Nea Yesua Fi Yesu Hɔ

Wɔ Onyankopɔn Ahenni Ho

Dɛn ne Onyankopɔn Ahenni?

Onyankopɔn Ahenni yɛ aban a ebedi asase nyinaa so. Yesu kae sɛ: “Enti mommɔ mpae sɛ: . . . ‘W’ahenni mmra. W’apɛde nyɛ hɔ wɔ asase so sɛnea ɛte wɔ soro.’”—Mateo 6:9, 10; Daniel 2:44.

Henanom na wɔbɛyɛ sodifo wɔ Onyankopɔn Ahenni no mu?

Wɔwoo Yesu sɛ ɔmmɛyɛ Onyankopɔn Ahenni no Sodifo. Ɔbɔfo bi ka kyerɛɛ Yesu maame sɛ: ‘Yehowa Nyankopɔn de n’agya Dawid ahengua bɛma no, na obedi hene.’ (Luka 1:30-33) Bio nso, Yesu paw n’akyidifo no bi sɛ wɔne no nni ade. Ɔka kyerɛɛ n’asomafo no sɛ: “Mo na moda so bata me ho wɔ me sɔhwɛ mu; na me ne mo reyɛ ahenni ho apam, sɛnea m’Agya ne me ayɛ apam no.” (Luka 22:28, 29; Daniel 7:27) Yesu akyidifo 144,000 na wɔbɛka ne ho ne no adi ade.—Adiyisɛm 5:9, 10; 14:1.

Ɛhe na Ahenni no befi adi tumi?

Onyankopɔn Ahenni no bedi tumi afi soro. Yesu ka kyerɛɛ n’asuafo no sɛ: “Sɛ mekɔ kosiesie baabi ma mo [wɔ ɔsoro] a, mɛba bio na magye mo aba me nkyɛn, na baabi a mewɔ no, mo nso moaba hɔ. . . . Merekɔ Agya no nkyɛn.”—Yohane 14:2, 3, 12; Daniel 7:13, 14.

Dɛn na Onyankopɔn Ahenni no bɛyɛ abɔnefo?

Yesu beyi abɔnefo nyinaa afi asase so. Yesu kae sɛ: “Bere a onipa Ba [Yesu] ba n’anuonyam mu a abɔfo nyinaa ka ne ho no, ɔbɛtra n’anuonyam  ahengua so. Na wɔbɛboaboa amanaman nyinaa ano n’anim, na ɔbɛpaapae nnipa no mu mmiako mmiako . . . Na eyinom [abɔnefo] befi hɔ akɔ daa ɔsɛe mu, na wɔn a wɔteɛ no bɛkɔ daa nkwa mu.”—Mateo 25:31-34, 46.

Henanom na wɔbɛtra asase so ama Ahenni no adi wɔn so?

Yesu kae sɛ: “Anigye ne wɔn a wodwo, efisɛ wobenya asase no.” (Mateo 5:5; Dwom 37:29; 72:8) Nnipa a ɛnnɛ wɔresua sɛ wɔbɛdodɔ wɔn ho wɔn ho no na wɔbɛtra asase no so. Yesu ka kyerɛɛ n’akyidifo no sɛ: “Mede ahyɛde foforo rema mo, sɛ monnodɔ mo ho; sɛnea medɔ mo no, mo nso monnodɔ mo ho. Sɛ mododɔ mo ho a, ɛno na ɛbɛma nnipa nyinaa ahu sɛ moyɛ m’asuafo.”—Yohane 13:34, 35.

Dɛn na Onyankopɔn Ahenni bɛyɛ ama adesamma wɔ asase so?

Yesu bɛsa adesamma nyarewa nyinaa. Bere a Yesu wɔ asase so no, ɔkaa “Nyankopɔn ahenni no ho asɛm kyerɛɛ wɔn [nnipakuw no], na ɔsaa wɔn a wohia ayaresa no yare.” (Luka 9:11) Bere a ɔsomafo Yohane huu Yesu a wɔanyan no afi awufo mu wɔ anisoade mu akyi no, Yohane kae sɛ: “Mihuu ɔsoro foforo ne asase foforo . . . Metee nne kɛse bi fii ahengua no so sɛ: ‘Hwɛ! Onyankopɔn ntamadan wɔ adesamma mu . . . Na ɔbɛpopa wɔn aniwam nusu nyinaa, na owu nni hɔ bio.’”—Adiyisɛm 21:1-4.

Onyankopɔn Ahenni bɛma asase asan ayɛ Paradise. Ɔbɔnefo a wokum no kaa Yesu ho no kae sɛ: “Yesu, sɛ woba w’ahenni mu a kae me.” Na Yesu ka kyerɛɛ no sɛ: “Nokwarem mise wo nnɛ sɛ, wobɛka me ho wɔ Paradise.”—Luka 23:42, 43; Yesaia 11:4-9.

Sɛ wopɛ Ahenni no ho nsɛm pii a, hwɛ Dɛn na Bible Kyerɛkyerɛ Ankasa? * nhoma no ti 8

[Ase hɔ asɛm]