Chanubtaseletik yuʼun Jesús

Li Ajvalilal yuʼun Diose

¿Kʼusi jaʼ li Ajvalilal yuʼun Diose?

Jaʼ jun ajvalilal ti tsventain spʼejel li Balumile. Li Jesuse xi laj yale: «Li voʼoxuque jaʼ jech xacʼopanic Dios chac liʼi: [...] Acʼo sta yorail chapas mantal, acʼo pasuc cʼusi tscʼan avoʼnton liʼ ta banamil jech chac cʼu chaʼal te ta vinajele», xi (Mateo 6:9, 10; Daniel 2:44).

¿Buchʼutik ta x-ajvalilajik li ta Ajvalilal yuʼun Diose?

Li Jesuse ivokʼ sventa jaʼ Ajvalil chkʼot li ta Ajvalilal yuʼun Diose. Jun anjel xi laj yalbe li smeʼ Jesuse: «Li Diose ta xacʼ ochuc ta ajvalilal jech chac cʼu chaʼal li smoltot David ta voʼnee. Jʼechʼel chlic [veintainvanuk-o]», xi (Lucas 1:30-33). Jaʼ noʼox jech xtok, ti kʼuyelan laj yalbe li yajtakboltake, li Jesuse ta stʼujanan junantik ta yajtsʼaklomtak sventa x-ajvalilajik xchiʼuk. Xi laj yalanbee: «Voʼoxuc ti jun avoʼntonic liʼ achiʼinojicun o cʼalal laj quichʼilan contrainele. Jaʼ yuʼun li vuʼun eqʼue ta xcacʼ apasic mantal jech chac cʼu chaʼal laj yacʼbun jpas mantal li Jtote» (Lucas 22:28, 29; Daniel 7:27). Ta stekele jaʼ 144,000 yajtsʼaklomtak Cristo ta x-ajvalilajik xchiʼuk li Jesuse (Apocalipsis 5:9, 10; 14:1).

¿Bu van ch-oyij?

Li Ajvalilal yuʼun Diose te tspas tal mantal ta vinajel. Li Jesuse xi laj yalbe li yajtakboltake: «Me chibate, xchiʼuc me ichapaj cuʼun li avavilique [li ta vinajele], chisut tal yan velta; vuʼun jtuc chtal quicʼoxuc muyel, yuʼun jech xuʼ te chacʼotic ec ti bu oyune. [...] Li vuʼune ta xa xibat yoʼ bu oy li Jtote» (Juan 14:2, 3, 12; Daniel 7:13, 14).

¿Kʼusi ta spas li Ajvalilal yuʼun Dios ta sventa li choplejale?

Li Jesuse ta slajes skotol li chopol krixchanoetik ta Balumile. Xi laj yalbe sba skʼoplal stuke: «Cʼalal chital jchiʼuc jxojobal, vuʼun ti Xnichʼon cristiano licʼote, ta jchiʼin tal scotol li chʼul jʼalmantaletique; jaʼo chlic  chotlicun ta jchotleb ti jun yutsil slequile. Ta stsob sbaic tal ta jtojol scotol li cristianoetic ta sbejel banamile. Ta xlic jvocʼan [...]. Jech chbat tstoj smulic o sbatel osil [li chopol krixchanoetike]. Yan li bochʼotic tucʼ yoʼntonique jaʼ ta xcuxiic sbatel osil» (Mateo 25:31-34, 46).

¿Buchʼu ta xnakiik ta Balumil ti jaʼ chveintanatik yuʼun li Ajvalilal yuʼun Diose?

Li Jesuse xi laj yale: «Xcuxet noʼox yoʼnton li bochʼo mucʼ noʼox yoʼntonique, yuʼun jaʼ ch-acʼbat sventainic li banamil ti albil scʼoplale» (Mateo 5:5; Salmo 37:29; 72:8). Li jBalumiltike chnoj ta krixchanoetik ti xchanoj xa skʼanel sbaik ta jujuntale. Li Jesuse xi laj yalbe li yajtsʼaklomtake: «Ta xcalboxuc comel jun achʼ mantal, cʼanano me abaic. Jech chac cʼu chaʼal la jcʼanoxuc li vuʼune, jaʼuc me jech chacʼanan abaic li voʼoxuque. Me jech chapasique, jech ta snaʼic o scotol cristianoetic ti voʼoxuc cajchancʼopoxuque» (Juan 13:34, 35).

¿Kʼusi ta spas li Ajvalilal yuʼun Dios ta stojolal li krixchanoetike?

Li Jesuse chakʼbe slajeb skotol li chameletike. Kʼalal liʼ toʼox oy ta Balumil li Jesuse, laj yalanbe epal krixchanoetik ti «chventainvan li Diose, xchiʼuc la scolta li jchameletic ti tscʼan coltael laj yile» (Lucas 9:11). Kʼalal li jtakbol Juan laj yil ta xvayich ti chaʼkuxiem xaʼox li Jesuse, xi laj yale: «Tsʼacal laj quil achʼ vinajel, achʼ banamil; [...] laj caʼay oy bochʼo tsots chcʼopoj tal ta mucʼta chotlebal, jech laj yal: Qʼuelo avilic, liʼi jaʼ xa snaic xchiʼuc cristianoetic li Diose [...]. Li Diose ta scusbe loqʼuel scotol yaʼlel satic, jech muʼyuc xa bochʼo chcham», xi (Apocalipsis 21:1-4).

Li Ajvalilal yuʼun Diose ta xchaʼpas li Paraiso ta Balumile. Jun jchukel ti te jmoj laj yichʼ jokʼanel xchiʼuk Jesuse, xi laj yalbee: «Vulesun ta ajol kʼalal mi la och ta ajvalilal avuʼune», xi. Li Jesuse xi la stakʼbee: «Ta melel cha kalbot li avie: Te me oyot xchiʼuk voʼon li ta Paraisoe», xut (Lucas 23:42, 43, NM; Isaías 11:4-9).

Mi cha kʼan cha chanbe mas skʼoplale, kʼelo li kapitulo 8 ta livro ¿Kʼusi chchanubtasvan ta melel li Vivliae? *

[Tsʼib ta yok vun]