Den sani di Yesus leri wi

Fu Gado Kownukondre

San na a Kownukondre fu Gado?

A Kownukondre fu Gado na wan tirimakti di o tiri heri grontapu. Yesus ben taki: „Fu dati ede un musu begi so: . . . ’Meki yu kownukondre kon. Meki yu wani pasa na grontapu soleki fa a e pasa na hemel.’”—Mateyus 6:9, 10; Danièl 2:44.

Suma o de den tiriman fu Gado Kownukondre?

Yesus gebore so taki a ben kan tron a Tiriman fu Gado Kownukondre. Wan engel ben taigi Yesus en mama: ’Yehovah Gado o gi en a kownusturu fu en papa David; èn a o tiri leki kownu’ (Lukas 1:30-33). Boiti dati, Yesus teki wan tu fu en bakaman fu tiri makandra nanga en. A ben taigi den apostel fu en: „Unu na den wan di tan nanga mi di mi ben kisi tesi; mi e meki wan frubontu nanga unu, neleki fa mi Tata meki wan frubontu nanga mi gi wan kownukondre” (Lukas 22:28, 29; Danièl 7:27). Ala nanga ala, 144.000 bakaman fu Yesus o tiri makandra nanga en.—Openbaring 5:9, 10; 14:1.

Pe a Kownukondre o de?

Gado Kownukondre o tiri fu hemel. Yesus ben taigi en disipel: „Te mi gowe èn mi sreka wan presi gi unu kaba [na ini hemel], dan mi o kon baka èn mi o teki unu na ini mi oso, so taki unu kan de tu pe mi de. . . . Mi e go na a Tata.”—Yohanes 14:2, 3, 12; Danièl 7:13, 14.

San a Kownukondre fu Gado o du nanga ogri di e pasa?

Yesus o krin grontapu, fu di a o puru ala ogrisma. Yesus ben taki: „Te a Manpikin fu libisma  [Yesus] kon nanga en glori, makandra nanga ala den engel, dan a o go sidon na tapu en gran kownusturu. Den o tyari ala pipel kon na en fesi, èn a o prati den sma . . . Den sma disi [di du ogri] o dede fu têgo, ma den regtfardiki sma o kisi têgo libi.”—Mateyus 25:31-34, 46.

Suma o tan na grontapu leki borgu fu a Kownukondre?

Yesus ben taki: „Koloku fu den safri-ati sma, bika den o kisi grontapu” (Mateyus 5:5; Psalm 37:29; 72:8). Grontapu o lai nanga sma di e leri nownow kaba fa fu lobi tra sma. Yesus ben taigi en bakaman: „Mi e gi unu wan nyun komando, taki un musu lobi makandra; neleki fa mi lobi unu, na so un musu lobi makandra tu. Na a fasi disi ala sma o sabi taki unu na mi disipel, te unu lobi makandra.”—Yohanes 13:34, 35.

San Gado Kownukondre o du gi libisma na grontapu?

Yesus o dresi ala siki fu libisma. Di Yesus ben de na grontapu, dan a ben taki nanga den ipi sma ’fu Gado kownukondre èn a ben meki den sikisma di ben abi yepi fanowdu, kon betre’ (Lukas 9:11). Baka di Yesus kisi wan opobaka, na apostel Yohanes ben si en na ini wan fisyun, èn Yohanes ben taki: „Mi si wan nyun hemel nanga wan nyun grontapu . . . Mi yere wan tranga sten e komoto fu a kownusturu, èn a taki: ’Luku! A tenti fu Gado de na den libisma . . . A o figi ala watra puru na den ai, èn dede no sa de moro.’”—Openbaring 21:1-4.

Gado Kownukondre sa meki grontapu tron wan Paradijs baka. Wan ogri man di ben kisi dedestrafu èn di ben anga na wan postu sei Yesus, ben taki: „Yesus, memre mi te yu kon na ini yu kownukondre.” Dan Yesus taigi en: „Fu tru, mi e taigi yu tide: Yu o de nanga mi na ini Paradijs.”—Lukas 23:42, 43; Yesaya 11:4-9.

Efu yu wani kon sabi moro, luku kapitel 8 fu a buku San Bijbel e leri wi trutru? *

[Futuwortu]