O Lesona Tatou te Aʻoaʻoina Mai iā Iesu

E Faatatau i le Malo o le Atua

O le ā le Malo o le Atua?

O le Malo o le Atua, o se pulega o le a na pulea le lalolagi atoa. Na fetalai Iesu: “Ia faapea ona outou tatalo: . . . ‘⁠Ia oo mai lou malo. Ia faia lou finagalo i le lalolagi, e pei ona faia i le lagi.’”—Mataio 6:9, 10; Tanielu 2:44.

O ai pule o le Malo o le Atua?

Na soifua mai lava Iesu ua iloa o ia o le Tupu o le Malo o le Atua. Na taʻu atu e se agelu i le tinā o Iesu: “E foaʻiina atu e Ieova le Atua iā te ia le nofoālii o Tavita lona tamā, ma o le a fai o ia ma tupu.” (Luka 1:30-33) E lē gata i lea, ua filifilia foʻi e Iesu nisi o ona soo e latou te pule faatasi ma ia. Na ia fetalai atu i ona aposetolo: “Ua outou tumau iā te aʻu i taimi o oʻu puapuaga; ma ua ou osia ai se feagaiga ma outou, e pei lava ona osia e loʻu Tamā se feagaiga ma aʻu mo se malo.” (Luka 22:28, 29; Tanielu 7:27) E 144,000 la le aofaʻi o soo o Iesu o le a pule faatasi ma ia.—Faaaliga 5:9, 10; 14:1.

O fea o le a pule mai ai lea Malo?

O le a pule mai i le lagi le Malo o le Atua. Na fetalai Iesu i ona soo: “Afai foʻi ou te alu ma sauni se nofoaga [i le lagi] mo outou, ou te toe sau ona ou talia lea o outou, ina ia iai foʻi outou i le mea ou te iai. . . . auā ua ou alu atu i loʻu Tamā.”—Ioane 14:2, 3, 12; Tanielu 7:13, 14.

O le ā o le a fai e le Malo o le Atua i le amioleaga?

O le a tafiesea e Iesu tagata amioleaga mai le lalolagi. Na fetalai Iesu: “Pe a sau le Atalii o le tagata [Iesu] i lona mamalu faatasi ma ana agelu uma, ona tiʻetiʻe ai lea o ia i lona nofoālii mamalu.  E faapotopotoina foʻi atunuu uma i ona luma, ona ia tuueseeseina lea o tagata, . . . Ona ō atu ai lea o i latou nei [tagata amioleaga] i le faaumatiaga e faavavau, a o ē amiotonu i le ola e faavavau.”—Mataio 25:31-34, 46.

O ai tagatānuu o le lalolagi o le a pule mai i ai le Malo o le Atua?

Na taʻua e Iesu: “E fiafia o ē agamalu, auā e fai mo latou tofi le lalolagi.” (Mataio 5:5; Salamo 37:29; 72:8) O le a faatumuina le lalolagi i tagata o loo faaalia le alofa o le tasi i le isi i le taimi lenei. Na fetalai Iesu i ona soo: “Ua ou tuuina atu iā te outou le poloaʻiga fou, ina ia outou fealofani, e pei ona ou alofa atu iā te outou, ia fealofani foʻi outou. O le mea lea e iloa ai e tagata uma o oʻu soo outou, pe afai tou te fealofani.”—Ioane 13:34, 35.

O le ā o le a faia e le Malo o le Atua i tagata o le lalolagi?

O le a faamalōlōina e Iesu tagata uma mai i maʻi. A o iai Iesu i le lalolagi, na ia talanoa atu i le motu o tagata “e faatatau i le malo o le Atua, ma ua ia faamālōlō i ē o mamaʻi.” (Luka 9:11) Ina ua uma ona vaaia e Ioane i se faaaliga Iesu ua toetū, na ia faapea mai: “Ona ou iloa lea o le lagi fou ma le lalolagi fou . . . Ona ou faalogo lea i le leotele mai le nofoālii e faapea: ‘Vaai foʻi! Ua iai i tagata le faleʻie o le Atua . . . E na te soloiesea foʻi loimata uma i o latou mata, e lē toe iai se oti.’”—Faaaliga 21:1-4.

O le a toe faafoʻisia e le Malo o le Atua le lalolagi i se tulaga Parataiso. Na faapea atu le pagota lea na faasalaina faatasi ma Iesu iā te ia: “Iesu e, ia e manatua mai aʻu pe a e oo i lou malo.” Na fetalai atu Iesu iā te ia: “E moni ou te fai atu iā te oe i le asō, O le a ta faatasi i le Parataiso.”—Luka 23:42, 43; Isaia 11:4-9.

[Ata i le itulau 17]

Tagaʻi i le mataupu e 8 o le tusi O ā Aʻoaʻoga Moni a le Tusi Paia? * mo nisi faamatalaga

[Faaopoopoga i lalo]