Wa Utwisisa Butuku Bo Lu Utwa
Mu Sutelele ku Mulimu
Wa Utwisisa Butuku Bo Lu Utwa
MAKEKE ki kalemeno ka kande ka ka lu konisa ku utwisisa butuku bo ba utwa ba bañwi. Jehova Mulimu ki yena ya na ni hahulu makeke. Wa utwanga butuku bakeñisa manyando a batu ba hae. Lu ziba cwañi cwalo? Makeke-tuna a Jehova a bonisizwe hande mwa manzwi ni mwa likezo za Jesu ha na li fa lifasi. (Joani 5:19) Ka mutala, ha mu nyakisise taba ye bulezwi kwa Joani 11:33-35.
Lazaro mulikan’a Jesu ha na shwile ka sipundumukela, Jesu na ile kwa munzi wa Lazaro. Ku si na ku kakanya, likaizeli za Lazaro, bo Maria ni Mareta ne ba tomohile hahulu lipilu. Jesu na lata hahulu lubasi lo. (Joani 11:5) Kacwalo, na ka ezañi? Taba yeo i bonisa kuli: “Jesu h’a . . . bona [Maria] inz’a lila, ni Majuda ba ba mu latelezi inze ba lila, a tabeha mwa pilu mi a sisimuha. Mi a li: Mu mu beile kai? Ba li ku yena: Mulena taha, t’o bona. Cwale Jesu a lila.” (Joani 11:33-35) Ki kabakalañi Jesu ha na lilile? Ki niti kuli mulikan’a hae Lazaro na shwile, kono Jesu na tuha a mu pilisa ka ku mu zusa. (Joani 11:41-44) Kana ku na ni nto ye ñwi hape ye ne tisize kuli Jesu a lile?
Mu talime hape manzwi a mwa liñolo le li fahalimu la Joani 11:33-35. Mu ka lemuha kuli Jesu ha na boni Maria ni ba na li ni bona inze ba lila, “a tabeha mwa pilu mi a sisimuha.” Manzwi a mwa puo ya kwa makalelo a itusisizwe mwa liñolo le, a talusa ku utwa hahulu butuku mwa pilu. * Jesu na utwile hahulu butuku kabakala za na boni. Se si bonisa kuli Jesu na utwile hahulu butuku mwa pilu kikuli na enga-engile miyoko. Ku si na ku kakanya, Jesu na tabilwe kwa pilu ki butuku bo ne ba utwa ba bañwi. Kana ni mina mu kile mwa liliswa ki ku bona mutu yo mu lata inz’a lila?—Maroma 12:15.
Makeke a Jesu a lu tusa ku utwisisa hande tulemeno ni linzila za Ndat’ahe, yena Jehova. Mu hupule kuli Jesu na bonisize hande tulemeno twa Ndat’ahe kuli mane na kona ku bulela kuli: “Ya ni boni, u boni Ndate.” (Joani 14:9) Kacwalo ha lu bala kuli “Jesu a lila,” lwa kona ku kolwa kuli ni Jehova wa utwanga butuku bakeñisa manyando a balapeli ba hae. Bañoli ba bañwi ba Bibele ni bona ba lumelelana ni taba ye. (Isaya 63:9; Zakaria 2:8) Kaniti, Jehova ki Mulimu ya na ni makeke.
Batu ba ba na ni makeke ba tabelwanga. Ha lu zwafile kamba ku lembwala, lu tabelanga ku ba bukaufi ni batu ba ba utwisisa muinelo wa luna ni ku lu utwela butuku. Lu swanela ku sutelela hahulu ku Jehova, Mulimu ya mukekecima, ya utwanga butuku bakeñisa manyando a luna ni ya utwisisa libaka ha lu lotisanga miyoko.—Samu 56:8.
[Litaluso za kwatasi]
^ para. 3 Pulelo ya Sigerike ye tolokilwe kuli “a lila” hañata i talusanga ku “cipita miyoko,” mi linzwi le li itusisizwe kwa ku talusa mulilelo wa Maria ni ba bañwi li kana la talusa “ku bokolola.”