Enye Ọfiọk Ndutụhọ Oro Isobode
San̄a Kpere Abasi
Enye Ọfiọk Ndutụhọ Oro Isobode
AKANIEREN kiet emi edide isụn̄utom Mme Ntiense Jehovah ọkọdọhọ ke “nditua owo mbọm ọwọrọ ndifiọk nte etiede ekemmọ owo ke idem.” Idụhe owo oro atuade owo mbọm nte Jehovah Abasi. Esibiak enye ke ini ikọt esie ẹkụtde ndutụhọ. Nnyịn isan̄a didie ifiọk emi? Se Jesus eketịn̄de ye nte enye ekesinamde n̄kpọ ke ini okodude ke isọn̄ ẹma ẹnen̄ede ẹwụt nte Jehovah ekerede aban̄a nnyịn. (John 5:19) Ke uwụtn̄kpọ, kere ban̄a se iketịbede mi ke John 11:33-35.
Jesus ama aka obio emana Lazarus ufan esie ke ini Lazarus akakpade ke unana idotenyịn. Ana in̄wan̄-in̄wan̄ ke Martha ye Mary nditọeka Lazarus ẹma ẹnen̄ede ẹfụhọ. Jesus ama enen̄ede ama ubon emi. (John 11:5) Nso ke enye edinam idahaemi? Mbụk oro ọdọhọ ete: “Ke ini Jesus okụtde [Mary] atuade ye nte mme Jew oro ẹkesan̄ade ye enye ẹtuan̄ade, enye omụm mmụm ke spirit ndien esịt etịmede enye; ndien enye ọdọhọ ete: ‘Mbufo ẹkenịm enye ke m̀mọ̀n̄?’ Mmọ ẹdọhọ enye ẹte: ‘Ọbọn̄, di dise.’ Jesus atua eyet.” (John 11:33-35) Ntak emi Jesus akatuade eyet-e? Edi akpanikọ ke Lazarus ufan esie ama akpa, edi Jesus ama eben̄e idem ndinam enye eset. (John 11:41-44) Ndi ama odu n̄kpọ en̄wen oro akanamde Jesus atua?
Fiak se itien̄wed Abasi oro ẹkotde ke enyọn̄ emi. Omokụt ke ini Jesus okokụtde Mary ye mbon oro ẹkedude ye enye ẹtuan̄ade, Jesus ama “omụm mmụm” ndien “esịt onyụn̄ etịmede enye.” Ikọ Greek oro ẹkabarede mme ikọ emi ẹto ẹnen̄erede ẹwụt nte n̄kpọ otụkde owo ke idem. * Se Jesus okokụtde ama enen̄ede otụk enye. Mmọn̄eyet ndikasiaha enye ke enyịn ama owụt ke n̄kpa ufan esie ama enen̄ede otụk enye. Ke akpanikọ, ubiak oro mbon en̄wen ẹkekopde ama enen̄ede otụk Jesus. Ndi akanam amatua eyet ke ntak oro owo emi afo amade atuade?—Rome 12:15.
Nte Jesus akatuade mme owo mbọm anam ifiọk mme edu Ete esie, Jehovah, ye nte Enye esinamde n̄kpọ. Ti ete ke Jesus ama enen̄ede ebiet Ete esie tutu enye ọdọhọ ke “owo eke okụtde [imọ] okụt Ete n̄ko.” (John 14:9) Ntre, ke ini ikotde ite ke Jesus ama “atua eyet,” nnyịn imekeme ndinịm ke akpanikọ ke esibiak Jehovah ke ini mme andituak ibuot nnọ enye ẹkopde ubiak. Ke akpanikọ, mbon eken oro ẹketienede ẹwet Bible ẹsịn ke uyo emi. (Isaiah 63:9; Zechariah 2:8) Jehovah edi Abasi oro enen̄ede ekere aban̄a nnyịn!
Imesisan̄a ikpere mbon oro ẹkerede ẹban̄a nnyịn. Ke ini ikopde mmemidem m̀mê ifụhọde, imesisan̄a ikpere owo oro ekemede ndifiọk nte etiede nnyịn ke idem onyụn̄ atuade nnyịn mbọm. Nnyịn ikpakam inen̄ede isan̄a ikpere Jehovah, kpa Abasi emi ekerede aban̄a nnyịn onyụn̄ ọfiọkde se isinamde nnyịn itua!—Psalm 56:8.
[Ikọ Idakisọn̄]
^ ikp. 6 Ikọ Greek oro ẹkabarede ‘nditua eyet’ esiwak ndiwọrọ “ndin̄wek eyet.” Edi enye oro akabarede eyet oro Mary ye mbon eken ẹketuade ekeme ndiwọrọ “ndifiori eyet.”