ao. (1 Bakorinthe 11:23-26) Letšatši le thomile ka tsela e tlwaelegilego ka go hlaba gabotse gomme lewatle le homotše. Ke moka, ka 7:39 a.m. go ya ka nako ya lefelong leo, tšhišinyego ya lefase e ile ya hlasela.

Tšhišinyego ya Lefase!

Ron Parkinson, e lego mogolo wa phuthego le mosadi wa gagwe Dorothy, ba be ba apea difihlolo ge tšhišinyego ya lefase e hlasela. Ron o re: “Ntlo ya rena ya kgale e ile ya šišinyega go etša sehlare sa di-coconut, eupša ga se ya ka ya wa. Go ile gwa ba le lešata le šiišago. Diraka, thoto, dibjana, piano le dilo tše dingwe tšeo motho a ka di rwalago di ile tša wela fase tša pšhatlega. Re ile ra kgona go tšwela ka ntle ka morago ga go dira boiteko bjo bogolo. Dorothy o ile a gata digalase tše di pšhatlegilego a se a rwala dieta.”

Tony le Christine Shaw, e lego baromiwa bao ba dulago kgaufsi le Ron le Dorothy, le bona ba ile ba tšhabela ka ntle. Christine o re: “Lefase le ile la šišinyega kudu moo ke ilego ka wela fase gomme ka palelwa ke go tsoga. Dintlo di be di phaphametše ka godimo ga meetse lewatleng. Di be di gogotšwe ke lephoto le legolo la meetse. Batho ba be ba sesa gare ga thotobolo ka diketswana ge ba dutše ba nyaka batho bao ba sa dutšego ba phela. Ke moka go ile gwa ba le tšhišinyego e nngwe e kgolo gape ya lefase—gomme gwa latela e nngwe gape ka morago ga yona. Go ile gwa tšwela pele go e-na le ditšhišinyego tše dingwe ka matšatši a mahlano. Go be go boifiša!”

Ke Moka go Ile gwa ba le Tsunami

Patson Baea o be a le legaeng la gagwe sehlakahlakeng sa Sepo Hite, e lego dikhilomithara tše ka bago tše tshela go tloga Gizo, ge tšhišinyego ya lefase e hlasela. Patson le lapa la gagwe ba ile ba diragalelwa ke’ng nakong ya kotsi ye?

Patson o gopola tiragalo ye e kwešago bohloko: “Ke ile ka kitima go bapa le lebopo ke lebile go mosadi wa-ka Naomi le bana ba rena ba bane. Tšhišinyego ya lefase e be e ba wišeditše fase eupša ba be ba šireletšegile. Bana ba be ba thothomela gomme ba bangwe ba lla. Nna le Naomi re ile ra ba homotša ka pela.

“Ke ile ka lemoga gore lewatle le be le huduega ka tsela e sa tlwaelegago. Go molaleng gore tsunami e be e le kgaufsi le go hlasela. Mohlomongwe sehlakahlaka sa rena se senyenyane se be se tla khupetšwa ke meetse. Mma, e lego Evalyn yo a bego a dula sehlakahlakeng se senyenyane seo se lego kgaufsi le sa  rena, le yena o be a le kotsing. Ke ile ka laela lapa la rena gore le namele ka seketswaneng sa rena seo se nago le entšene ka go akgofa gomme ra ya go yo mo hlakodiša.

“Ka morago ga go sesa sebakanyana, lephoto le legolo la meetse le ile la feta ka tlase ga seketswana sa rena. Lewatle le ile la ya godimo le fase. Ge re fihla moo mma a lego gona, o be a gakanegile e bile a tšhogile kudu gore a ka tsena ka meetseng. Naomi le Jeremy, e lego morwa wa rena yo a nago le nywaga e 15, ba ile ba tsena ka meetseng gomme ba mo thuša gore a sese a namele ka seketswaneng. Ke moka re ile ra ya gare ga lewatle, seketswana se sesa ka lebelo le le feletšego.

“Ka nako yeo meetse a lewatle a be a boetše morago ka tsela e sa tlwaelegago, a tlogetše di-coral reef di le molaleng go dikologa dihlakahlaka. Go sa letelwa, lephoto le legolo la meetse le ile la tla gomme la khupetša dihlakahlaka tše ka bobedi. Ntlo ya rena ya baeng yeo e lego kgaufsi le lebopo e ile ya senyega wa gore e se sa lokišega. Meetse a ile a tsena ka ntlong ya rena gomme a senya dithoto tša rena tše dintši. Ge lewatle le boela sekeng, re ile ra ntšha Dibeibele le dipuku tša dikopelo ntlong ya rena yeo e senyegilego gomme ra ya Gizo.”

Batho ba bantši ba be ba hwile go bapa le lebopo gomme go senyegile dilo tše dintši. Karolo ya ka bodikela ya sehlakahlaka sa Ghizo e be e senyegile kudu. Bonyenyane metsana e 13 e be e sentšwe ka mo go feletšego ke lephoto la meetse leo go bolelwago gore e be e le la bophagamo bja dimithara tše 5!

Bošegong bjoo, batho ba 22 ba be ba bokane Holong ya Mmušo ya Dihlatse tša Jehofa ya Gizo bakeng sa go gopola Segopotšo sa lehu la Jesu. Se se thabišago ke gore ga go le o tee go batho ba yoo a bego a gobaditšwe o šoro ke kotsi ye. Ron yo a tsopotšwego pejana o re: “Go be go se na mohlagase gomme mabone a rena ao a šomago ka parafene a be a pšhatlegile. Ka gona, Ngwanabo rena Shaw o ile a nea polelo a diriša thotšhi. Re ile ra opela dikopelo tša go leboga Jehofa re le lefsifsing ka mantšu a matla a sa swanego ao a sepedišanago.”

Tlhakodišo

Ge ditaba tša mabapi le kotsi di fihla Honiara, e lego motse-mošate, ofisi ya lekala ya Dihlatse tša Jehofa e ile ya gata mogato ka go akgofa e le gore e romele dilo tša tlhakodišo tšeo di nyakegago ka tšhoganetšo. Ofisi ya lekala e ile ya leletša Dihlatse tšeo di lego mafelong ao a kgomegilego mogala gomme ya kgona go kgonthišetša gore bontši bja tšona bo šireletšegile. Batho bao ba ka botwago ba ile ba romelwa go yo nyaka kgaetšedi yo e lego Hlatse e lego lekatana kudu yo a dulago Sehlakahlakeng sa Choiseul. Mafelelong ba ile ba mo hwetša a phetše gabotse. Le gona, go ile gwa romelwa tšhelete kua Gizo gore go rekwe ditlabakelo tša tšhoganetšo.

Baemedi ba tšwago lekaleng ba ile ba fihla Gizo ka Labone ka sefofane sa pele seo se bego se hwetšagala. Craig Tucker, e lego setho sa Komiti ya Lekala o re: “Re be re rwele mapokisi a sego kae a ditlabakelo tša tlhakodišo. Banamedi ba bangwe ba ile ba tlogela merwalo morago ka baka la dithibelo tša boima bja merwalo yeo go ka tsenwago le yona ka sefofaneng, eupša re ile ra imollwa ke go tseba gore mapokisi a rena ka moka a be a fihlile. A be a le gare ga ditlabakelo tša mathomo tša tlhakodišo tšeo di ilego tša fihla lefelong la kotsi. Ditlabakelo tše dingwe tša tlaleletšo di ile tša fihla ka morago ga matšatši a mabedi ka sekepe.”

Kgabagareng, Tony Shaw, Patson Baea gotee le Dihlatse tše dingwe tšeo di tšwago Gizo ba ile ba tšea leeto la diiri tše pedi ka seketswana e le gore ba yo thuša Dihlatse tšeo di lego lekatana tšeo di dulago sehlakahlakeng sa Ranongga. Matla a tšhišinyego ya lefase a be a dirile gore sehlakahlaka se, seo e lego sa botelele bja dikhilomithara tše 32 le bophara bja dikhilomithara tše 8, se phagame ka dimithara tše pedi ka godimo ga lewatle! Go bonala go katoga ga meetse mo go sa letelwago sehlakahlakeng se go ile gwa baka tsunami yeo e ilego ya hlasela dihlakahlaka tšeo di lego kgaufsi.

Tony o re: “Ditho tša phuthego di be di tloga di thabetše go re bona. Di be di phetše gabotse gomme di tšwetše ka ntle ga dintlo tša tšona ka gobane di be di boifa ditšhišinyego tše dinyenyane tšeo di bago gona ka morago ga tšhišinyego e kgolo. Sekepe sa rena e bile sa mathomo sa go tliša ditlabakelo tša tlhakodišo. Pele re sepela, re ile ra rapela Jehofa gotee le bona re mo leboga go tšwa pelong.”

Patson o re: “Matšatši a mmalwa ka morago, re ile ra boela Ranongga e le gore re iše ditlabakelo tše oketšegilego tša tlhakodišo le go tsoma lapa la Dihlatse leo le dulago karolong e lego lekatana ya sehlakahlaka. Mafelelong re ile ra hwetša Matthew Itu le lapa la gagwe ba hlomile mokutwana sekgweng. Ba ile ba ntšha megokgo ya lethabo, ba bona gore re be re sa ba lebala! Tšhišinyego ya lefase e be e sentše ntlo ya bona gotee le bontši bja meago motsaneng wa  bona. Lega go le bjalo, ba be ba tshwenyegile kudu ka go hwetša Dibeibele tše dingwe bakeng sa lapa la bona, tšeo di lahlegilego nakong ya kotsi.”

Go Retwa ke Babogedi

Batho ba bangwe ba ile ba bona lerato le bjalo la Bokriste. Craig Tucker o re: “Mmegi yo mongwe wa ditaba yo a bego a nyatša modiro ka moka wa tlhakodišo o ile a makatšwa le go kgahlišwa ke go tseba gore Dihlatse tša Jehofa di be di neile ditho tša tšona dijo, diseila gotee le dilo tše dingwe tša bohlokwa matšatši a sego kae ka morago ga ge tšhišinyego ya lefase e hlasetše.” Patson o oketša ka gore: “Baagi ba Ranongga ba ile ba bolela gabotse ka modiro wa rena wa tlhakodišo woo o dirilwego ka go akgofa gomme ba ngongorega ka baka la go se thekgwe ke dikereke tša bona.” Mosadi yo mongwe o boletše gore, “Mokgatlo wa lena o arabetše ka go akgofa!”

Le gona Dihlatse di ile tša thuša baagišani ba tšona. Christine Shaw o re: “Ge re be re etetše sepetlele sa motšwa-o-swere kua Gizo re ile ra bona banyalani bao re ilego ra kopana le bona pejana. Bobedi bja bona ba be ba gobetše e bile ba gakanegile o šoro. Setlogolo sa mosadi yoo se be se gogotšwe ke tsunami gomme se kgamilwe ke meetse. Re ile ra boela gae ka pela gomme ra ba tlišetša dijo le diaparo tšeo ba bego ba tloga ba di nyaka. Ba ile ba re leboga kudu.”

Ka kgonthe, bahlaselwa ba dikotsi tša tlhago ba nyaka se se fetago thušo ya dilo tše di bonalago. Ka mo go kgethegilego ba nyaka khomotšo yeo e ka newago feela ke Lentšu la Modimo, Beibele. Ron o re: “Baruti ba bangwe ba dikereke ba be ba re Modimo o be a otla batho ka baka la dibe tša bona. Eupša re ile ra ba bontšha go tšwa Beibeleng gore le ka mohla Modimo ga a bake bokgopo. Ba bantši ba ile ba re leboga ka ge re ile ra ba nea khomotšo ye e tšwago Beibeleng.”—2 Bakorinthe 1:3, 4; Jakobo 1:13. *

[Mongwalo wa tlase]

[Seswantšho sa go thalwa/Mebapa go letlakala 13]

(Bakeng sa taba e beakantšwego ka mokgwa wa kgatišo bona kgatišo ka boyona)

Choiseul

Ghizo

Gizo

Ranongga

HONIARA

AUSTRALIA

[Seswantšho go letlakala 15]

Lapa la ga-Baea ka seketswaneng sa lona seo se nago le entšene

[Seswantšho go letlakala 15]

Tshenyo yeo e bakilwego ke tsunami kua Gizo

[Seswantšho go letlakala 15]

Holo ye ya Mmušo e be e le moago o nnoši woo o ilego wa šala o eme kua Lale Sehlakahlakeng sa Ranongga