Letiʼeʼ ku naʼatik bix k-uʼuyikba
Ilawil a natsʼkaba tiʼ Dios
Letiʼeʼ ku naʼatik bix k-uʼuyikba
UTÚUL misionero tiʼ u j-jaajkunajoʼob Jéeoba tsʼoʼok u chan yantal u jaʼabileʼ, tu yaʼaleʼ «ken kʼuchuk tu puksiʼikʼal máak le baʼax ku muʼyajtik uláakʼ máakeʼ, ku kʼuchul u naʼat jach bix u yuʼubikuba le máax ku muʼyajoʼ». Jéeoba Dioseʼ, letiʼe máax maas ku naʼatik bix u yuʼubikuba máakoʼ. Letiʼeʼ ku yaatal u yóol ken u yil u muʼyaj u kaajal. ¿Bix k-ojéeltik lelaʼ? Tumen tuláakal baʼax tu beetaj Jesús ka taal way Luʼumeʼ tu chíikbesaj bix u yuʼubikuba Jéeoba ken u yil táan u muʼyaj máak (Juan 5:19). Koʼox ilik bix u yeʼesik le baʼax tsʼíibtaʼan tu Evangelioi Juan 11:33-35.
Lazaroeʼ jach táankelem ka kíimi, le ka tu yojéeltaj Jesús tsʼoʼok u kíimil u amigoaʼ, bin tak tu kaajal u yile. Marta yéetel María, u láakʼtsiloʼob Lazaroeʼ, jach lubaʼan u yóoloʼob. Jesuseʼ jach u yaabiltmaj kaʼach le familiaaʼ, le oʼolaleʼ ¿baʼax tu beetaj? (Juan 11:5.) Le Bibliaoʼ ku yaʼalik: «Le ka tu yilaj Jesús táan u yokʼol María paʼteʼ yéetel le judíoʼob taaloʼob tu paachoʼ, okʼomchaj u yóol ka péeknaj u yóol u puksiʼikʼal. Tu kʼáataj túun tiʼob: ¿Tuʼux ta mukeʼex? Ka aʼalaʼabtiʼ: Yuumtsil, koʼoten a wile. Ka okʼolnaj Jesús» (Juan 11:33-35). Wa Jesús u yojel yaan u kaʼa kuxkíintik Lázaroeʼ, ¿baʼaxten túun okʼolnaji? (Juan 11:41-44).
Le versiculoʼob tsʼoʼok k-xokikoʼ ku yaʼalikeʼ le ka tu yilaj Jesús táan u yokʼol María yéetel le u maasil máakoʼoboʼ, letiʼeʼ «okʼomchaj u yóol» yéetel «péeknaj u yóol u puksiʼikʼal». Ich griegoeʼ le tʼaanoʼob ku sutaʼal teʼ versiculoʼobaʼ ku tsʼáaik naʼatbil jach táaj yaachaj u yóol Jesús yoʼolal le baʼax tu yiloʼ. Letiʼeʼ «péeknaj u yóol u puksiʼikʼa[leʼ]» ka okʼolnaj xan. * Lelaʼ ku yeʼesikeʼ Jesuseʼ jach yaachaj u yóol ka tu yilaj táan u muʼyaj le máakoʼoboʼ. ¿Yaan wa kʼiin tsʼoʼok xan a wokʼol ken a wil táan u yokʼol utúul máax a yaabilmaj? (Romailoʼob 12:15.)
Le úuchik u kʼuchul tu puksiʼikʼal Jesús le baʼax ku muʼyajtik u maasiloʼ ku yáantkoʼon k-il bix u yuʼubik Jéeoba ken muʼyajnak máak yéetel baʼax jeʼel u beetikeʼ. Kʼaʼajaktoʼoneʼ Jesuseʼ tu jach eʼesaj bix le jatsʼuts modos yaan tiʼ u taataoʼ, le oʼolal tu yaʼalaj: «Le máax ku yilken teneʼ ku yilik le Taataoʼ» (Juan 14:9). Le oʼolal ken k-xok teʼ Biblia «okʼolnaj Jesus[oʼ]», ku yeʼesiktoʼoneʼ Jéeobaeʼ ku yaatal u yóol ken u yil táan u muʼyaj le máaxoʼob meyajtikoʼ. Tsʼoʼoleʼ yaan xan uláakʼ tekstoʼob teʼ Biblia eʼesik jach beyoʼ (Isaías 63:9; Zacarías 2:8). ¿Máasaʼ jach nojoch u yaabilaj Jéeoba?
Le ken lúubuk k-óoleʼ, ¿máasaʼ k-ilik natsʼikba yiknal le máaxoʼob ku naʼatikoʼob bix k-uʼuyikba yéetel ku yilik u yáantkoʼonoʼoboʼ? Le oʼolaleʼ jach maʼalob ka k-natsʼba yiknal Jéeoba, utúul Dios jach yaan u yaabilaj yéetel jach ku naʼatik bix k-uʼuyikba (Salmo 56:8).
[Tsolajiloʼob]
^ xóot’ol 6 Le tʼaan griego ku suʼutul «okʼolnaj» yaan tuʼuxeʼ u kʼáat u yaʼal «x-mukul okʼol», baʼaleʼ le tʼaan meyajnaj utiaʼal u yaʼalaʼal táan u yokʼol María yéetel u maasil máakoʼoboʼ, maʼ xaaneʼ u kʼáat u yaʼal «awat okʼol».