Lærum af Jesú

Um ríki Guðs

Hvað er ríki Guðs?

Ríki Guðs er stjórn sem mun fara með völd yfir allri jörðinni. Jesús sagði: „Þannig skuluð þér biðja: . . . ‚Til komi þitt ríki, verði þinn vilji, svo á jörðu sem á himni.‘“ — Matteus 6:9, 10; Daníel 2:44.

Hverjir fara með völd í Guðsríki?

Jesú var ætlað frá fæðingu að verða stjórnandi Guðsríkis. Engill sagði við móður hans: „Drottinn Guð mun gefa honum hásæti Davíðs föður hans og hann mun ríkja.“ (Lúkas 1:30-33) Jesús valdi auk þess suma úr hópi fylgjenda sinna til að ríkja með sér. Hann sagði við postulana: „Það eruð þér sem hafið staðið með mér í freistingum mínum. Og yður fæ ég ríki í hendur, eins og faðir minn hefur fengið mér.“ (Lúkas 22:28, 29; Daníel 7:27) Samtals munu 144.000 fylgjendur Jesú ríkja með honum. — Opinberunarbókin 5:9, 10; 14:1.

Hvar verður ríki Guðs staðsett?

Guðsríki mun stjórna af himnum ofan. Jesús sagði við lærisveina sína: „Þegar ég er farinn burt og hef búið yður stað [á himnum] kem ég aftur og tek yður til mín svo að þér séuð einnig þar sem ég er . . . Ég fer til föðurins.“ — Jóhannes 14:2, 3, 12; Daníel 7:13, 14.

Hvað mun Guðsríki gera varðandi illskuna?

Jesús mun losa jörðina við illa menn. Hann sagði: „Þegar Mannssonurinn [Jesús] kemur í dýrð sinni og allir englar með honum, þá mun  hann sitja í dýrðarhásæti sínu. Allar þjóðir munu safnast frammi fyrir honum og hann mun skilja þær að . . . Og þeir [hinir illu] munu fara til eilífrar refsingar en hinir réttlátu til eilífs lífs.“ — Matteus 25:31-34, 46.

Hverjir verða þegnar Guðsríkis á jörðinni?

Jesús sagði: „Sælir eru hógværir því að þeir munu jörðina erfa.“ (Matteus 5:5; Sálmur 37:29; 72:8) Jörðin mun fyllast fólki sem lærir að elska hvert annað og sumir eru jafnvel byrjaðir á því nú þegar. Jesús sagði fylgjendum sínum: „Nýtt boðorð gef ég yður, að þér elskið hvert annað. Eins og ég hef elskað yður skuluð þér einnig elska hvert annað. Á því munu allir þekkja að þér eruð mínir lærisveinar ef þér berið elsku hver til annars.“ — Jóhannes 13:34, 35.

Hvað mun Guðsríki gera fyrir jarðarbúa?

Jesús mun losa mannkynið við sjúkdóma. Þegar hann var hér á jörðinni talaði hann við mannfjöldann „um Guðs ríki og læknaði þá er lækningar þurftu“. (Lúkas 9:11) Eftir að Jóhannes postuli sá hinn upprisna Jesú í sýn sagði hann: „Ég sá nýjan himin og nýja jörð . . . Ég heyrði raust mikla frá hásætinu er sagði: ‚Sjá, tjaldbúð Guðs er meðal mannanna . . . Og hann mun þerra hvert tár af augum þeirra. Og dauðinn mun ekki framar til vera.‘“ — Opinberunarbókin 21:1-4.

Ríki Guðs mun gera jörðina aftur að paradís. Illvirki, sem var líflátinn með Jesú, sagði: „Jesús, minnst þú mín þegar þú kemur í ríki þitt!“ Og Jesús lofaði honum að hann fengi að vera „í Paradís“. — Lúkas 23:42, 43; Jesaja 11:4-9.

Finna má frekari upplýsingar í 8. kafla bókarinnar Hvað kennir Biblían? *

[Neðanmáls]