Rampu miti den Solomon-Èilanti

Tapu munde 2 april 2007, wan hebi gronseki pasa na son kontren fu den grupu waran èilanti di nen den Solomon-èilanti. A gronseki disi ben de 8,1 tapu a schaal fu Richter. Den grupu èilanti disi de na a noord-owstusei fu Australia. Wan tu miniti baka di a gronseki pasa, bigi skwala wasi kon na tapu den èilanti na a westsei, èn soleki fa sma ben taki, den skwala disi ben hei sowan 10 meter. A sani disi meki taki 52 sma lasi den libi, èn 6000 sma lasi den oso.

Wan fu den foto di ben kisi moro bigi pori, na a foto Gizo di de sowan 45 kilometer moro fara fu a presi pe a gronseki bigin. Sowan 7000 sma e libi na ini a foto disi de na a syoro fu a Ghizo-èilanti. Na Gizo, wan pikin gemeente fu Yehovah Kotoigi ben sreka densrefi fu hori na alayari Memrefesa fu a dede fu Yesus a neti dati (1 Korintesma 11:23–26). Neleki ala tra dei, a son ben opo moi èn a se ben tiri. Ne, na wan ten fu 7.39 mamanten, a gronseki bigin.

Gronseki!

Ron Parkinson, wan gemeente owruman, nanga en wefi Dorothy, ben e sreka nyanyan a mamanten dati, di a gronseki bigin. Ron e taki: „Na owru oso fu wi ben e wai go-kon leki wan krontobon, ma a ben e tanapu ete baka di a gron kaba seki. A babari ben tranga srefisrefi. Kukru kasi, tafra nanga sturu, grasi nanga preti, wan piano, nanga tra sani, fadon broko na gron. Nanga furu muiti wi ben man komoto na ini na oso. Dorothy di no ben weri noti na en futu, koti en futu na den broko grasi.”

Tony nanga Christine Shaw, wan zendeling trowpaar di e libi krosibei, lon go na dorosei tu. Christine e taki: „A gron ben e seki so tranga taki mi fadon na gron èn mi no ben man opo moro. Na se, oso ben e drifi na tapu a watra. Wan bigi skwala ben hari den oso puru fu a fondamenti fu den. Sma ben e feti fu pari boto na mindri den broko-oso, fu suku sma di ben de na libi ete. Ne, ete wan bigi gronseki pasa, èn baka dati, ete wan. Bakaten, moro gronseki pasa, èn a sani disi go doro feifi dei langa. Wi ben frede srefisrefi!”

Ne a Tsunami kon

Patson Baea, ben de na Sepo Hite, na èilanti pe a e libi, di a gronseki pasa. Na èilanti disi de sowan 6 kilometer komoto fu Gizo. San pasa nanga Patson èn san pasa nanga en osofamiri, di a rampu disi pasa?

Disi na san Patson e memre fu a rampu: „Mi lon na a syoro fu go na mi wefi Naomi nanga den fo pikin fu wi. A gronseki ben naki den trowe na gron, ma den no ben kisi mankeri. Den pikin ben e beifi, èn wan tu fu den ben e krei. Wantewante mi nanga Naomi trowstu den.

„Mi ben si taki a se ben e seki srefisrefi, èn mi no ben gwenti si dati. A ben de krin fu si taki wan tsunami ben o kon. Soleki fa a sori, dan a pikin èilanti fu wi ben o sungu. Mi mama Evalyn, di e libi na wan pikin èilanti krosibei, ben musu kisi yepi tu. Wantewante mi taigi mi wefi nanga den  pikin fu go na ini a masyin boto fu wi, èn wi hari gowe fu go yepi en.

„Baka di wi rèi wan syatu pisi, dan wan bigi skwala pasa na ondro a boto fu wi. A se ben e seki go-kon. Di wi doro mi mama, a ben bruya èn a ben e frede so te, taki a no ben wani go na ini a watra. Naomi nanga Jeremy, a boi fu wi di abi 15 yari, dyompo go na ini a watra di ben e seki srefisrefi, èn den yepi mi mama fu swen kon na a boto. Ne wi rèi a boto bun tranga go na se.

„Na a ten dati, a watra fu a se ben hari gowe so fara, taki den karki ston na ini a watra lontu den èilanti ben kon de fu si. Wantronso, wan bigi skwala wasi kon, èn a sungu ala tu èilanti. Na sekanti, wi ben abi wan oso pe fisitiman ben kan kon tan. Den skwala ben hari na oso disi puru fu en fondamenti, èn den naki en broko pisipisi. Watra wasi kon na ini na oso fu wi, èn a pori furu fu den sani di wi ben abi. Di a watra fu a se kon saka, wi teki den Bijbel nanga den singi buku di wi feni na ini a broko oso fu wi, èn wi hari go na Gizo.”

Na a heri se syoro, furu sani ben kisi pori, èn furu sma lasi den libi. A westsei pisi fu a Ghizo-èilanti ben kisi moro bigi pori. Soleki fa sma ben e taki, dan wan skwala di ben hei 5 meter, pori awinsi 13 dorpu krinkrin!

A neti dati, 22 sma kon makandra na a Kownukondre zaal fu Yehovah Kotoigi na Gizo, fu hori a Memrefesa fu a dede fu Yesus. Wi breiti taki nowan fu den sma disi kisi bigi mankeri di a rampu pasa. Ron di wi ben kari kaba, e taki: „Stroom no ben de, èn den oli-lampu fu wi ben broko. Sobun, Brada Shaw hori a lezing nanga flashlight. Aladi a ben dungru, toku wi opo wi sten fu singi prèisesingi gi Yehovah, èn wi singi na ini difrenti sten.”

Wi e kisi yepi

Di a nyunsu fu a rampu doro na Honiara, a mamafoto, dan wantewante a bijkantoro fu Yehovah Kotoigi drape seni yepi gi den brada nanga sisa. A no teki langa baka dati di a bijkantoro bèl den brada drape, èn now den ben de seiker taki ala sani ben de bun nanga furu fu den Kotoigi di e libi na ini a kontren pe a rampu ben pasa. Den brada seni sma di de fu frutrow, fu go suku wan Kotoigi di ben e tan farawe fu a gemeente, te na tapu a Choiseul-èilanti. Te fu kaba, den feni en libilibi èn noti no ben pasa nanga en. Den brada seni sosrefi moni gi den Kotoigi na Gizo, fu bai den sani di den ben abi tranga fanowdu.

Tapu fodewroko, brada fu a bijkantoro doro na Gizo nanga a fosi opolani di den ben man feni fu frei go drape. Craig Tucker, wan memre fu a Bijkantoro Komte, e taki: „Wi tyari difrenti dosu nanga sani di den brada ben abi fanowdu.” Tra sma di ben frei tu nanga na opolani disi ben musu libi wan tu sani fu den na baka, fu di na opolani no ben man tyari ala den sani. Ma wi ben breiti taki wi ben doro nanga ala den dosu fu wi. Wi ben de den fosi sma di ben doro drape nanga sani di den sma na ini a kontren dati ben abi fanowdu. Baka tu dei, moro sani doro drape nanga boto.”

Na a srefi ten dati, Tony Shaw nanga Patson Baea, makandra nanga tra Kotoigi fu Gizo, pari boto tu yuru langa fu go yepi Kotoigi di e tan na den farawe presi fu na èilanti Ranongga. Na èilanti disi langa 32 kilometer, èn a bradi 8 kilometer. A krakti fu a gronseki disi ben opo na èilanti disi moro leki 2 meter komoto na ini a se! A watra lontu na èilanti ben hari gowe wantronso, èn soleki fa a sori, dan na a sani dati tyari wan tsunami kon di pori den èilanti na ini a kontren dati.

Tony e taki: „Den sma fu a gemeente ben breiti srefisrefi fu si unu. Noti no ben pasa nanga den, èn den ben e tan dorosei fu den oso, fu di den ben frede taki moro gronseki ben o kon. A boto fu wi ben de a fosiwan di ben doro nanga sani di den sma ben abi fanowdu. Fosi wi gowe fu drape, wi begi makandra nanga den brada nanga sisa fu drape, fu taki Yehovah tangi nanga wi heri ati.

Patson e taki: „Wan tu dei baka dati, wi drai go baka na Ranongga fu tyari sani di den brada drape ben abi tranga fanowdu. Boiti dati, wi go suku wan Kotoigi osofamiri di e libi te na a tra sei fu na èilanti dati. Te fu kaba, wi feni Matthew Itu nanga en osofamiri di ben seti kampu dipi na ini a busi. Den krei fu prisiri di den si taki wi no ben frigiti den! A gronseki ben pori na oso fu den èn sosrefi furu fu den gebow na ini a dorpu fu den. Ma a sani di ben moro prenspari gi den, na fu feni nyun Bijbel, fu di a rampu ben pori ala den Bijbel fu den.”

 Sma e prèise den Kotoigi

Den sma fu na èilanti, ben si a lobi disi di den Kresten ben sori gi makandra. Craig Tucker e taki: „Wan nyunsuman ben feni taki nofo muiti no ben du fu yepi den sma na ini a kontren dati. Ma di a kon sabi taki wan tu dei nomo baka a rampu, Yehovah Kotoigi tyari nyanyan, tapu-oli, nanga tra prenspari sani gi den brada nanga sisa fu den, dan a sani dati fruwondru en èn a naki en ati. Patson e taki moro fara: „Den sma fu a dorpu Ranongga ben taki bun fu wi fu di wi no ben draidrai fu go yepi den, èn den kragi taki den no ben kisi yepi fu a kerki fu den. Wan uma bari gi wi: „Na organisâsi fu unu no draidrai fu kon yepi!”

Den Kotoigi yepi den birtisma fu den tu. Christine Shaw e taki: „Di wi go na a ati-oso di sma ben seti na ini Gizo fu yepi den wan di ben kisi mankeri, dan wi si wan trowpaar di wi ben miti wan tu dei na fesi. Den ala tu ben kisi mankeri èn den ben bruya srefisrefi. A watra fu a tsunami ben hari a granpikin fu na uma puru na ini en anu, èn a pikin dede na watra. Wi drai go na oso esi-esi fu go teki nyanyan nanga krosi tyari go gi den. Den ben de nanga tangi trutru gi dati.”

Iya, sma di ondrofeni rampu abi moro fanowdu leki nyanyan nanga krosi. Wan sani di den abi spesrutu fanowdu, na trowstu, èn na Gado Wortu, Bijbel, wawan kan gi den a trowstu dati. Ron e taki: „Son kerki fesiman ben e taki dati na Gado ben e strafu den sma gi den sondu fu den. Ma nanga yepi fu Bijbel wi sori den taki noiti Gado de frantwortu gi den ogri di e miti sma. Furu fu den sma taigi wi tangi fu di wi trowstu den nanga yepi fu Bijbel.”—2 Korentesma 1:3, 4; Yakobus 1:13. *

[Futuwortu]

[Schema/Karta na tapu bladzijde 13]

(Efu yu wani si pe den sani disi skrifi, luku a tijdschrift)

Choiseul

Ghizo

Gizo

Ranongga

HONIARA

AUSTRALIA

[Prenki na tapu bladzijde 15]

A famiri Baea na ini a masyin boto fu den

[Prenki na tapu bladzijde 15]

A pori di a tsunami tyari kon na Gizo

[Prenki na tapu bladzijde 15]

A Kownukondre zaal disi na a wan enkri gebow di no ben pori na Lale, na tapu Ranongga-èilanti