Ozeye Mpasi Zeto
Finama Nzambi
Ozeye Mpasi Zeto
“E NKENDA i mpasi zaku muna ntim’ame.” E yayi i mpila ina missionario mosi wa Mbangi a Yave kayikila e fu kiaki kiamfunu. Yave wa Nzambi i mbandu isundidi mu songa e nkenda. O monanga e mpasi za nkangu andi. Aweyi tulenda kadila ye ziku kia diambu diadi? E nkenda za Yave zatoma moneka muna mvovo ye mavangu ma Yesu vava kakala ova ntoto. (Yoane 5:19) Yambula twafimpa nona yá ina muna Yoane 11:33-35.
Vava Lazaro wa nkundi a Yesu kafwa, Yesu wayenda muna mbanza yayina. Maria ye Mareta, nsanga za Lazaro, balut’o kendalala. Yesu wabazolanga kikilu. (Yoane 11:5) Adieyi kavanga? O lusansu lusonganga vo: “O Yesu, vava kamwene [Maria] kedilanga, Ayuda mpe ana bezidi yandi bedilanga, ofululukidi muna ntima, o moyo andi utelamene, oyandi vo, akweyi nunsidi? Bamvovese vo, e Mfumu, wiza tala. O Yesu odididi e kinsanga.” (Yoane 11:33-35) Ekuma kadidila o Yesu? Kieleka, wazolanga Lazaro wa nkundi andi, muna kuma kiaki, Yesu wayenda muna kumfula. (Yoane 11:41-44) Nga vakala ye diambu diakaka diakudikila nkenda za Yesu?
Tala diaka e mvovo miyikilu ova ntandu. Sungamena vo vava Yesu kamona Maria ye awana badilanga yandi, “ofululukidi muna ntima, o moyo andi utelamene.” E mvovo miami ntantu zayingi misonganga. * Yesu wakendalala mu kuma kia mana kamona. E ntantu zandi zatoma moneka vava kadila e kinsanga. Kieleka, Yesu wakendalala mu kuma kia mpasi z’akaka. Nga odilanga vava monanga muntu on’ozolanga kedilanga?—Roma 12:15.
E nkenda za Yesu zilenda kutusadisa mu zaya e fu ye nzila za Yave w’eS’andi. Sungamena vo Yesu watoma songa e fu y’eS’andi. I kuma kavovela vo: “Ona wambona, wamona Se.” (Yoane 14:9) Muna kuma kiaki, vava tutanganga vo “Yesu odidi e kinsanga,” tulenda kala ye ziku vo Yave omonanga e mpasi za selo yandi. Kieleka, asoneki akaka a Nkand’a Nzambi bekwikanisanga e ziku kiaki. (Yesaya 63:9; Zakariya 2:8) Ekwe nkenda kesonganga Yave wa Nzambi!
E nkenda zifinamesanga akaka. Vava tukendalalanga, tufinamwanga kw’awana balenda bakula e mpasi zeto yo kutusonga nkenda. Ekw’elau tuvwidi dia finama Yave wa Nzambi a nkenda ona omonanga e mpasi zeto yo bakula e dilu kieto!—Nkunga 56:8.
[Mvovo Vana Yand’a lukaya]
^ tini. 6 E mvovo wa Kingerekia wasekolwa vo “dila e kinsanga” nkumbu miayingi “dilu kia nsi a ntima” uyikanga. Nswaswani ye mvovo usadilu mu yika e dilu kia Maria y’akaka, uyikanga “wodiana ye dilu kiayingi.”