Leswi Hi Swi Dyondzaka Eka Yesu

Malunghana Ni Mfumo Wa Xikwembu

Mfumo wa Xikwembu i yini?

Mfumo wa Xikwembu i hulumendhe leyi simekiweke hi Xikwembu leyi nga ta fuma misava hinkwayo. Yesu u te: “Kutani mi fanele mi khongela hi ndlela leyi: . . . ‘Mfumo wa wena a wu te. Ku rhandza ka wena a ku endleke emisaveni, hilaha ku endlekaka hakona etilweni.’”—Matewu 6:9, 10; Daniyele 2:44.

I vamani lava nga ta fuma eMfun’weni wa Xikwembu?

Yesu u velekeriwe ku va Mufumi wa Mfumo wa Xikwembu. Ntsumi yi byele mana wa Yesu yi ku: “Yehovha Xikwembu u ta n’wi nyika xiluvelo xa Davhida tata wakwe, naswona u ta va hosi.” (Luka 1:30-33) Ku engetela kwalaho, Yesu u hlawule van’wana va valandzeri vakwe leswaku va fuma na yena. U byele vaapostola vakwe a ku: “Hi n’wina mi khomeleleke swin’we na mina emiringweni ya mina; kutani ndzi endla ntwanano swin’we na n’wina, hilaha Tata wa mina a endleke hakona ntwanano wa mfumo swin’we na mina.” (Luka 22:28, 29; Daniyele 7:27) Valandzeri volavo va Yesu lava ringanaka 144 000 va ta fuma na yena.—Nhlavutelo 5:9, 10; 14:1.

Xana Mfumo lowu wu ta va wu ri kwihi?

Mfumo wa Xikwembu wu ta fuma wu ri etilweni. Yesu u byele vadyondzisiwa vakwe a ku: “Loko ndzi ya mi lunghisela ndhawu [etilweni], ndzi ta tlhela ndzi vuya kutani ndzi ta mi amukela ekaya mi va na mina, leswaku laha ndzi nga kona na n’wina mi va kona. . . . Ndza famba ndzi ya eka Tatana.”—Yohane 14:2, 3, 12; Daniyele 7:13, 14.

Xana Mfumo wa Xikwembu wu ta endla yini hi vubihi?

Yesu u ta basisa misava hi ku lovisa vanhu lavo homboloka. U te: “Loko N’wana wa munhu [Yesu] a  fika hi ku vangama kakwe, tintsumi hinkwato ti ri na yena, u ta tshama exiluvelweni xakwe xo vangama. Naswona matiko hinkwawo ma ta hlengeletiwa emahlweni kakwe, kutani u ta hambanisa vanhu van’wana eka van’wana . . . Kutani [lavo homboloka] va ta loviseriwa makumu, kambe lavo lulama va ta ya evuton’wini lebyi nga heriki.”—Matewu 25:31-34, 46.

I vamani lava nga ta tshama emisaveni va fumiwa hi Mfumo wolowo?

Yesu u te: “Va tsaka lava nga ni moya wo rhula, hikuva va ta dya ndzhaka ya misava.” (Matewu 5:5; Pisalema 37:29; 72:8) Misava yi ta tala hi vanhu lava sweswi va dyondzaka ku rhandzana. Yesu u byele valandzeri vakwe a ku: “Ndzi mi nyika xileriso lexintshwa, leswaku mi rhandzana; tanihi leswi ndzi mi rhandzeke, rhandzanani na n’wina. Hinkwavo va ta tiva leswaku mi vadyondzisiwa va mina, loko mi rhandzana.”—Yohane 13:34, 35.

Xana Mfumo wa Xikwembu wu ta va endlela yini vanhu emisaveni?

Yesu u ta hanyisa vanhu lava vabyaka. Loko a ha ri emisaveni u vulavule ni mintshungu “hi mfumo wa Xikwembu, naswona a horisa lava a va lava ku hanyisiwa.” (Luka 9:11) Endzhaku ka loko muapostola Yohane a vone Yesu la pfuxiweke exivonweni, u te: “Ndzi vona tilo lerintshwa ni misava leyintshwa . . . Ndzi twa rito lerikulu ri huma exiluvelweni ri ku: ‘Waswivo! Ntsonga wa Xikwembu wu le vanhwini . . . Kutani xi ta sula mihloti hinkwayo ematihlweni ya vona, rifu a ri nge he vi kona.’”—Nhlavutelo 21:1-4.

Mfumo wa Xikwembu wu ta vuyetela Paradeyisi emisaveni. Muendli wa leswo biha loyi a a beleriwe na Yesu u te: “Yesu, u ndzi tsundzuka loko u nghena emfun’weni wa wena.” Kutani Yesu a ku eka yena: “Ndzi tiyisile namuntlha ndzi ri eka wena, U ta va na mina eParadeyisini.”—Luka 23:42, 43; Esaya 11:4-9.

Leswaku u kuma rungula leri engetelekeke, vona ndzima 8 ya buku leyi nge Xana Bibele Yi Dyondzisa Yini Hakunene? *

[Nhlamuselo ya le hansi]