Kwagh U Se Hen Hen Yesu

Sha Kwagh u Tartor u Aôndo La

Kanyi i lu Tartor u Aôndo?

Tartor u Aôndo ka gomoti u una hemen tar cii yô. Yesu yange kaa ér: “Yô, eren nen msen nahan, ner: . . . tartor Wou u̱ va, i̱ er ishima You shin tar kpaa vough er i eren i Sha nahan.”—Mateu 6:9, 10; Daniel 2:44.

Ka unô vea hemen Tartor u Aôndo laa?

Yange i mar Yesu ér a lu Tor u Tartor u Aôndo. Ortyom ugen kaa a ngô u Yesu ér: “Ter Aôndo kpaa Una na Un ikyônough ki torough ki Ter Na Davidi. Una lu tor.” (Luka 1:30-33) Heela tseegh ga, Yesu tsua mbahenen nav mbagenev ér ve hemen a na imôngo. A kaa a mbaapostoli nav ér: “Ka ne je ne taver ishima ne lu a Mo ken ameen a i lu meen Mo la cii ye. Nahan M ver ne tartor er Terem kpaa A verem nahan.” (Luka 22:28, 29; Daniel 7:27) Mbahenen mba Yesu mba kuman iorov 144,000 vea hemen tar ne vea Yesu imôngo.

Tartor ne ua lu hana?

Tartor u Aôndo ua lu sha; ka shaala ua hemen tar ne ye. Yesu kaa a mbahenen nav ér: “Me yem Me za sôr ne ijiir yô, Me shi Me hide, Me va kua a ven sha er ne kpaa né lu hen ape M lu yô. . . . M [ngu] yemen hen Ter.”—Yohane 14:2, 3, 12; Daniel 7:13, 14.

Tartor u Aôndo ua bee a ifer nena?

Yesu una tim aferaior shin tar kera. Yesu kaa ér: “Kpa zum u Wan u or [Yesu] Una va sha iengem Na a mbatyomov mba Shaav cii a Na imôngo yô, zum la Una tema sha ikyônough Nagh ki torough ki engem la; á kohol akuraior cii sha ishigh Nagh, Una pav ve kposo . . . Mbara [mbaaferev] vea kar vea yem  ken mtsaha u tsôron; kpa mbaperapera yô, vea nyôr ken uma u tsôron.”—Mateu 25:31-34, 46.

Ka unô vea lu shin tar sha ikyev i Tartor laa?

Yesu kaa ér: “Saan mba ve lu a ishima i legh legh la iyol, gadia tar ua lu dyako ve je.” (Mateu 5:5; Pasalmi 37:29; 72:8) Tar ua iv a ior mba ve lu henen u soon ior mbagenev hegen ne. Yesu kaa a mbadondon un wener: “M ngu nan ne tindi u he sha u doo nen ayol a en yô; er ne doom ishima nahan, kape ne kpaa, doo nen ayol a en vough la. Ka sha kwagh ne man ior cii vea kav er ne lu mbahenen Av ye, aluer ne doo ayol a en yô.”—Yohane 13:34, 35.

Kanyi Tartor u Aôndo ua er sha ci u uumace shin tar nee?

Yesu una bee uumace angev. Zum u Yesu lu shin tar la a ôr ikpelaior igen “kwagh u tartor u Aôndo; man mba kwagh a gbe u ma i ser ve angev yô, A war ve.” (Luka 9:11) Apostoli Yohane yange nenge a Yesu ken mpase u sha mnenge shighe u i nder un shin mbakpenev kera la, maa a kaa ér: “Tsô m nenge Sha u he man tar u he kpaa . . . Shi m ungwa zegeimo due ken ikyônough ki torough kira kaa er: Nenge, tenti u Aôndo ngu hen ior . . . Una ese ve mliam sha ashe kera cii, ku ua kera lu ga.”—Mpase 21:1-4.

Tartor u Aôndo ua gema tar ne ua hingir Paradiso. Iferor ugen u yange i wua un vea Yesu imôngo yô kaa ér: “Yesu, umbur mo zum u Wea nyôr ken tartor Wou yô. A kaa a na er: Mimi je M kaan we nyian ne, ú lu a Mo imôngo ken Paradiso.”—Luka 23:42, 43, NW; Yesaia 11:4-9.

Aluer u soo u seer fan kwagh u Tartor ne yô, ôr ityough 8 ki takerada u Bibilo Tese Ér Nyi Jimi? la. *

[Footnote]