A e frustan fa wi e firi te wi e sari
Kon krosibei na Gado
A e frustan fa wi e firi te wi e sari
TE WAN sma abi sari-ati gi trawan, dan dati wani taki dati a e frustan fa wan trawan e firi. Yehovah Gado na a moro bun eksempre fu wan sma di e firi gi trawan. A e firi san a pipel fu en e firi te den e sari. Fa wi sabi dati? Yehovah e firi trutru gi sma, èn dati wi kan si na den sani di Yesus ben taki èn du di a ben de na grontapu (Yohanes 5:19). Luku fu eksempre a tori di skrifi na ini Yohanes 11:33-35.
Di Lasarus, a mati fu Yesus, ben dede frukufruku, dan Yesus go na a dorpu fu Lasarus. Wi kan frustan taki Maria nanga Marta, den sisa fu Lasarus, ben sari srefisrefi. Yesus ben lobi a famiri disi trutru (Yohanes 11:5). We, san a ben o du? Bijbel e taki: „Di Yesus si taki Maria ben e krei èn taki den Dyu di ben kon nanga en, ben e krei tu, a soktu dipi èn a ben kon hebi gi en trutru; a taki: ’Pe unu poti en?’ Den taigi en: ’Masra, kon luku.’ Yesus bigin krei” (Yohanes 11:33-35). Fu san ede Yesus ben krei? A tru taki Lasarus, a mati fu Yesus di a ben lobi, ben dede, ma Yesus ben o tyari wan kenki kon na ini a situwâsi disi, fu di a ben o gi en wan opobaka (Yohanes 11:41-44). Tra sani de di ben abi krakti tapu den firi fu Yesus?
Luku den wortu baka di skrifi na tapusei. Drape wi e leisi taki di Yesus si taki Maria nanga den sma di ben de drape ben e krei, dan „a soktu dipi” èn „a ben kon hebi gi en trutru”. Na ini Grikitongo den wortu disi abi fu du nanga wan dipi firi. * A sani di Yesus ben si ben abi bun furu krakti na en tapu. Dati ben de krin fu si, di en ai ben kon furu nanga watra. A sani disi e sori taki a dipi sari di trawan ben ondrofeni, ben abi krakti tapu Yesus. A pasa nanga yu wan leisi taki yu bigin krei fu di wan sma di yu lobi ben e krei?—Romesma 12:15.
A firi di Yesus ben e firi gi trawan, e yepi wi fu frustan den fasi fu en Tata, Yehovah, èn a e yepi wi fu frustan na sortu fasi A e handri. Memre taki Yesus ben sori den fasi fu en Tata so bun, dati a ben kan taki: „A sma di si mi, si a Tata tu” (Yohanes 14:9). Sobun, te wi e leisi taki „Yesus bigin krei”, dan wi kan de seiker taki Yehovah srefi e firi san den anbegiman fu en e firi te den e sari. Iya, tra Bijbel skrifiman e sori tu taki na so Yehovah e firi (Yesaya 63:9; Sakaria 2:8). Yehovah na wan Gado di abi trutru sari-ati gi sma!
Te sma e sori taki den e firi gi wi, dan dati e meki taki wi wani tron mati fu den. Te wi lasi-ati noso te wi brokosaka, dan wi trutru wani tron mati nanga wan sma di e sori taki a e frustan a situwâsi fu wi èn taki a e firi gi wi. O moro dan, wi o wani tron mati nanga Yehovah, wan Gado di e sori sari-ati fu di a e firi gi wi, èn a e frustan fu san ede wi e krei.—Psalm 56:8.
[Futuwortu]
^ paragraaf 3 A Griki wortu di vertaal nanga „bigin krei” wani taki „krei sondro fu meki babari”. Ma a wortu di vertaal nanga a krei di Maria nanga trawan ben e krei, wani taki kande dati den ben e „meki furu babari, noso den ben e bari krei”.