Kon Unsay Atong Makat-onan Kang Jesus

Bahin sa Gingharian sa Diyos

Unsa ang Gingharian sa Diyos?

Ang Gingharian sa Diyos maoy usa ka kagamhanan nga magmando sa tibuok yuta. Si Jesus miingon: “Busa, mag-ampo kamo sa ingon niini nga paagi: . . . ‘Paanhia ang imong gingharian. Matuman unta ang imong kabubut-on, maingon sa langit, mao man usab sa yuta.’”—Mateo 6:9, 10; Daniel 2:44.

Kinsa ang mga magmamando sa Gingharian sa Diyos?

Si Jesus gipakatawo aron mahimong Magmamando sa Gingharian sa Diyos. Giingnan sa usa ka manulonda ang inahan ni Jesus: “Ihatag kaniya ni Jehova nga Diyos ang trono ni David nga iyang amahan, ug magamando siya ingon nga hari.” (Lucas 1:30-33) Dugang pa, gipili ni Jesus ang pipila sa iyang mga sumusunod aron magmando kauban niya. Iyang giingnan ang iyang mga apostoles: “Kamo mao ang nagpabilin kanako diha sa akong mga pagsulay; ug nagahimo ako ug pakigsaad uban kaninyo, maingon nga ang akong Amahan naghimo ug usa ka pakigsaad kanako, alang sa usa ka gingharian.” (Lucas 22:28, 29; Daniel 7:27) Tanantanan, 144,000 ka sumusunod ni Jesus ang magmando kauban niya.—Pinadayag 5:9, 10; 14:1.

Asa mahimutang ang maong Gingharian?

Ang Gingharian sa Diyos magmando gikan sa langit. Si Jesus miingon ngadto sa iyang mga tinun-an: “Kon ako moadto ug mag-andam ug dapit alang kaninyo [sa langit], ako moanhi pag-usab ug pagadawaton ko kamo nganhi kanako, aron nga kon asa ako kamo atua usab. . . . Ako moadto sa akong Amahan.”—Juan 14:2, 3, 12; Daniel 7:13, 14.

Unsay buhaton sa Gingharian sa Diyos maylabot sa pagkadaotan?

Laglagon ni Jesus ang mga daotan dinhi sa yuta. Si Jesus miingon: “Inig-abot sa Anak sa tawo [si Jesus] diha sa iyang himaya, ug ang tanang manulonda uban kaniya,  nan siya molingkod sa iyang mahimayaong trono. Ug ang tanang kanasoran pagatigomon sa iyang atubangan, ug iyang pagalainon ang katawhan gikan sa usag usa . . . Ug kini sila [mga daotan] mamahawa ngadto sa walay kataposang kalaglagan, apan ang mga matarong ngadto sa kinabuhing walay kataposan.”—Mateo 25:31-34, 46.

Kinsa ang mopuyo sa yuta ingong sakop sa Gingharian?

Si Jesus nag-ingon: “Malipayon ang mga malumog-buot, sanglit sila magapanunod sa yuta.” (Mateo 5:5; Salmo 37:29; 72:8) Ang yuta mapuno unya sa mga tawo nga bisan karon pa lang nagtuon na sa paghigugma sa usag usa. Si Jesus miingon sa iyang mga sumusunod: “Ako magahatag kaninyog bag-ong sugo, nga kamo maghigugmaay sa usag usa; ingon sa akong paghigugma kaninyo, nga kamo usab maghigugmaay sa usag usa. Pinaagi niini ang tanan makaila nga kamo akong mga tinun-an, kon kamo adunay gugma sa inyong taliwala.”—Juan 13:34, 35.

Unsay buhaton sa Gingharian sa Diyos alang sa mga tawo dinhi sa yuta?

Ayohon ni Jesus ang tanang masakiton. Sa dinhi pa si Jesus sa yuta, siya nakigsulti sa mga tawo “mahitungod sa gingharian sa Diyos, ug iyang giayo kadtong nagkinahanglan nga pagaayohon.” (Lucas 9:11) Sa dihang nakita ni apostol Juan ang binanhawng si Jesus diha sa usa ka panan-awon, siya miingon: “Nakita ko ang usa ka bag-ong langit ug usa ka bag-ong yuta . . . Nadungog ko ang usa ka makusog nga tingog gikan sa trono nga nag-ingon: ‘Tan-awa! Ang tolda sa Diyos anaa uban sa mga tawo . . . Ug iyang pagapahiran ang tanang luha gikan sa ilang mga mata, ug ang kamatayon mawala na.’”—Pinadayag 21:1-4.

Ipasig-uli sa Gingharian sa Diyos ang Paraiso dinhi sa yuta. Ang mamumuhat ug daotan nga gisilotan ug kamatayon kauban ni Jesus miingon: “Jesus, hinumdomi ako sa dihang moabot ka na sa imong gingharian.” Ug si Jesus miingon kaniya: “Sa pagkatinuod ako magaingon kanimo karong adlawa, Ikaw makauban nako sa Paraiso.”—Lucas 23:42, 43; Isaias 11:4-9.

Alang sa dugang impormasyon, palihog tan-awa ang kapitulo 8 sa librong Unsay Tinuod nga Gitudlo sa Bibliya? a

[Footnote]