E na te Silafia o Tatou Tigā
Ia Mafuta Atu i le Atua
E na te Silafia o Tatou Tigā
“O LE tigāalofa, o lou lagonaina lea o puapuaga o isi tagata.” O le faamatalaga lenā a se misionare Molimau a Ieova ua loa le soifua, e faatatau i lenei uiga tāua. O le faaaʻoaʻoga sili o le tigāalofa, o Ieova le Atua. E na te lagona ia mafatiaga o ona tagata. E faapefea ona tatou mautinoa i lenā mea? Na iloa tino le atoatoa lelei o le faaataina mai e Iesu o le tigāalofa o Ieova, e ala i ana upu ma gaoioiga a o i le lalolagi. (Ioane 5:19) Seʻi mafaufau i le mea na tupu o loo faamatalaina i le Ioane 11:33-35.
Ina ua maliu faafuaseʻi le uō a Iesu o Lasalo, na malaga atu loa Iesu i le nuu o Lasalo. Na matuā faanoanoa lava tuafāfine o Lasalo, o Maria ma Mareta. E alofa tele Iesu i lenā aiga. (Ioane 11:5) O le ā nei lana mea o le a fai? O loo faapea mai le tala: “Ua silasila atu Iesu, ua tagi o ia [Maria] faapea ma tagata Iutaia ua ō mai ma ia, ona ōi ai lea ma ua ootia lona finagalo; ma ua fesili atu: ‘O fea ua outou tuu ai o ia?’ Ua latou fai mai: ‘Le Alii e, inā maliu maia e silasila i ai.’ Ona tagi ai lea o Iesu.” (Ioane 11:33-35) Aiseā na tagi ai Iesu? E moni ua maliu lana uō pele o Lasalo, ae o le a toe faaolaina e Iesu e ala i le faatūina mai o ia. (Ioane 11:41-44) Pe na iai se isi mea na aafia ai faalogona o Iesu?
Seʻi toe tagaʻi i upu o le mau o loo i luga. Seʻi mātau foʻi, ina ua silasila atu Iesu iā Maria ma i latou o loo fetagisi, na “ōi” ma ‘ootia ai lona finagalo.’ Ua faaalia mai upu o le uluaʻi gagana na faaaogāina, le malolosi o faalogona. * Na ootia faalogona o Iesu i le mea na ia vaaia. Na iloa le ootia tele o ona faalogona ona o le loimatā o ona mata. E manino mai i inei le ootia o le loto o Iesu ona o mafatiaga o isi. Pe na e tagi i se taimi ona ua tagi se tasi e pele iā te oe?—Roma 12:15.
E tāua le lesona na tuuina mai e Iesu e ala i lona tigāalofa, ua tatou iloa ai uiga ma auala o lona Tamā, o Ieova. Seʻi mātau foʻi, na lelei atoatoa le auala na faaalia ai e Iesu uiga o lona Tamā, lea na mafai ai ona ia faapea mai: “O lē ua vaai mai iā te aʻu, ua vaai foʻi o ia i le Tamā.” (Ioane 14:9) Pe a tatou faitau e faapea, “ona tagi ai lea o Iesu,” e mafai ona tatou mautinoa e silafia e Ieova faalogona pagatia o ona tagata tapuaʻi. O le mea moni, o loo faamaonia e isi tusitala o le Tusi Paia nei manatu. (Isaia 63:9; Sakaria 2:8) O Ieova, o ia se Atua e alofa mutimutivale!
E tatou te tosina atu i tagata e faaalia le tigāalofa. Pe a tatou lotovaivai ma lē fiafia, e tatou te tosina atu i se tagata e malamalama i o tatou tulaga ma faaalia le tigāalofa. E sili atu la ona tatou tosina atu iā Ieova, o le Atua agaalofa ma e na te silafia o tatou mafatiaga, ma e malamalama i le māfuaaga tatou te fetagisi ai!—Salamo 56:8.
[Faaopoopoga i lalo]
^ pala. 6 O le upu Eleni “ona tagi ai lea” e mafai ona uiga atu “o le tagi filemu,” a o le upu o loo faaaogā e faamatala ai le tagiauē o Maria ma isi, ua faaalia ai lo latou “fetagisi leotetele ma le tagituʻi.”