Siya Nasayod sa Atong mga Kasakit
Pakigsuod sa Diyos
Siya Nasayod sa Atong mga Kasakit
ANG empatiya mao ang talagsaong katakos nga mobati sa kasakit nga gibati sa uban. Si Jehova nga Diyos mao ang kinalabwang ehemplo sa empatiya o pagkamabination. Iyang gibati ang kasakit nga giantos sa iyang katawhan. Nganong makaseguro man kita niana? Tungod kay ang pagkamabination ni Jehova bug-os nga nadayag diha sa mga pulong ug buhat ni Jesus sa dinhi pa siya sa yuta. (Juan 5:19) Tagda pananglitan ang hitabo nga gibatbat sa Juan 11:33-35.
Sa dihang ang higala ni Jesus nga si Lazaro nakaagom ug ahat nga kamatayon, si Jesus miadto dayon sa baryo diin nagpuyo si Lazaro. Hisabtan nga labihang guola sa mga igsoon ni Lazaro nga si Maria ug Marta. Kining pamilyaha gimahal pag-ayo ni Jesus. (Juan 11:5) Nan, unsa may iyang gihimo? Ang asoy nag-ingon: “Si Jesus, sa iyang nakita [si Maria] nga naghilak ug ang mga Hudiyo nga mikuyog kaniya nga naghilak, miagulo diha sa espiritu ug naguol; ug siya miingon: ‘Diin ninyo siya gipahiluna?’ Sila miingon kaniya: ‘Ginoo, ari ug tan-awa.’ Si Jesus mihilak.” (Juan 11:33-35) Nganong mihilak man si Jesus? Tinuod, patay na ang minahal niyang higala nga si Lazaro, apan hapit na niya kining banhawon. (Juan 11:41-44) Aduna pa bay laing nakatandog sa pagbati ni Jesus?
Tan-awa pag-usab ang mga pulong nga gikutlo sa ibabaw. Matikdi nga sa dihang nakita ni Jesus si Maria ug ang uban pa nga naghilak, siya “miagulo” ug “naguol.” Ang orihinal nga pulong nga gigamit dinhi nagpaila ug dulot nga pagbati. a Si Jesus natandog pag-ayo sa iyang nakita ug nadayag kini sa dihang nanglugmaw ang luha sa iyang mga mata. Tataw nga apektado gayod si Jesus sa kasakit sa uban. Diha bay higayon nga nakahilak ka tungod kay naghilak ang imong minahal?—Roma 12:15.
Ang pagkamabination ni Jesus motabang kanato sa pagkat-on bahin sa mga hiyas ug mga pamaagi sa iyang Amahan nga si Jehova. Hinumdomi nga bug-os gayong gibanaag ni Jesus ang mga hiyas sa iyang Amahan nga siya nakaingon: “Siya nga nakakita kanako nakakita usab sa Amahan.” (Juan 14:9) Busa sa dihang atong nabasa nga “si Jesus mihilak,” makaseguro kita nga gibati usab ni Jehova ang kasakit sa iyang mga magsisimba. Sa pagkatinuod, kini nga kamatuoran gipamatud-an sa ubang magsusulat sa Bibliya. (Isaias 63:9; Zacarias 2:8) Pagkamabination gayod nga Diyos si Jehova!
Ganahan kitang moduol sa mga tawong mabination. Sa dihang kita mahigawad o maguol, mas gusto tang makigsulti niadtong makasabot sa atong kahimtang ug kasakit. Mas labaw pa kitang matukmod sa pagduol ug pagpakigsuod kang Jehova, ang mabination nga Diyos kinsa mobati sa atong mga kasakit ug nasayod sa hinungdan sa atong paghilak!—Salmo 56:8.
[Footnote]
a Ang Gregong pulong nga gihubad “mihilak” kasagarang nagtumong sa “pagtulo sa mga luha,” samtang ang pulong nga gigamit sa paghubit sa paghilak ni Maria ug sa uban mahimong magpasabot ug “pagtiyabaw o pagdanguyngoy.”