Mbụme Oro Mme Andikot Ẹbụpde

Ndi Abasi Esida Mme Oto-Obot Afanikọn̄ Amia Mme Owo Ufen?

ABASI isidaha mme oto-obot afanikọn̄ imia mme owo ufen. Akananam enye inamke utọ n̄kpọ oro, idinyụn̄ inamke. Ntak-a? Koro Bible ọdọhọ ke 1 John 4:8 ete ke “Abasi edi ima.”

Ima esinam Abasi anam kpukpru se enye anamde. Ima isinamke owo idiọk, koro Bible ọdọhọ ke “ima inamke mbọhọidụn̄ esie idiọkn̄kpọ.” (Rome 13:10) Bible ọdọhọ ke Job 34:12 ete: “Kakpan Abasi ikemeke ndinam idiọk.”

Edi akpanikọ ke Bible ama ebem iso etịn̄ ete ke mme afanikọn̄ nte “ikpọ unyekisọn̄” ẹyetịbe ke eyo nnyịn. (Luke 21:11) Edi idịghe Jehovah esidi ntak nsobo oro esisan̄ade ye mme afanikọn̄ emi ukem nte owo emi esitịn̄de nte eyo editiede mîdịghe ntak nsobo oro esisan̄ade ye oyobio oro enye ọkọdọhọde ke eyetịbe. Nte ededi, edieke Abasi mîdịghe ntak ndutụhọ oro mme owo ẹsisobode ke ini oto-obot afanikọn̄ etịbede, anie ndien edi ntak?

Bible ọdọhọ ke “ofụri ererimbot esịne ke idak odudu andidiọk,” Satan kpa Devil. (1 John 5:19) Enye edi owotowo tọn̄ọ nte enye ọkọsọn̄ ibuot toto ke ntọn̄ọ ubonowo tutu esịm eyo nnyịn. (John 8:44) Satan idaha uwem owo ke n̄kpọ ndomokiet. Ibụk ibụk udọn̄ ọyọhọ enye idem, ntre idịghe n̄kpọ n̄kpaidem ndikụt nte enye anamde ofụri ererimbot etie ibụk ibụk. Ke ererimbot mfịn, mbon ibụk ẹmenam ata ediwak mbon oro mînyeneke owo ẹkedụn̄ ke ebiet oro oto-obot afanikọn̄ m̀mê mme afanikọn̄ emi ẹtode owo ẹkemede ndisọp ntịbe. (Ephesus 2:2; 1 John 2:16) Ntem, mbon idiọkitọn̄ ẹdi ntak ndusụk afanikọn̄ oro mme owo ẹsobode. (Ecclesiastes 4:1) Didie?

Mme owo ẹsinyene ubọk ke ekese afanikọn̄ oro ẹsitịbede. Ke uwụtn̄kpọ, kere ban̄a afanikọn̄ oro ekesịmde mme andidụn̄ obio New Orleans, U.S.A., emi ukwọ ye oyobio ẹkenọmọde, m̀mê mme ufọk emi obot mbenesụk Venezuela okobomode owụri. Ke mme utọ idaha emi ye mbon eken, mme n̄kpọ-obot, utọ nte ofụm ye edịm, ẹma ẹkabade ẹdi afanikọn̄ akpan akpan sia mme owo mînyeneke ifiọk iban̄a nte n̄kann̄kụk mmọ etiede, edibọp n̄kpọ idiọk idiọk, idiọk ndutịm, edifụmi mme ntọt, ye mme ndudue emi ukara ẹnamde.

Kere ban̄a afanikọn̄ emi eketịbede ke eyo Jesus. Tọwa ama ọduọ ke mbuari owot owo 18. (Luke 13:4) Ekeme ndidi ndudue oro ẹkenamde ke ini ẹkebọpde tọwa emi akanam enye ọduọ, mîdịghe, “ini ye unọmọ” ẹkesịm mme owo emi, m̀mê n̄kpọ mbiba emi—edi imenen̄ede inịm ke idịghe Abasi akamia mmọ ufen.—Ecclesiastes 9:11.

Ndi akanam odu nsobo oro Abasi edide ntak? Ih, edi nsobo Abasi iketiehe nte oto-obot afanikọn̄ m̀mê afanikọn̄ emi owo anamde etịbe. Nsobo Abasi akasasat owo, onyụn̄ enyene uduak, ikonyụn̄ itịbeke kpukpru ini. Uwụtn̄kpọ iba ẹdi Ukwọ ofụri ererimbot eke eyo Noah ye nsobo obio Sodom ye Gomorrah ke eyo Lot. (Genesis 6:7-9, 13; 18:20-32; 19:24) Abasi ama osobo ndiọi mbon oro mîkakabakede esịt onyụn̄ anyan̄a mbon oro ẹkenende ke enyịn esie.

Ke akpanikọ, Jehovah Abasi ekeme onyụn̄ ọdọn̄ enye ndinam kpukpru ndutụhọ ẹtre nnyụn̄ nnam nnyịn ibọhọ mme mfịna oro ẹsisan̄ade ye mme oto-obot afanikọn̄. N̄wed Psalm 72:12 ama etịn̄ aban̄a Jesus Christ, kpa Edidem emi Abasi emekde ete: “Enye ayanyan̄a ubuene ke ini enye esemede; ye owo ukụt, ye owo eke mînyeneke andinyan̄a.”