Xaʼi ti kʼuyelan jvokoltike Juan 11:33-35
Nopajan ta stojolal Dios
Xaʼi ti kʼuyelan jvokoltike
«LI XKʼUXUL avoʼontone jaʼ xkʼuxul koʼonton», xi laj yalbe smelolal jun kʼupil sba talelalil jun misionero yuʼun yajrextiko Jeova, ti oy xa sjabilale. Li Jeova Diose jaʼ noʼox stuk lek snaʼ xaʼi li xkʼuxul koʼontontike. Li stuke kʼux chaʼi kʼalal chil svokol li steklumale. ¿Kʼuxi xuʼ jnaʼtik? Ti kʼuyelan kʼux ta xaʼibe svokoltak yantik li Jeovae jech te lek vinaj ta xkuxlejal Jesús kʼalal ay ta Balumile (Juan 5:19). Jkʼeltik junuk skʼelobil taje, ti te tsʼibabil komel ta Juan 11:33-35.
Kʼalal ta skeremal toʼox cham li Lazaroe, li Jesuse ibat yoʼ bu steklumal li yamigo taje. Jech kʼuchaʼal stalel onoʼoxe, li Marta xchiʼuk Mariae, xvixobtak li Lazaroe, toj echʼ noʼox lajem tajek li yoʼontonike. Ta skoj ti skʼanojan tajek Jesús li jun utsʼ-alalil taje, ¿kʼu van yelan laj yaʼi sba? (Juan 11:5.) Li Vivliae xi ta xale: «Cʼalal laj yil Jesús ti ta xʼocʼ ti Mariae xchiʼuc ta xʼoqʼuic ec li bochʼotic te xchiʼinoj tale, ep laj yat yoʼnton ec; toj chopol laj yaʼay. Jech la sjacʼbe: –¿Bu laj amuquic?– xut. –Leʼe. Bat jqʼueltic avil, Cajval– xiic. Lic ocʼuc li Jesuse» (Juan 11:33-35). ¿Kʼu yuʼun iokʼ li Jesuse? Melel ti chamem xaʼox li yamigoe, pe li stuke ta xbat xchaʼkuxes, ta xchaʼsutesbe li xkuxlejale (Juan 11:41-44). ¿Mi oy van kʼusi yan itijbat-o yoʼonton?
Jkʼelbetik batel smelolal li versikuloetik ti yakal ta xkalbetik skʼoplale. Akʼo avil venta ti kʼalal Jesús laj yil ti yakal ta x-okʼ María xchiʼuk li yan krixchanoetike, li stuke «laj yat yoʼnton» xchiʼuk «toj chopol laj yaʼay». Li smelolal li kʼopetik ta griego taje ta xakʼ ta aʼiel ti toj echʼ noʼox kʼux laj yaʼie. Li Jesuse toj lajel to yoʼonton laj yaʼi ti kʼusi laj yile, jaʼ yuʼun iokʼ. * Lek jamal ta ilel chaʼa, ti Jesuse toj kʼux laj yaʼi li svokoltak yantike. Li voʼote, ¿mi oy okʼemot kʼalal ta xavil ta x-okʼ junuk buchʼu akʼanoj tajeke? (Romanos 12:15.)
Ti kʼuyelan kʼux laj yaʼibe svokol yantik li Jesuse jaʼ ta xi skoltautik ta yaʼibel smelolal ti kʼuyelan stalelal li sTote, li Jeovae. Vuleso avaʼi ta ajol ti Jesuse lek jamal laj yakʼ ta ilel kʼuyelan stalelal li sTote, jaʼ yuʼun xi laj yale: «Li bochʼotic laj xa yilicune laj xa yilic o li Jtote», xi (Juan 14:9). Jaʼ yuʼun, kʼalal ta jkʼeltik ti «lic ocʼuc li Jesuse», xuʼ jnaʼtik ta melel ti Jeovae kʼux ta xaʼi ta yoʼonton ti kʼalal ta xil-o svokolik li yajtuneltake. Jech noxtok, yan jtsʼibajometik yuʼun Vivliae jech ta xalik ek (Isaías 63:9; Zacarías 2:8). Ta melel li Jeovae, ¡jaʼ jun Dios ti oy xkʼuxul yoʼontone!
Ta skoj ti kʼux ta xkaʼibetik svokolik li yantike oy ep buchʼutik chnopajik tal ta jtojolaltik. Kʼalal mu noʼox kʼusi jkʼantike o solel ta jvul koʼontontike, jaʼ xa lek ta xkaʼitik ti te oyutik ta stojolal li buchʼutik xaʼibe smelolal ti kʼuyelan kuxulutike xchiʼuk ti kʼux ta xaʼiik li jvokoltik eke. Jaʼ yuʼun mas to chi jnopaj ta stojolal li Jeovae, jun Dios ti oy xkʼuxul yoʼonton, ti snaʼoj kʼuyelan li jvokoltike xchiʼuk ti jaʼ noʼox stuk snaʼoj kʼu yuʼun ta xi j-okʼutike (Salmo 56:8).
[Tsʼib ta yok vun]
^ par. 3 Li jpʼel kʼop ta griego ti jelubtasbil «lic ocʼuc» xie, xuʼ jaʼ skʼan xal-o ti «mu x-avetuk ta okʼele», pe jaʼuk li jpʼel kʼop ti chichʼ tunesel sventa chichʼ alel kʼuyelan ta x-okʼ li María xchiʼuk yantike, xuʼ jaʼ skʼan xal «tsots okʼel ti lek xkaʼitike, jikʼ oʼonton ti lek xkaʼitike».