U a Fe Mnyoon u ken Ishima You La Yohane 11:33-35
Kporom hen Aôndo
U a Fe Mnyoon u ken Ishima You La Yohane 11:33-35
IPASE inja i mhôônom ér ka u “fan mnyoon u ken ishima i orgen.” Yehova Aôndo hemba ngun a mhôônom a hanma or cii. Ior nav ka vea yaan ican nahan i sôô un ken ishima kpen kpen. Er nan se fe nahana? Kwaghôron u Yesu man ieren na shighe u lu shin tar la cii tese se kwagh u mhôônom ma Yehova ma doon tsung la vough. (Yohane 11:33-35) U tesen ikyav yô, nenge kwagh u i er ken Yohane 11:33-35 la.
Zum u ijende i Yesu, Lasaru kpe kôugh yô, Yesu mough za ken angar u Lasaru lu her la. Ku ne nyoon Maria man Marta, anngôôv mba Lasaru mba kasev mbara kpishi. Yesu yange soo tsombor ne kpen kpen. (Yohane 11:5) Tsô Yesu er nena? Bibilo kaa ér: “Yesu nengen [Maria] vaan, shi Mbayuda mba ve va a na kpaa lu vaan, nahan sôô Un ken ishima, ishima ta Un kwe kpaa. Tsô A pine er: Ne ver un hana? Ve kaa a Na er: Tere, va va nenge. Yesu vaa.” (Yohane 11:33-35) Yesu vaa sha ci u nyi? Sha mimi yô, Lasaru, ijende i Yesu i ishima ishima saa ku, kpa Yesu soo u nderen un shin ku, nahan ityôkyaa lu i una vaa ga. (Yohane 11:41-44) Kwagh ugen kpa ngu u yange sôô Yesu ken ishima tsung yôô?
Hide shi nenge mkaanem ma ken Yohane 11:33-35 ma se nger sha heen ne. Ijiir ne tese ér Yesu yange nengen Maria man mbagenev mbara vaan yô, “sôô” un ken ishima, “ishima ta un kwe.” Ken zwa u yange i hii ngeren mkaanem man ker la yô, asember ne nga tesen kwagh u a ker or ken ishima tsung yô. * Er Yesu nenge ior ve lu vaan yô, mliam vem mara bende a na kpishi. Tsô a kera fatyô u kôron iyol na ga, mliam jile un ashe. Ikyav tese wang ér mnyoon u mbagenev la yange kôr Yesu ken ishima. I lu nahan u nenge or u doon we ishima vaan maa we kpa u mindi mliam vee?—Mbaromanu 12:15.
Mhôônom ma Yesu la wase se u fan aeren a Ter Yehova man igbenda na kpaa. Fa wer, Yesu yange dondo aeren a Ter na vough, nahan yô Yesu kaa ér: “U nan nenge a Mo yô, nan nenge a Ter je ve.” (Yohane 14:9) Nahan ka sea ôr kwagh u i nger ken Bibilo ér “Yesu vaa” la yô, kwagh ne a̱ wase se u fan ser mnyoon u ken ishima i hanma or u civir Yehova yô kôr un ken ishima tsung. Sha kpôô yô, mbangeren Bibilo mbagenev kpa tese ér kape kwagh a lu je la. (Yesaia 63:9; Sekaria 2:8) Mimi yô, Yehova ka Aôndo u mhôôn kpen kpen!
Mhôônom ka ma a kôron or a mbagenev yô ior ve soo kwagh u nan. Zum u ishima i ze se iyol shin se ule tsung yô, ka se lu ikyua a or u nan fe mnyoon wase u ken ishima la, u mhôônom ma ker nan a vese yô. Nahan hemba doon u se kporom ikyua a Yehova cii, gadia ka Aôndo u mhôôn u a fe mnyoon u ken ishima yase man ityôkyaa i se vaan kpaa la!—Pasalmi 56:8.
[Footnote]
^ Inja i ishember i ken zwa Grika i í kaa ér Yesu “vaa” la ashighe kpishi ka i lu u “haan mliam ashe.” Kpa, ishember i í er kwagh u mliam ma Maria man mbagenev mbara yô ashighe agen ka i̱ tese “mliam ma vaan genger genger.”