Isomo tuvana kuri Yesu

Ku birebana n’Ubwami bw’Imana

Ubwami bw’Imana ni iki?

Ubwami bw’Imana ni ubutegetsi bwashyizweho n’Imana buzategeka isi yose. Yesu yaravuze ati “nuko mujye musenga mutya muti . . . ‘Ubwami bwawe nibuze. Ibyo ushaka bikorwe mu ijuru no ku isi.’”—Matayo 6:9, 10; Daniyeli 2:44.

Ni ba nde bazategeka mu Bwami bw’Imana?

Yesu yavukiye kuba Umutegetsi w’Ubwami bw’Imana. Umumarayika yabwiye nyina wa Yesu ati “Yehova Imana azamuha intebe y’ubwami ya se Dawidi. Azaba umwami” (Luka 1:30-33). Byongeye kandi, Yesu yatoranyije bamwe mu bigishwa be kugira ngo bazafatanye na we gutegeka. Yabwiye intumwa ze ati “ni mwe mwomatanye nanjye mu bigeragezo byanjye; kandi ngiranye namwe isezerano ry’ubwami, nk’uko na Data yagiranye nanjye isezerano” (Luka 22:28, 29; Daniyeli 7:27). Abigishwa ba Yesu bazafatanya na we gutegeka, bose hamwe ni 144.000.—Ibyahishuwe 5:9, 10; 14:1.

Icyicaro cy’ubwo Bwami kizaba kiri he?

Ubwami bw’Imana buzategekera mu ijuru. Yesu yabwiye abigishwa be ati “niba ngiye kubategurira umwanya [mu ijuru], ndagaruka kandi nzabakira iwanjye, kugira ngo aho ndi abe ari ho namwe muba. . . . Ngiye kwa Data.”—Yohana 14:2, 3, 12; Daniyeli 7:13, 14.

Ni iki Ubwami bw’Imana buzakorera ababi?

Yesu azeza isi ayikuramo abantu babi. Yaravuze ati “ubwo Umwana w’umuntu [Yesu] azaza afite ikuzo ashagawe n’abamarayika bose, icyo gihe  azicara ku ntebe ye y’ubwami y’ikuzo. Amahanga yose azateranyirizwa imbere ye, maze atandukanye abantu . . . [Ababi] bazarimburwa iteka ryose, ariko abakiranutsi bo bazahabwa ubuzima bw’iteka.”—Matayo 25:31-34, 46.

Ni ba nde bazaba ku isi ari abayoboke b’ubwo Bwami?

Yesu yaravuze ati “abagira ibyishimo ni abitonda, kuko bazaragwa isi” (Matayo 5:5; Zaburi 37:29; 72:8). Isi izaturwa n’abantu bitoza gukundana muri iki gihe. Yesu yabwiye abigishwa be ati “ndabaha itegeko rishya ngo mukundane; nk’uko nabakunze, namwe abe ari ko mukundana. Ibyo ni byo bizatuma bose bamenya ko muri abigishwa banjye, nimukundana.”—Yohana 13:34, 35.

Ni iki Ubwami bw’Imana buzakorera abantu bazaba bari ku isi?

Yesu azakiza abantu indwara. Yesu akiri ku isi yabwiye imbaga y’abantu “iby’ubwami bw’Imana, kandi akiza abari bakeneye gukizwa” (Luka 9:11). Intumwa Yohana amaze kubona Yesu wazutse mu iyerekwa, yaravuze ati “mbona ijuru rishya n’isi nshya . . . numva ijwi riranguruye rituruka kuri ya ntebe y’ubwami rigira riti ‘dore ihema ry’Imana riri kumwe n’abantu . . . Izahanagura amarira yose ku maso yabo, kandi urupfu ntiruzabaho ukundi.’”—Ibyahishuwe 21:1-4.

Ubwami bw’Imana buzongera gushyiraho Paradizo ku isi. Umugizi wa nabi wari umanikanywe na Yesu yaramubwiye ati “Yesu, uzanyibuke nugera mu bwami bwawe.” Na we aramusubiza ati “uyu munsi ndakubwiza ukuri: uzaba uri kumwe nanjye muri Paradizo.”—Luka 23:42, 43; Yesaya 11:4-9.

Niba ushaka ibindi bisobanuro, reba igice cya 8 cy’igitabo Ni iki mu by’ukuri Bibiliya yigisha? *

[Ibisobanuro ahagana hasi ku ipaji]